ملتان (رپورٹ:رفاقت انجم) دوران سروس وفات پانے والے سرکاری ملازمین کے ورثاء کو
یکمشت معاوضہ ادائیگیوں کے ترمیمی پیکیج پر عملدرآمد ہوگیا۔وفاقی حکومت (سٹیبلشمنٹ ڈویژن) کے جاری کردہ نوٹیفکیشن کے تحت اکاؤنٹس دفاتر کی جانب سے ستمبر تا اکتوبر ان سروس ڈیتھ تیار کئے جا رہے یکمشت معاوضہ کیسز کے لئے وزیراعظم اسسٹنس پیکیج میں نمایاں تبدیلیوں کا انکشاف ہوا ہے جس پر اکاؤنٹس دفاتر کی جانب سے باقاعدہ اطلاق کردیا گیا۔ 28 اگست 2026 کے بعد وفات پانے والے سرکاری ملازمین کو نئے تبدیل شدہ اسسٹنس پیکیج 2026 کے تحت معاوضوں کی ادائیگیوں کے کیسز تیار کئے جارہے ہیں۔ نئے نافذالعمل اسسٹنس پیکیج میں دورانِ سروس عام وفات پر خاندان کے کسی فرد کو ملنے والی سرکاری نوکری کی مستقل سہولت کو ختم کر کے مالی مراعات کے ڈھانچے کو تبدیل کیا گیا ہے۔ عام قدرتی وفات کی صورت میں گریڈ کے حساب سے درج ذیل معاوضہ مقرر کیا گیا ہے۔بنیادی پے سکیل (BPS) گریڈ 1 تا 4، 6 لاکھ روپے۔گریڈ 5 تا 10،9 لاکھ روپے،گریڈ 11 تا 15،12 لاکھ روپے،گریڈ 16 اور 17 ملازمین کا یکمشت معاوضہ 15 لاکھ روپے مقرر کیا گیا ہے۔گریڈ 18 اور 19کے لئے 24 لاکھ روپے،گریڈ 20 اور اس سے اوپر کے اعلیٰ افسران کا یکمشت معاوضہ 30 لاکھ روپے مقرر کیا گیا ہے۔دہشت گردی، بم دھماکے یا سکیورٹی ڈیوٹی کے دوران شہادت کی صورت میں یہ یکمشت گرانٹ 1 کروڑ سے 2 کروڑ روپے تک مقرر کی گئی ہے۔شہید ملازمین کے ذمے واجب الادا سرکاری ایڈوانسز (مثلاً گھر یا گاڑی کے لیے لیے گئے قرضوں) کی بقایا رقم معاف کر دی جائے گی اور یکمشت معاوضے کی رقم سے کٹوتی نہیں ہوگی۔شہید ملازمین کے لئے سرکاری پلاٹوں کا 2 فیصد کوٹہ ختم کر کے اس کی جگہ گریڈ کے مطابق 20 لاکھ سے 70 لاکھ روپے تک نقد پلاٹ گرانٹ دینے کا فیصلہ کیا گیا ہے۔شہید ملازمین کے ورثاء کو 100 فیصد فیملی پنشن ملے گی اور اگر سروس 10 سال سے کم ہو تب بھی کم از کم 10 سالہ سروس کے مطابق پنشن دی جائے گی۔ سرکاری رہائش یا کرایہ الاؤنس کی سہولت 5 سال یا ریٹائرمنٹ کی عمر تک برقرار رہے گی۔ بیوہ یا بچوں کو گریڈ 1 سے 15 تک مستقل یا کنٹریکٹ ملازمت (قواعد کے مطابق) دی جائے گی اور ایک بیٹی کی شادی کے لیے 8 لاکھ روپے خصوصی گرانٹ دی جائے گی۔
سرکاری ملازمین
