مقبوضہ کشمیر،2019ء سے ابتک16ہزارسے زائد خواتین اور لڑکیاں لاپتہ

سرینگر (این این آئی) غیرقانونی طور پر بھارت کے زیر قبضہ جموں و کشمیر میں 2019 سے اب تک کم از کم 16,397 خواتین اور لڑکیاں لاپتہ ہوچکی ہیں جن میں کم عمر لڑکیاں بھی شامل ہیں اور ان میں سے 4,271 کا تاحال کوئی سراغ نہیں ملا ہے۔ کشمیر میڈیا سروس کے مطابق یہ اعداد و شمار مقبوضہ جموں و کشمیرکے محکمہ داخلہ سے معلومات تک رسائی کی درخواست (آر ٹی آئی) کے ذریعے حاصل کیے گئے۔ ریکارڈ کے مطابق 2019ء سے جون 2026ء تک مقبوضہ علاقے میں 14,593 بالغ خواتین لاپتہ ہوئیں۔ ان میں سے 11,338 خواتین کا سراغ لگا لیا گیا، جبکہ 3,255 تاحال لاپتہ ہیں۔ اسی طرح 2019ء سے اگست 2026ء تک 1,804 کم عمر لڑکیاں لاپتہ ہوئیں۔ ان میں سے 788 کو تلاش کر لیا گیاجبکہ 1,016 کا تاحال کوئی سراغ نہیں ملا۔ مجموعی طور پر لاپتہ ہونے والی 16,397 خواتین اور لڑکیوں میں سے 12,126 کا سراغ لگایا گیا۔ یوں 26 فیصد سے زائد کیسز تاحال حل طلب ہیں۔