مریدکے میں تجاوزات مافیا کیخلاف پیرا فورس کا کریک ڈائون، جرمانے اور انتباہ جاری

کالا شاہ کاکو (این این آئی) مریدکے اور گردونواح میں ٹریفک کے بہائو کو بہتر بنانے اور شہریوں کے لیے راستوں کی سہولت کو یقینی بنانے کے لیے پیرا فورس نے انچارج محمد نظامی کی زیرِ قیادت تجاوزات مافیا کے خلاف سخت کارروائی کی ہے۔ کارروائی کے دوران قوانین کی خلاف ورزی کرنے والے دکانداروں کو بھاری جرمانے عائد کیے گئے جبکہ آئندہ کے لیے سخت وارننگ بھی دی گئی۔ تفصیلات کے مطابق انچارج پیرا فورس محمد نظامی نے ٹیم کے ہمراہ شہر کے مختلف بازاروں اور مرکزی شاہراں کا دورہ کیا اس موقع پر انہوں نے دکانداروں کو اکٹھا کر کے تفصیلی بریفنگ دی اور تاکید کی کہ وہ بازاروں کی حد بندی کا احترام کریں۔ محمد نظامی نے دکانداروں سے گفتگو کرتے ہوئے کہاتمام تاجر اور دکاندار اپنی حدود کے اندر رہ کر اپنے بچوں کے لیے رزقِ حلال کمائیں راستوں کو بلاک کرنا اور شہریوں کے لیے مشکلات پیدا کرنا کسی صورت قابلِ قبول نہیں، اس لیے سب اپنی دکانوں کی حدود کے اندر کام کریں پیرا فورس کی اس بروقت کارروائی سے سڑکوں اور فٹ پاتھوں پر رکھی گئی تمام عارضی و مستقل رکاوٹیں ہٹا کر راستے صاف کروا دیئے گئے، جس کے بعد ٹریفک اور پیدل چلنے والوں کو درپیش شدید مشکلات کا خاتمہ ہو گیامریدکے کے شہریوں نے پیرا فورس اور خاص طور پر انچارج محمد نظامی کے شائستہ، عزت دارانہ اندازِ گفتگو اور کارروائی کے طریقے کو بے حد سراہادوسری جانب دکانداروں نے بھی پیرا فورس کے ساتھ مکمل تعاون کا یقین دلاتے ہوئے اپنی حد سے تجاوز نہ کرنے کا عزم ظاہر کیا۔