لائیوسٹاک سیکٹر کا استحکام، پنجاب کی معاشی خودکفالت کا ضامن، عاصم میکن

لاہور (خبر نگار) پارلیمانی سیکرٹری عاصم شیر میکن نے کہا ہے کہ غریب خواتین کو دی جانے والی گائیں اور بھینسیں ان کے لیے مستحکم معاشی اثاثہ بنیں گی۔ انہوں نے ان خیالات کا اظہار راجن پور کی تحصیل جامپور میں مستحق خواتین میں جانوروں کی تقسیم کے آغاز کی پروقار تقریب سے خطاب کرتے ہوئے کیا۔ اس موقع پر سیکرٹری لائیوسٹاک پنجاب احمد عزیز تارڑ نے کہا کہ لائیوسٹاک سیکٹر کا استحکام پنجاب کی معاشی خودکفالت کا ضامن ہے جسے جدید خطوط پر استوار کرنے کیلئے ایک مضبوط اور جامع روڈ میپ نافذکر دیا گیا ہے۔ گزشتہ دو سالوں کے دوران 9255 جانور مستحقین میں تقسیم کئے گئے جبکہ وزیراعلیٰ لائیو سٹاک کارڈ پروگرام کے تحت 8.1 ارب روپے کے بلاسود قرضے جاری کیے گئے جن کی شاندار 95 فیصد ریکوری پروگرام کی کامیابی کا واضح ثبوت ہے۔ اس کے علاوہ 4 لاکھ سے زائد جانوروں کو فربہ کرکے برآمدی معیار کے مطابق تیار کیا گیا۔ تفصیلات کے مطابق وزیراعلیٰ پنجاب مریم نوازشریف کی زیر قیادت پنجاب حکومت نے جنوبی پنجاب کے پسماندہ اضلاع کی ترقی اور دیہی و بیوہ خواتین کو معاشی طور پر خودمختار بنانے کے لیے عملی اقدامات کا دائرہ کار مزید وسیع کر دیا ہے۔ اس سلسلے میں ضلع راجن پور کی تحصیل جامپور میں مستحق اور بیوہ خواتین میں جانوروں کی تقسیم کی ایک پروقار تقریب کا انعقاد کیا گیا۔ تقریب میں مجموعی طور پر 96 جانور تقسیم کیے گئے، جن میں 69 گائیں اور 27 بھینسیں شامل ہیں۔ واضح رہے کہ ضلع راجن پور میں اس منصوبے کے تحت کل 265 جانور تقسیم کیے جا رہے ہیں۔ تقریب کے مہمانِ خصوصی پارلیمانی سیکرٹری عاصم شیر میکن نے قرعہ اندازی کے ذریعے خواتین میں جانور تقسیم کیے۔ اس موقع پر ڈائریکٹر غلام نظام الدین اور ایڈیشنل ڈائریکٹر لائیوسٹاک ڈاکٹر شمائلہ فردوس نے شرکاء کا خیرمقدم کیا۔ تقریب سے بطور مہمانِ خصوصی خطاب کرتے ہوئے پارلیمانی سیکرٹری عاصم شیر میکن نے کہا کہ وزیراعلیٰ پنجاب مریم نوازشریف کا جنوبی پنجاب کی بہتری اور خواتین کو خودمختار بنانے کا اقدام انتہائی تحسین لائق ہے۔ اس نیک کام کا آغاز ضلع راجن پور سے کیا گیا ہے، جہاں تقسیم کیے جانے والے یہ جانور غریب خواتین کے لیے ایک مستحکم معاشی اثاثہ بنیں گے۔ انہوں نے مزید بتایا کہ مویشیوں کی بہتر پرورش کے لیے لائیوسٹاک کارڈ کے ذریعے فی جانور 27 ہزار روپے کی مالی معاونت بھی فراہم کی جا رہی ہے۔ بریفنگ دیتے ہوئے ڈائریکٹر جنرل (توسیع) ڈاکٹر سید ندیم بدر نے تقریب کے شرکاء کو بتایا کہ یہ منصوبہ صوبے کی معاشی خودمختاری کا ضامن ہے۔ ڈاکٹر سید ندیم بدر نے آئندہ کے لائحہ عمل پر روشنی ڈالتے ہوئے بتایا کسانوں کو گھر کی دہلیز پر طبی سہولیات فراہم کرنے کے لیے رواں سال 60 اور اگلے سال یی300 موبائل ویٹرنری ڈسپنسریز فراہم کی جائیں گی، جبکہ جانوروں کی صحت کے لیے ہر ضلع میں سٹیٹ آف دی آرٹ ہسپتال اور آپریشن تھیٹرز قائم کر دیئے گئے ہیں۔ آئندہ سال گوشت کی پروسیسنگ اور 500 سے 5,000 تک جانوروں کی گنجائش کے جدید اینیمل شیڈز کے لیے اربوں روپے کے قرضے دیئے جائیں گے۔ اس کے علاوہ گوشت کی برآمدات بڑھانے کے لیے حکومت منہ کھر (FMD) بیماری سے پاک کمپارٹمنٹس بنا رہی ہے اور مقامی سطح پر ویکسین کی تیاری کے لیے PIVOT ادارے سے تعاون جاری ہے۔ تقریب میں پارلیمانی سیکرٹری عاصم شیر میکن، سیکرٹری لائیوسٹاک پنجاب احمد عزیز تارڑ، ایم پی اے سردار شیر افگن خان گورچانی، سیکرٹری لائیوسٹاک سائوتھ پنجاب اسد نعیم، ایڈیشنل سیکرٹری ٹیکنیکل ڈاکٹر عثمان طاہر، ڈائریکٹر جنرل توسیع ڈاکٹر سید ندیم بدر اور ڈائریکٹر جنرل پروڈکشن ڈاکٹر کنور محمد نعیم سمیت اہم حکومتی شخصیات، اراکینِ اسمبلی اور مویشی پال خواتین و حضرات کی کثیر تعداد نے شرکت کی۔