واہ کینٹ ( نمائندہ خبریں )سابق امیدوار صوبائی اسمبلی ملک شاہد نواز گجر نے میڈیا سے گفتگو کرتے ہوئے حکومتی پالیسیوں، فضول خرچیوں اور عوامی مسائل پر شدید برہمی کا اظہار کرتے ہوئے کہا ہے کہ موجودہ ن لیگی حکومت اپنی عیاشیوں اور شاہانہ اخراجات کے لئے بیرونی ممالک سے قرضے لے کر ملک پر مہنگائی کا بوجھ بڑھا رہی ہے ملک شاہد نواز گجر نے کہا کہ حکومت بیرونی ممالک اور عالمی اداروں سے عوام کے نام پر کھربوں ڈالر لے کرخود ہڑپ کر جاتی ہے اور محض ایک ارب روپے عوام کی فلاح پر لگا کر دن رات اشتہار بازی اور ڈھنڈورا پیٹنا شروع کر دیتی ہے جو غربت کی چکی میں پسی ہوئی عوام کے ساتھ مذاق ہے انہوں نے مطالبہ کیا کہ حکومت کابینہ، وزرا اور مشیروں کی فوج میں فورا کمی کرے اور سرکاری افسران، وزرا اور ان کے وفود کے ہمراہ ان کی فیملیز کے بیرونی دوروں پر سرکاری خزانے سے ہونے والے اخراجات پر مکمل پابندی عائد کی جائے انہوں نے کہا کہ حکومت قرضوں اور ان پر اربوں ڈالر کے سالانہ سود کی ادائیگی کے لئے عوام کی گردنیں کاٹنا بند کرے بجلی و سوئی گیس کے ظالمانہ بلوں، اشیائے خوردونوش پر جی ایس ٹی اور موٹروے و جی ٹی روڈ پر ماہانہ اربوں روپے کے ٹول ٹیکس نے پہلے ہی عام شہری کا جینا دو بھر کر دیا ہے حکومت کا ریلیف کا دعوی جھوٹ کا پلندہ ہے مفت تعلیم و صحت کی سہولیات فراہم کرنا ریاست کا فرض ہے جس میں یہ حکومت مکمل ناکام ہو چکی ہے
