جرمن سفارت خانے میں مسلح افواج کے قیام کی سالگرہ پر پروقار تقریب

اسلام آباد(نامہ نگار خصوصی)جرمنی کی مسلح افواج(بنڈس ویئر) کے قیام کی سالگرہ کے موقع پر
اسلام آباد میں جرمن سفارت خانے کے ملٹری اتاشی اسٹاف کے زیر اہتمام ایک پروقار تقریب کا انعقاد کیا گیا، جس میں پاکستانی مسلح افواج کے نمائندوں، مختلف ممالک کے ملٹری اتاشیز، دفاعی و سکیورٹی امور کے ماہرین، صحافیوں اور دیگر اہم شخصیات نے شرکت کی۔ تقریب میں جرمنی اور پاکستان کے درمیان دفاعی روابط، باہمی تعاون اور پیشہ ورانہ تعلقات کے حوالے سے تبادلہ خیال کیا گیا۔تقریب میں میونخ کی بنڈس ویئر یونیورسٹی میں بین الاقوامی سیاست کے پروفیسر ڈاکٹر کارلو ماسالا نے مہمان خصوصی اور مقرر کی حیثیت سے شرکت کی۔ انہوں نے اپنے استقبالیہ خطاب کے ذریعے تقریب کا باقاعدہ آغاز کیا۔ اس موقع پر مختلف ممالک کے سفارتی اور دفاعی نمائندوں کی موجودگی نے تقریب کو خصوصی اہمیت دی، جبکہ شرکا کو دفاعی امور اور عالمی سیاسی صورتحال پر غیر رسمی تبادلہ خیال کا موقع بھی فراہم کیا گیا۔تقریب کے دوران جرمنی کی سفیر اینا لیپل نے دو مستحق فوجی اہلکاروں کو جرمن مسلح افواج کا اعزازی تمغہ پیش کیا۔ اس موقع پر ان فوجی اہلکاروں کی خدمات کو سراہا گیا اور ان کی پیشہ ورانہ کارکردگی کو خراجِ تحسین پیش کیا گیا۔تقریب کا سب سے اہم اور جذباتی مرحلہ مختلف ممالک کے ان فوجیوں کی یاد میں منعقدہ خصوصی خراجِ عقیدت تھا جنہوں نے دورانِ خدمت اپنی جانیں قربان کیں۔ اس موقع پر پاکستانی فوج کے سارجنٹ اسلم اور کارپورل فہیم نے جرمنی کے معروف فوجی خراجِ عقیدت کے نغمے ڈیر گوٹے کامریڈ کی پرفارمنس پیش کی، جس کے ذریعے دنیا بھر میں فرض کی ادائیگی کے دوران جانیں قربان کرنے والے فوجیوں کو یاد کیا گیا۔ اس موقع پر تقریب میں موجود شرکا نے شہدا کی قربانیوں کو خراجِ عقیدت پیش کیا۔تقریب کے دوران مختلف شعبوں سے تعلق رکھنے والی شخصیات کے درمیان خوشگوار ماحول میں ملاقاتیں اور گفتگو بھی ہوئی، جہاں دفاعی تعاون، سفارتی روابط اور عالمی امور پر خیالات کا تبادلہ کیا گیا۔ شرکا نے ایک دوسرے کے ساتھ ملاقاتوں کو باہمی تعلقات کے فروغ اور تجربات کے تبادلے کا اہم موقع قرار دیا۔واضح رہے کہ جرمنی کی مسلح افواج بنڈس ویئر کا قیام 12 نومبر 1955 کو عمل میں آیا تھا۔ ہر سال اس تاریخی دن کی مناسبت سے جرمن مسلح افواج کی خدمات، پیشہ ورانہ روایات اور ملک کے دفاع میں ان کے کردار کو یاد کیا جاتا ہے۔ اسلام آباد میں منعقدہ اس تقریب میں پاکستانی فوجی اہلکاروں کی شرکت اور جرمن فوجی خراجِ عقیدت کے نغمے کی پیشکش نے پاکستان اور جرمنی کے درمیان دفاعی و سفارتی روابط کے ایک اہم پہلو کو اجاگر کیا۔