اسلام آباد ( مانیٹرنگ ڈیسک ) پاکستان، ترکیہ، قطر اور انڈونیشیا نے ایک دفاعی معاہدے کی مفاہمتی یادداشت پر دستخط کر دئیے ہیں۔ترکیہ کی وزارتِ دفاع کی جانب سے جاری بیان کے مطابق دوحا میں ترکیہ، قطر، پاکستان اور انڈونیشیا کے درمیان دفاعی تعاون کا معاہدہ طے پا گیا، چاروں ممالک نے دوحہ میں ”بدر”مفاہمتی یادداشت پر دستخط کیے۔معاہدے پر دستخط کرنے والوں میں ترکیہ کے وزیرِ قومی دفاع یاشار گولر، قطر کے نائب وزیرِاعظم اور وزیرِ مملکت برائے دفاعی امور شیخ سعود بن عبدالرحمان بن حسن الثانی، انڈونیشیا کے نائب وزیرِ دفاع یوسف جوہاری اور پاکستان کے وزیرِ دفاع خواجہ محمد آصف شامل تھے۔بیان کے مطابق معاہدے کا مقصد دفاعی صلاحیتوں میں اضافہ اور فوجی تعاون کو فروغ دینا ہے، معاہدے کے تحت مشترکہ فوجی مشقیں، تربیت اور دفاعی ٹیکنالوجی میں تعاون کیا جائے گا۔ اعلامیے کے مطابق بدر معاہدے سے اتحادی اور دوست ممالک کی دفاعی ضروریات پوری کرنے میں مدد ملے گی۔ترک وزارت دفاع کے مطابق معاہدے کے تحت مشترکہ فوجی مشقوں اور تربیت میں تعاون بڑھایا جائے گا، ترکیہ، قطر، پاکستان اور انڈونیشیا کے درمیان دفاعی تحقیق اور ٹیکنالوجی میں تعاون پر بھی اتفاق ہوگیا۔یاد رہے کہ پاکستان، ترکیہ اور سعودی عرب کے درمیان مکہ جوائنٹ ڈیفنس ایگریمنٹ کے نام سے ایک دفاعی موجود ہے جو 7 اگست کو مکہ مکرمہ میں طے پایا تھا۔سعودی عرب، پاکستان اور ترکیہ کی جانب سے مکہ معاہدے کے تحت قائم اسٹریٹجک دفاعی کمیٹی کا ہیڈکوارٹر سعودی دارالحکومت ریاض میں موجود ہے جب کہ پاکستان فوج کے لیفٹیننٹ جنرل ریٹائرڈ نعمان محمود کو اس اتحاد کا پہلا سیکریٹری جنرل مقرر کیا گیا ہے۔
دستخط
