ارفع کریم ٹاور میں سندھ پولیس کے 33 زیر تربیت ڈی ایس پیز کیلئے 2 روزہ آئی ٹی تربیتی سیشن

لاہور (کرائم رپورٹر) پنجاب انفارمیشن ٹیکنالوجی بورڈ کی جانب سے ارفع کریم ٹاورمیں سندھ پولیس کے 33زیر ِ تربیت ڈپٹی سپرنٹنڈنٹس آف پولیس کیلئے دو روزہ آئی ٹی تربیتی سیشن منعقد کیا گیا۔ تربیتی پروگرام کے دوران شرکا کو امن و امان کے شعبے میں پی آئی ٹی بی کے ٹیکنالوجی پر مبنی اقدامات، بالخصوص اے آئی کے استعمال اور انٹیگریٹڈ کریمنل جسٹس سسٹم کے بارے میں آگاہی فراہم کی گئی۔ سیشنز میں جدید ڈیجیٹل ٹیکنالوجی کے ذریعے پولیسنگ کو موثربنانے، متعلقہ اداروں کے درمیان رابطہ بہتر بنانے اور جسٹس سسٹم کے مختلف مراحل کو مزید فعال بنانے پر روشنی ڈالی گئی۔ پی آئی ٹی بی ڈائریکٹر جنرل آئی ٹی سید قاسم افضال، ڈائریکٹر پراجیکٹ مینجمنٹ جمال احمد اور جوائنٹ ڈائریکٹر سلمان علی خان نے سیشنز میں شرکت کی اور افسران کو پی آئی ٹی بی کے ڈیجیٹل اقدامات اور جدید قانون نافذ کرنے کے نظام میں ان اقدامات کے عملی استعمال سے متعلق آگاہ کیا۔ اس حوالے سے پی آئی ٹی بی چیئرمین فیصل یوسف نے کہا کہ جدید ٹیکنالوجی قانون نافذ کرنے والے اداروں کی استعداد کار بڑھانے، باہمی رابطہ بہتر بنانے اور عوامی خدمات کی فراہمی کو موثربنانے میں اہم کردار ادا کرتی ہے۔ انہوں نے مزید کہا کہ ایسے تربیتی پروگراموں کے ذریعے پی آئی ٹی بی اپنے ڈیجیٹل گورننس کے تجربات دیگر صوبوں کے ساتھ شیئر کرنے اور بین الصوبائی تعاون کو فروغ دینے کیلئے ہمہ وقت کوشاں ہے، تاکہ پولیسنگ کے نظام کو مزید موثر، شفاف اور عوامی ضروریات سے ہم آہنگ بنایا جا سکے۔ یہ اقدام سرکاری اداروں کی پیشہ ورانہ استعداد کار بڑھانے، صوبوں کے درمیان ٹیکنیکل مہارتوں کے تبادلے اور قانون نافذ کرنے والے اداروں سمیت کریمینل جسٹس میں ڈیجیٹل انقلاب کے فروغ کیلئے پی آئی ٹی بی کے عزم کی عکاسی کرتا ہے۔