ریاض (بیورو چیف)سعودی عرب میں تعینات پاکستان کے سفیر احمد فاروق نے سعودی تاریخ، ثقافت اور تہذیبی ورثے کے عظیم مرکز "الدرعیہ” پر مبنی اپنی منفرد مصوری کی نمائش پیش کی ہے، جس کا عنوان "Diriyah: Past & Present Through the Eyes of an Ambassador” رکھا گیا ہے۔ڈپلومیٹک کوارٹر ریاض میں منعقد ہونے والی اس پروقار تقریب میں سعودی شاہی خاندان کے ممتاز رکن شہزادہ سلطان بن سلمان بن عبدالعزیز آل سعود نے بطور مہمانِ خصوصی شرکت کی۔ اس موقع پر اسلامی عسکری اتحاد کے کمانڈر جنرل (ر)راحیل شریف، مختلف ممالک کے سفیروں، سعودی عرب کی اہم سماجی و ثقافتی شخصیات، فنکاروں اور سفارتی افسران کی بڑی تعداد بھی موجود تھی۔تقریب سے خطاب کرتے ہوئے سفیرِ پاکستان احمد فاروق نے کہا کہ انہوں نے تین سال کی مسلسل محنت، گہری دلچسپی اور تخلیقی لگن سے اپنے ہاتھوں سے یہ فن پارے تیار کیے ہیں۔ ان کا کہنا تھا کہ اس کاوش کا مقصد الدرعیہ کے تاریخی ورثے اور سعودی عرب کے شاندار ماضی و روشن حال کے مختلف پہلوئوں کو کینوس پر خوبصورتی سے اجاگر کرنا اور دونوں برادر ممالک کے درمیان ثقافتی روابط کو مزید فروغ دینا ہے۔ مہمانِ خصوصی شہزادہ سلطان بن سلمان بن عبدالعزیز آل سعود نے نمائش میں رکھے گئے فن پاروں کا بغور مشاہدہ کیا اور سفیر احمد فاروق کی اس منفرد فنی و تخلیقی کاوش کو بے حد سراہا۔ انہوں نے کہا کہ الدرعیہ جیسے تاریخی مقام کو فنِ مصوری کے ذریعے خراجِ تحسین پیش کرنا پاکستان اور سعودی عرب کے گہرے برادرانہ اور ثقافتی تعلقات کا مظہر ہے۔ شرکاء نے بھی سفیرِ پاکستان کے فنِ مصوری اور ان کی تخلیقی صلاحیتوں کی بھرپور داد دی۔
