کراچی: 25 روز بعد پانی ملا تو بجلی غائب، مکینوں کا ناگن چورنگی پر احتجاج کا انتباہ

کراچی (این این آئی) شہر قائد کے علاقے نارتھ کراچی سیکٹر 11ـC میں بجلی کی طویل بندش پر علاقہ مکینوں نے شدید غم و غصے کا اظہار کرتے ہوئے احتجاج کی دھمکی دے دی۔ مکینوں کا کہنا ہے کہ 25 روز بعد پانی کی فراہمی بحال ہوئی تو عین اسی وقت بجلی بند کردی گئی، جس سے پہلے ہی مشکلات کا شکار شہریوں کی پریشانیوں میں مزید اضافہ ہوگیا۔ علاقہ مکینوں کے مطابق وہ پانی کی فراہمی کے انتظار میں رات گئے تک جاگتے رہے تاہم جیسے ہی پانی آیا، بجلی کی فراہمی معطل ہوگئی۔ رہائشیوں نے صورت حال پر تشویش کا اظہار کرتے ہوئے کہا کہ انہیں بنیادی سہولتوں کے حصول میں مسلسل مشکلات کا سامنا ہے۔ مکینوں نے الزام عائد کیا کہ نارتھ کراچی کے رہائشیوں کے ساتھ ناانصافی کی جارہی ہے۔ ان کا کہنا تھا کہ ایک جانب کئی ہفتوں تک پانی دستیاب نہیں ہوتا اور دوسری جانب پانی ملنے پر بجلی کی بندش شہریوں کے لیے مزید اذیت کا باعث بن رہی ہے۔