حق نواز روڈ باغبانپورہ مسمار کی گئی 50 دکانیں دوبارہ تعمیر ذمہ د ران کی مبینہ ملی بھگت پر سوالات اٹھ رہے

لاہور (محمد کامران سے) ایڈمنسٹریٹر میٹرو پولیٹن کارپوریشن و ڈپٹی کمشنر لاہور محمد علی اعجاز کی ہدایت پر تقریبا آٹھ ماہ قبل شالامار زون کے علاقے حق نواز روڈ باغبانپورہ میں بغیر منظور شدہ نقشہ اور بغیر کمرشلائزیشن تعمیر کی جانے والی تقریبا50 غیر قانونی دکانوں کو آپریشن کے دوران مسمار کر دیا گیا تھا۔ تاہم اب یہ تمام دکانیں دوبارہ مکمل طور پر تعمیر ہو چکی ہیں جبکہ ان پر دوسری منزل کی تعمیر بھی آخری مراحل پر ہے۔ ذرائع کے مطابق اس تعمیرِ نو میں متعلقہ افسران کی مبینہ غفلت یا ملی بھگت کے سنگین الزامات سامنے آرہے ہیں۔ بتایا جاتا ہے کہ سابق بلڈنگ انسپکٹر سلیم، موجودہ بلڈنگ انسپکٹر عمران ارشاد، زونل آفیسر میڈم قراة العین اور میٹرو پولیٹن آفیسر پلاننگ ڈاکٹر رائے امتیاز حسین کی مبینہ رضامندی سے یہ غیر قانونی تعمیرات دوبارہ مکمل کروائی گئیں۔ ذرائع کا مزید کہنا ہے کہ ڈپٹی کمشنر لاہور محمد علی اعجاز کی منظوری یا اجازت کے بغیر دوبارہ تعمیرات مکمل کر دی گئیں جس میں بلڈنگ بائی لاز کی خلاف ورزی ہوئی۔ شہری حلقوں نے سوال اٹھایا ہے کہ اگر غیر قانونی تعمیرات کو مسمار کرنے کے باوجود وہ دوبارہ اسی جگہ تعمیر ہو جائیں تو ایسے آپریشنز کا مقصد کیا رہ جاتا ہے؟ عوام کا کہنا ہے کہ اگر ذمہ دار افسران کے خلاف کارروائی نہ کی گئی تو غیر قانونی تعمیرات کے خلاف مہم کی شفافیت اور مثریت پر مزید سوالات جنم لیں گے۔ شہریوں نے وزیراعلی پنجاب، سیکرٹری لوکل گورنمنٹ، کمشنر لاہور اور ڈپٹی کمشنر لاہور سے مطالبہ کیا ہے کہ اس معاملے کی غیر جانبدارانہ تحقیقات کروا کر اگر کسی بھی سرکاری اہلکار کی غفلت یا ملی بھگت ثابت ہو تو اس کے خلاف سخت محکمانہ اور قانونی کارروائی عمل میں لائی جائے تاکہ قومی خزانے کے نقصان کا ازالہ ہو اور آئندہ ایسی بے ضابطگیوں کی روک تھام یقینی بنائی جا سکے۔