پاک چین سائنسی تعاون فروغ کیلئے نسٹ میں دو روزہ سمپوزیم کا آغاز

اسلام آباد(نامہ نگار خصوصی )نیشنل یونیورسٹی آف سائنسز اینڈ ٹیکنالوجی(نسٹ)میں پاک چین سائنسی تعاون اور مشترکہ تحقیق کے فروغ کے لیے دو روزہ سمپوزیم SinoPak BioConnect 2026 کا انعقاد ہو رہا ہے۔ سمپوزیم کا مقصد بائیومیٹیریلز، بایومیڈیکل ٹیکنالوجیز اور متعلقہ شعبوں میں مشترکہ تحقیقی منصوبوں، علمی تبادلے اور ادارہ جاتی روابط کو فروغ دینا ہے۔نسٹ کے اسکول آف کیمیکل اینڈ میٹریلز انجینئرنگ کے مرکز برائے تحقیق برائے سرفیس انجینئرنگ کے زیرِ اہتمام منعقدہ اس سمپوزیم میں پاکستان اکیڈمی آف سائنسز اور چائنیز اکیڈمی آف سائنسز بھی شریکِ تعاون ہیں۔ اس میں سائنس دان، ماہرینِ تعلیم، محققین اور طلبہ شرکت کر رہے ہیں۔ سمپوزیم کے ذریعے مشترکہ تحقیقی تجاویز اور فنڈنگ کے حصول، علمی اشاعتوں، اعلی تعلیم و تحقیق میں مشترکہ تربیت اور پاکستانی و چینی محققین کے تبادلے کے مواقع پیدا کرنے پر توجہ دی جا رہی ہے۔تقریب سے خطاب کرتے ہوئے وزارتِ سائنس و ٹیکنالوجی کے ایڈیشنل سیکریٹری علی بہادر قاضی نے موسمیاتی تبدیلی، آفات سے نمٹنے، انجینئرنگ اور بحری علوم کے شعبوں میں پاکستان اور چین کے جاری مشترکہ تحقیقی کام کو اجاگر کیا۔ انہوں نے CoRiSE-NUST کے لیے وزارت کی معاونت کا ذکر کرتے ہوئے مشترکہ چیلنجز سے نمٹنے میں سائنسی تعاون کی اہمیت پر زور دیا۔چینی وفد کے سربراہ پروفیسر ڈونگ چیو نے کہا کہ دیرپا سائنسی شراکت داریوں کے لیے دونوں ممالک کے عوام اور محققین کے درمیان براہِ راست روابط اہم ہیں۔ انہوں نے سمپوزیم کو باہمی تبادلے اور مستقبل میں مشترکہ تحقیق کے لیے ایک اہم موقع قرار دیا۔اس موقع پر نسٹ کے پرو ریکٹر اکیڈمکس ڈاکٹر عثمان حسن نے کہا کہ پاکستان کی نوجوان آبادی میں غیر معمولی صلاحیت موجود ہے اور ملک کی 60 فیصد سے زائد آبادی 30 سال سے کم عمر افراد پر مشتمل ہے۔ انہوں نے نسٹ کو ملک بھر سے باصلاحیت نوجوانوں کو یکجا کرنے والی قومی جامعہ قرار دیتے ہوئے پاکستانی نوجوانوں کو چین کی سائنسی مہارت سے منسلک کرنے کے لیے مشترکہ تحقیق اور تعلیمی تبادلے کے مواقع تلاش کرنے کی ضرورت پر زور دیا۔کورائز کی قیادت ڈاکٹر عثمان لیاقت کر رہے ہیں، جو نسٹ کے اسکول آف کیمیکل اینڈ میٹریلز انجینئرنگ میں شعب میٹریلز انجینئرنگ کے سربراہ بھی ہیں۔ یہ مرکز جدید میٹریلز کے شعبے میں تحقیق اور جدت کے فروغ کے لیے کام کرتا ہے۔