24 گھنٹے ڈیوٹی ‘ روبوٹس کی کارکردگی کا پول کھول دیا’ 6میں سے 2 ناکام

بیجنگ (این این آئی )چین میں 6 ہیومینائیڈ روبوٹس 24 گھنٹے تک شنگھائی کے ایک سپر اسٹور میں کام کرنے کے تجربے میں شریک ہوئے جن میں سے 4 روبوٹس نے تسلی بخش کارکردگی دکھائی جبکہ 2 اپنی ذمے داریاں پوری کرنے میں ناکام رہے۔چینی کمپنی ایجی بوٹ کی جانب سے روبوٹس کبھی چھٹی نہیں کرتے کے عنوان سے کیے گئے اس تجربے کا مقصد یہ جانچنا تھا کہ روبوٹس دن اور رات کے مختلف اوقات میں دکان کے معمول کے کام کتنی مہارت سے انجام دے سکتے ہیں۔تجربے کے دوران 6 روبوٹس نے مجموعی طور پر 1,730 کام مکمل کیے جن میں 683 صارفین کا استقبال، 369 اشیا نکالنے اور پہنچانے کے کام، 147 مرتبہ کافی کی تیاری، 126 گرم کھانوں کے آرڈرز، 277 شیلفس کی جانچ اور اشیا دوبارہ رکھنے جبکہ 128 میزوں کی صفائی کے کام شامل تھے۔تجربے میں دوپہر کے رش، شام کے اوقات، رات کی ڈیوٹی اور صبح ناشتے کے وقت روبوٹس کی کارکردگی کا جائزہ لیا گیا۔صفائی پر مامور ایک روبوٹ راستے میں بھرا ہوا کوڑا دان دیکھ کر اپنے مقررہ راستے سے ہٹ کر دکان سے باہر نکل گیا اور واپس اپنی جگہ نہ پہنچ سکا۔دوسرا روبوٹ شیلفس کی نگرانی اور اشیا دوبارہ رکھنے کی ذمے داری پوری کرنے میں ناکام رہا اور دکان میں اشیا کی فروخت کی رفتار کے مطابق کام نہ کر سکا۔