چین میں7 شدت کا زلزلہ 16 افارد ہلاک 65 زخمی 413آفٹر شاکس ریکارڈ

بیجنگ، لہاسہ ، تائیوان، کوئٹہ ( نیوز ایجنسیاں) چین میں 7.0شدت کے زلزلے سے تباہی، 16افراد ہلاک 65زخمی ہوگئے ۔ زلزلے کے بعد  413آفٹر شاکس ریکارڈ کئے گئے ، متاثرہ علاقے میں عمارتوں اور دیگر ڈھانچوں کے لیے مزید خطرہ
پیدا ہوگیا۔ ادھر سال کا طاقتور ترین سمندری طوفان ”چامپی” تائیوان سے ٹکرا گیا ، جاپان کی جانب بڑھنے لگا جس کے باعث 1000 سے زائد پروازیں منسوخ کردی گئیں جبکہ سکول، دفاتر اور سٹاک ایکسچینج کو بندکردیا گیا۔ چین کے جنوب مغربی علاقے تبت میں 22اکتوبر کو مقامی وقت کے مطابق رات 10:33پر 7 شدت کے زلزلے نے تباہی مچادی، جس کے نتیجے میں آخری اطلاعات آنے تک 16 افراد ہلاک اور 65زخمی ہوچکے تھے۔زلزلے کے بعد علاقے میں 413 آفٹر شاکس ریکارڈ کئے گئے۔ زلزلے کے بعد ہزاروں افراد کو محفوظ مقامات پر منتقل کردیا گیا ہے، جبکہ امدادی ٹیمیں متاثرہ علاقوں میں نقصانات کا جائزہ لینے اور لوگوں کی مدد کرنے میں مصروف ہیں۔غیر ملکی میڈیا کے مطابق، چین کے علاقے تبت میں 7شدت کے زلزلے کے نتیجے میں زخمی ہونے والے افراد کی تعداد 65ہوگئی ہے، جبکہ ہلاکتوں کی تعداد 16ہے۔ امریکی جیولوجیکل سروے نے بتایا کہ زلزلے کا مرکز شمالی تبت کے ایک کم آبادی والے، اونچائی والے علاقے میں ناگکو سے 191کلومیٹر مشرق شمال مشرق میں تھا ، اور اس کی گہرائی 18کلومیٹر تھی۔ ناگکو تبت کے دارالحکومت لہاسا کے شمال میں 300 کلومیٹر سے زیادہ کے فاصلے پر ہے۔نیشنل سینٹر فار سیسمولوجی (این سی ایس)نے ایکس پر کہا کہ زلزلہ 20:03:43 IST پر 173 کلومیٹر کی گہرائی میں آیا۔ ژنہوا نے اس سے قبل کہا تھا کہ علاقے میں سطح-II کے زلزلے کی تباہی سے نمٹنے کے لیے ہنگامی ردعمل کیا گیا ہے۔چینی میڈیا نے پورے علاقے میں ہونے والے وسیع نقصان کو بھی بیان کیا۔ مکانات منہدم ہو گئے، امدادی ٹیمیں رات بھر کام کرتی رہیں، ٹرانسپورٹ روابط منقطع ہو گئے اور ہنگامی سامان کو علاقے میں منتقل کر دیا گیا۔دریں اثناء بلوچستان کے علاقے دالبندین اور ملحقہ علاقوں میں زلزلے کے جھٹکوں سے خوف و ہراس پھیل گیا۔دالبندین میں زلزلے کی شدت5.1 ریکارڈ کی گئی۔زلزلے کا مرکز دالبندین سے 15 کلومیٹر مشرق میں تھا جبکہ گہرائی 53 کلومیٹر ریکارڈ کی گئی۔ادھر سمندری طوفان ”چامپی”کے تائیوان سے ٹکرانے اور جاپان کے جنوبی علاقوں کی طرف بڑھنے کے باعث مشرقی ایشیا بھر میں نظامِ زندگی شدید متاثر ہو گیا ہے۔