اسلام آباد میں جے یو آئی اور حکومت کے درمیان محاذ آرائی شدت اختیار کر گئی

اسلام آباد(سٹاف رپورٹر) جمعیت علمائے اسلام (ف)اور وفاقی حکومت کے درمیان جاری سیاسی محاذ آرائی شدت اختیار کر گئی ہے، وفاقی دارالحکومت میں سیاسی درجہ حرارت انتہائی بلند ہو گیا ہے، ایک جانب حکومتی رہنماں اور جمعیت علمائے اسلام(ف)کے سربراہ مولانا فضل الرحمان کے درمیان بیان بازی کا سلسلہ شدت اختیار کر چکا ہے، تو دوسری جانب مولانا فضل الرحمان کی جانب سے ریاستی اداروں پر بھی کھل کر تنقید کی جا رہی ہے۔ سیاسی کشیدگی کے اسی ماحول میں نیب راولپنڈی، وفاقی تحقیقاتی ادارے اور دیگر متعلقہ اداروں کی جانب سے جمعیت علمائے اسلام (ف) کے متعدد اہم رہنماں اور مولانا فضل الرحمان سے مبینہ طور پر منسلک املاک کے معاملات پر نوٹسز جاری کرتے ہوئے مختلف پہلوں سے کارروائی شروع کر دی گئی ہے۔ نیب راولپنڈی نے جمعیت علمائے اسلام (ف) کے مرکزی رہنما اور مولانا فضل الرحمان کے صاحبزادے مفتی اسعد محمود کو ان کے دورِ وزارتِ مواصلات کے دوران ہونے والی سرکاری بھرتیوں سے متعلق تفصیلات طلب کرنے کے لیے نوٹس جاری کر دیا ہے۔ مفتی اسد محمود 2021-22 کے دوران وفاقی وزیر مواصلات رہے تھے۔ نیب کی جانب سے ان کے دورِ وزارت میں ہونے والی بھرتیوں اور مبینہ بے ضابطگیوں کے معاملے کو تحقیقات کا حصہ بنایا گیا ہے۔ذرائع کا کہنا ہے کہ نوٹس میں وزارت کے ماتحت اداروں میں بھرتیوں کے طریقہ کار، منظور شدہ آسامیوں اور اصل میں کی جانے والی تعیناتیوں سے متعلق تفصیلات طلب کی گئی ہیں۔ ابتدائی معلومات کے مطابق تقریبا تین ہزار آسامیوں کے لیے بھرتیوں کی اجازت دی گئی تھی، تاہم نیب کے سامنے آنے والے اعدادوشمار کے مطابق چار ہزار سے زائد بھرتیوں کا معاملہ بھی تحقیقات کے دائرے میں آ گیا ہے۔ نیب نے اس حوالے سے وضاحت اور متعلقہ ریکارڈ طلب کرتے ہوئے یہ جاننے کی کوشش شروع کر دی ہے کہ منظور شدہ آسامیوں کے مقابلے میں اتنی بڑی تعداد میں بھرتیاں کس طریقہ کار کے تحت کی گئیں اور ان تعیناتیوں کی منظوری کس سطح پر دی گئی۔دوسری جانب وفاقی تحقیقاتی ادارے (ایف آئی اے) نے بھی اسی سلسلے میں کارروائی کرتے ہوئے مفتی اسد محمود کو نوٹس جاری کر کے جواب طلب کر لیا ہے۔ ادارے کی جانب سے متعلقہ معاملات پر وضاحت اور ریکارڈ حاصل کرنے کا عمل شروع کیے جانے کی اطلاعات ہیں۔جمعیت علمائے اسلام (ف) کے سینیٹر کامران مرتضی بھی مختلف اداروں کے نوٹسز کے معاملے پر توجہ کا مرکز بن گئے ہیں۔ سینیٹر کامران مرتضی کے خلاف ایف آئی اے اور وفاقی بورڈ آف ریونیو کی جانب سے متعدد نوٹسز سامنے آنے کے بعد انہوں نے اپنے مقف میں واضح کیا ہے کہ انہوں نے نہ کوئی منی لانڈرنگ کی ہے اور نہ ہی کسی قسم کی بے ضابطگی میں ملوث ہیں۔ ان کا کہنا ہے کہ وہ اس معاملے پر ایف آئی اے کے سامنے ضرور پیش ہوں گے اور اپنا جواب جمع کروائیں گے۔ کامران مرتضی نے الزامات کی تردید کرتے ہوئے قانونی تقاضے پورے کرنے کا عندیہ دیا ہے۔ادھر وفاقی دارالحکومت میں مولانا فضل الرحمان سے مبینہ طور پر منسوب ایک رہائشی جائیداد کا معاملہ بھی سامنے آ گیا ہے۔ ذرائع کے مطابق سیکٹر جی فور، مکان نمبر، اسٹریٹ نمبر 83 کے مبینہ مالک امان اللہ کو بھی متعلقہ اداروں کی جانب سے نوٹس جاری کرتے ہوئے ذاتی حیثیت میں طلب کیا گیا ہے اور جائیداد سے متعلق مختلف امور پر جواب طلب کیا گیا ہے۔ اس معاملے میں کیپیٹل ڈیولپمنٹ اتھارٹی اور ایف آئی اے کی جانب سے کارروائی کی اطلاعات ہیں، تاہم جائیداد کی ملکیت، اس سے متعلق قانونی دستاویزات اور مولانا فضل الرحمان سے اس کے مبینہ تعلق کے حوالے سے حتمی حقائق سامنے آنا باقی ہیں۔سیاسی حلقوں میں ان کارروائیوں کو جمعیت علمائے اسلام (ف) اور حکومت کے درمیان بڑھتی ہوئی کشیدگی کے تناظر میں دیکھا جا رہا ہے۔ ایک طرف مولانا فضل الرحمان حکومت کی پالیسیوں اور ریاستی اداروں کے کردار پر سخت تنقید کر رہے ہیں، جبکہ دوسری طرف ان کی جماعت کے اہم رہنماں کے خلاف مختلف اداروں کی جانب سے نوٹسز اور تحقیقات کا آغاز سیاسی ماحول کو مزید گرم کر رہا ہے۔اہم سوال یہ ہے کہ آیا ان کارروائیوں کا دائرہ صرف متعلقہ بھرتیوں، مالی معاملات اور جائیداد سے متعلق تحقیقات تک محدود رہے گا یا آنے والے دنوں میں جمعیت علمائے اسلام (ف) کی مزید اہم شخصیات بھی اداروں کے سامنے جواب دہ ہوں گی۔ دوسری جانب جے یو آئی (ف) کی قیادت ان کارروائیوں کو کس نظر سے دیکھتی ہے اور کیا اس معاملے پر مولانا فضل الرحمان کی جانب سے حکومت کے خلاف مزید سخت سیاسی ردعمل سامنے آئے گا، یہ آنے والے دنوں میں اسلام آباد کی سیاست کا اہم ترین موضوع بن سکتا ہے۔