راولپنڈی(سٹی رپورٹر)کمشنر راولپنڈی ڈویژن و ڈائریکٹر جنرل آر ڈی اے سلمان غنی کی ہدایات پر آر ڈی اے کانفرنس روم میں ادارے کے منصوبوں سے متعلق سکیورٹی معاملات اور مالیاتی امور کا جائزہ لینے کے لیے اجلاس منعقد ہوا۔ اجلاس کی صدارت ایڈیشنل ڈائریکٹر جنرل آر ڈی اے مسعود احمد بخاری نے کی۔ اجلاس میں مالیاتی ریکارڈ کو بہتر بنانے، مالیاتی امور میں شفافیت یقینی بنانے اور ترقیاتی منصوبوں سے متعلق سکیورٹی ڈپازٹس اور دیگر فیسوں کی نگرانی و ریکنسیلی ایشن کے نظام کو مثر بنانے پر غور کیا گیا۔ اجلاس میں فیصلہ کیا گیا کہ آئندہ آر ڈی اے کے منصوبوں سے متعلق سکیورٹی ڈپازٹس اور دیگر فیسوں کی ریکنسیلی ایشن ہر ماہ باقاعدگی سے کی جائے گی، تاکہ مالیاتی ریکارڈ کی درستگی یقینی بنائی جا سکے، کسی بھی قسم کے فرق کی بروقت نشاندہی ہو اور تمام متعلقہ مالیاتی لین دین کی مثر نگرانی کی جا سکے۔ ایڈیشنل ڈی جی آر ڈی اے مسعود احمد بخاری نے ہدایت کی کہ منصوبوں سے متعلق سکیورٹی ڈپازٹس، فیسوں اور دیگر مالیاتی لین دین کا مکمل اور تازہ ترین ریکارڈ مرتب رکھا جائے۔ انہوں نے متعلقہ افسران کو ہدایت کی کہ تمام اندراجات کو مقررہ قواعد و ضوابط کے مطابق باقاعدگی سے ریکارڈ، تصدیق اور ریکنسیل کیا جائے۔ انہوں نے زور دیا کہ ماہانہ ریکنسیلی ایشن سے مالیاتی نظم و ضبط، انتظامی کارکردگی اور ترقیاتی منصوبوں کے انتظام و نفاذ میں جوابدہی کو بہتر بنایا جا سکتا ہے۔ متعلقہ شعبوں کو ہدایت کی گئی کہ ریکارڈ کی بروقت جانچ پڑتال اور کسی بھی قسم کے فرق کو دور کرنے کے لیے باہمی رابطے اور تعاون کو یقینی بنائیں۔ اجلاس میں مالیاتی ریکارڈ کو منظم انداز میں مرتب رکھنے کی ضرورت پر بھی زور دیا گیا، تاکہ ضرورت پڑنے پر اسے جائزے، تصدیق اور آڈٹ کے لیے فوری طور پر پیش کیا جا سکے۔ متعلقہ افسران کو فیصلوں پر سختی سے عملدرآمد یقینی بنانے اور ماہانہ ریکنسیلی ایشن کو معمول کا حصہ بنانے کی ہدایت کی گئی۔ اجلاس میں ڈائریکٹر ایڈمنسٹریشن نوشین اسرار، ڈائریکٹر انجینئرنگ محمد انور باران، ڈائریکٹر فنانس مسعود ارشد اور دیگر متعلقہ افسران نے شرکت کی۔