عالمی میڈیا کے مطابق مشرقی ایشیا میں سال کے طاقتور ترین سمندری طوفانوں کے تائیوان کی طرف بڑھنے کے ساتھ ہی علاقے میں شدید الرٹ جاری کر دیا گیا ہے اور ہزاروں مسافر پروازوں کی منسوخی سے متاثر ہوئے ہیں۔ طوفان کے پیشِ نظر تائیوان میں اسکول، دفاتر اور اسٹاک ایکسچینج بند کر دیے گئے ہیں جبکہ جاپان اور تائیوان میں 1,000 سے زائد ملکی و بین الاقوامی پروازیں منسوخ کر دی گئی ہیں۔ تائیوان میں تیز ہواں اور مٹی کے تودے گرنے سے ایک شخص ہلاک اور 94 زخمی ہو چکے ہیں، جبکہ ہزاروں افراد کو محفوظ مقامات پر منتقل کر دیا گیا ہے۔طوفان کی آمد کے پیشِ نظر تائیوان کے 22 اضلاع اور شہروں میں سے تقریبا تمام علاقوں میں جمعے کے روز تمام تعلیمی ادارے اور سرکاری و نجی دفاتر معطل کر دیے گئے ہیں۔تائیوان کے سنٹرل ویدر ایڈمنسٹریشن کے مطابق طوفان کا 320 کلومیٹر پر محیط دائرہ اثر جمعے کے روز تائیوان کے زیادہ تر حصے پر محیط رہے گا۔ دارالحکومت تائی پے کے بعض علاقوں میں 24 گھنٹوں کے دوران 200 ملی میٹر سے زائد بارش ہو چکی ہے، جبکہ شمالی اور شمال مشرقی پہاڑی علاقوں میں 900 ملی میٹر تک بارش اور بوفورٹ سکیل کے آخری درجے (12 ویں لیول) کی طوفانی ہوائیں چلنے کا امکان ہے۔تائیوان میں جمعے کے روز طے شدہ تمام 262 اندرونِ ملک پروازیں اور 660 سے زائد بین الاقوامی پروازیں منسوخ کر دی گئی ہیں۔ اس کے ساتھ ہی ریلوے، فیری سروسز اور اہم ہائی ویز کو بھی بند کر دیا گیا ہے۔جاپان میں بھی طوفان چامپی کے شدید اثرات مرتب ہو رہے ہیں۔ جاپان ایئرویز نے اوکی ناوا کے میئاکو اور اشی گاکی ایئرپورٹس کے علاوہ تائی پے کے لیے اپنی تمام پروازیں منسوخ کر دی ہیں ، جس کے باعث 11,000 سے زائد مسافر متاثر ہوئے ہیں۔چینی محکمہ موسمیات نے طوفان کے لیے 4 درجاتی نظام میں سے سب سے نچلے درجے کا بلیو الرٹ جاری کیا ہے، جبکہ طوفان سے سب سے زیادہ متاثر ہونے کا خدشہ رکھنے والے صوبے ژجیانگ کے ساحلی علاقوں کے لیے دوسرا بڑا یعنی اورنج الرٹ جاری کیا گیا ہے۔ طوفان کے ہفتے کے اختتام پر شنگھائی سمیت مشرقی ساحلی خطے سے گزرنے کی توقع ہے جہاں 50 تا 80 ملی میٹر بارش کا امکان ہے۔موسمیاتی ماہرین کے مطابق طوفان چامپی فی الوقت شمال مغرب کی جانب تائیوان کی طرف بڑھ رہا ہے، جہاں جمعے اور ہفتے کی رات تک اس کا زور رہے گا۔ ہفتے کی دوپہر تک یہ چین کے ساحل سے ہٹ کر جاپان کے جنوبی اور مشرقی حصوں اور جنوبی کوریا کے جزیرے جیجو کی طرف مڑ جائے گا۔سائنسدانوں کے مطابق یہ سال حالیہ عرصے کے سب سے زیادہ متحرک طوفانی سیزنز میں سے ایک بن رہا ہے۔ جاپان میں رواں سال کا یہ 30 واں طوفان ہے، جو 2013 کے بعد ایک ریکارڈ ہے۔
زلزلہ