مالی سال کی پہلی سہ ماہی’ پاکستان کی معیشت میں مسلسل بہتری کے آثار ہیں: خرم شہزاد

لاہور (این این آئی) رواں مالی سال کی پہلی سہ ماہی کے دوران پاکستان کی معیشت میں بہتری کے آثار برقرار رہے ہیں جن میں زرمبادلہ کے ذخائر میں اضافہ، برآمدات اور سرمایہ کاری میں بڑھوتری، ملکی قرضوں کی درجہ بندی میں بہتری، نجی شعبے کو قرضوں کی فراہمی میں توسیع اور اصلاحات میں پیشرفت شامل ہے۔ سرکاری ریڈیو نے وزیر خزانہ
کے مشیر خرم شہزاد کی جانب سے جاری کردہ کارکردگی رپورٹ کے حوالے سے بتایا کہ ملک کے مرکزی بینک کے زرمبادلہ کے ذخائر ساڑھے 21ارب ڈالر تک پہنچ گئے،برآمدات 11فیصد اضافے کے ساتھ 11ارب 20کروڑ ڈالر جبکہ ترسیلات زر 10ارب 90کروڑ ڈالر تک پہنچ گئیں۔براہ راست غیر ملکی سرمایہ کاری 20فیصد اضافہ کے ساتھ بڑھ کر72کروڑ ڈالر ہوگئی جبکہ پاکستان اسٹاک ایکسچینج میں سرمایہ کاروں کی تعداد 6لاکھ 56ہزار سے تجاوز کر گئی۔ رپورٹ میں پاکستان کے خودمختار قرضوں کی درجہ بندی کے منظرنامے میں بہتری کو بھی اجاگر کیا گیا ہے جبکہ بین الاقوامی درجہ بندی کے تینوں بڑے اداروں نے مستحکم درجہ بندی کو برقرار رکھا ہے۔