لاہور(اپنے سٹاف رپورٹر سے) وزیراعلیٰ پنجاب مریم نواز شریف نے وی آئی پی دورے کے باعث امتحان ملتوی کرنے کی کوشش پر ڈپٹی کمشنر جہلم میر رضا کو عہدے سے ہٹا دیا، اس حوالے سے نوٹیفکیشن بھی جاری کر دیا گیا۔وزیراعلیٰ مریم نواز شریف نے اپنے ٹویٹ میں جاری کردہ ہدایات کی خلاف ورزی پر سخت برہمی کا اظہار کرتے ہوئے کہا کہ کسی بھی دورے کے دوران عوام بالخصوص طلبہ کو پریشانی کا سامنا نہیں ہونا چاہیے۔مریم نواز شریف کا کہنا تھا کہ ڈی سی جہلم میر رضا نے ہدایات کی واضح خلاف ورزی کی۔ ڈی سی جہلم نے وی وی آئی پی دورے کو جواز بنا کر کمپیوٹر سائنس کا ضمنی امتحان ملتوی کرنے کی کوشش کی تھی۔وزیراعلیٰ نے واضح کیا کہ سرکاری دوروں کی وجہ سے طلبہ کی تعلیمی سرگرمیاں متاثر نہیں ہونی چاہئیں۔دریں اثناء وزیراعلیٰ پنجاب مریم نواز نے اپنے دورے کے دوران کوئی بھی مارکیٹ یا دکان بند نہ کرانے کی ہدایات جاری کردیں۔وزیراعلیٰ کی جانب سے تمام آر پی اوز، ڈی پی اوز، کمشنرز اور ڈپٹی کمشنرز کو دوبارہ ہدایات جاری کر دی گئیں جس میں کہا گیا ہے کہ وزیراعلیٰ کے دورے کے باعث کسی مارکیٹ، دکان یا کاروبار کو بند نہ کیا جائے، وزیراعلیٰ کا دورہ کسی کاروباری سرگرمی کی بندش کا سبب نہیں بننا چاہیے۔ مراسلے میں کہا گیا ہے کہ کسی رہائشی گلی کو بند یا سیل نہ کیا جائے، سکیورٹی کے نام پر شہریوں کی آمدورفت پر پابندی عائد نہ کی جائے، تمام سکیورٹی انتظامات خفیہ اور عوام کیلئے غیر محسوس رکھے جائیں، سکیورٹی انتظامات کے باعث عوام کو کسی قسم کی پریشانی یا مشکلات کا سامنا نہ کرنا پڑے۔مزید کہا گیا ہے کہ احکامات پر من و عن عمل درآمد یقینی بنایا جائے، احکامات کی خلاف ورزی پر سخت کارروائی کی جائے گی۔قبل ازیں وزیراعلیٰ پنجاب مریم نواز شریف نے دیوالی کے تہوار پر پاکستان سمیت دنیا بھر میں آباد ہندو برادری کو مبارکباد دیتے ہوئے وطن عزیز کی ترقی و خوشحالی میں ان کے کردار کو خراج تحسین پیش کیا ہے۔اپنے بیان میں وزیراعلیٰ مریم نواز شریف کا کہنا تھا کہ دیوالی کا دیپ محبت کی جوت جگاتا ہے، ہندو بہن بھائیوں سمیت تمام اقلیتوں کے حقوق کے تحفظ اور انہیں زندگی کے ہر شعبے میں جائز حصہ دینے کیلئے پرعزم ہیں۔انہوں نے کہا کہ پاکستان ایک خوبصورت گلدستہ ہے جہاں مختلف مذاہب سے تعلق رکھنے والے افراد بھائی چارے اور باہمی احترام کے ساتھ رہتے ہیں، قائداعظم محمد علی جناح کے افکار کی روشنی میں اقلیتوں کی آزادی اور حقوق کے تحفظ کے عزم کا اعادہ کرتے ہیں۔ان کا کہنا تھا کہ پنجاب میں تیزی سے ایسے معاشرے کی جانب بڑھ رہے ہیں جہاں محبت، رواداری اور باہمی احترام ہماری پہچان ہوں گے، ہندو برادری سمیت تمام اقلیتیں پاکستان کے دلکش رنگ ہیں اور ان رنگوں کو کبھی ماند نہیں پڑنے دیں گے۔وزیراعلی نے کہا کہ پنجاب میں اقلیتی برادریوں کی مالی معاونت کیلئے خصوصی مینارٹی کارڈ متعارف کرایا گیا ہے جبکہ محفوظ پنجاب ویژن کے تحت مینارٹی ورچوئل پولیس سٹیشن بھی قائم کئے گئے ہیں۔مریم نواز کا مزید کہنا تھا کہ پنجاب کو پہلا سکھ میرج ایکٹ منظور کرنے کا اعزاز حاصل ہوا جبکہ زیر التوا ہندو میرج ایکٹ 2017کی منظوری بھی دی گئی ہے، اقلیتوں کے حقوق کا تحفظ اور انہیں مساوی مواقع فراہم کرنا حکومت کی ترجیحات میں شامل ہے۔علاوہ ازیں بلوچستان میں شہریوں کے تحفظ اور جرائم کی روک تھام کے لیے 9شہروں میں سیف سٹی منصوبوں پر کام جاری ہے تاہم ان منصوبوں کو موثر اور مکمل طور پر فعال بنانے کے لیے اب پنجاب سے معاونت حاصل کی جائے گی۔اس سلسلے میں وزیراعلیٰ بلوچستان میر سرفراز بگٹی اور وزیراعلیٰ پنجاب مریم نواز شریف کے درمیان سیف سٹی منصوبوں کی تکمیل، جدید ٹیکنالوجی کے استعمال اور ادارہ جاتی تعاون پر اتفاق ہوا ہے۔وزیراعلیٰ بلوچستان کے مراسلے پر وزیراعلی پنجاب نے متعلقہ حکام کو بلوچستان سیف سٹی اتھارٹی کو مضبوط بنانے اور ضروری تکنیکی و ادارہ جاتی معاونت فراہم کرنے کی ہدایات جاری کردی ہیں۔دونوں صوبوں کی سیف سٹی اتھارٹیز کے درمیان مشترکہ منصوبے کے تحت سکیورٹی مانیٹرنگ، عملے کی تربیت اور تجربات کے تبادلے کے لیے بھی ایک نظام وضع کیا جائے گا۔اس سلسلے میں وزیراعلیٰ بلوچستان میر سرفراز بگٹی کی زیر صدارت بلوچستان سیف سٹی اتھارٹی کا اجلاس منعقد ہوا جس میں بریفنگ کے دوران بتایا گیا کہ صوبے کے 9شہروں میں سیف سٹی منصوبوں پر کام جاری ہے جبکہ پنجاب سیف سٹی اتھارٹی بلوچستان کے عملے کی تربیت، استعداد کار میں اضافے اور جدید تکنیکی معاونت کی فراہمی میں بھی تعاون کرے گی۔وزیراعلیٰ بلوچستان میر سرفراز بگٹی نے کہا کہ سیف سٹی منصوبے محض نگرانی کا نظام نہیں بلکہ شہریوں کے جان و مال کے تحفظ کے لیے جدید سکیورٹی انفراسٹرکچر کی بنیاد ہیں۔انہوں نے متعلقہ حکام کو ہدایت کی کہ ان منصوبوں پر کام کی رفتار تیز کی جائے اور مقررہ مدت کے اندر ان کی تکمیل یقینی بنائی جائے۔
مریم نواز
