اسحاق ڈار کی غیر ضروری اخراجات میں مزید کمی اور انتظامی امور کی کارکردگی بہتر بنانے کی ہدایت

اسلام آباد (نیوز ایجنسیاں)نائب وزیراعظم و وزیر خارجہ سینیٹر اسحاق ڈار نے غیر ضروری اخراجات میں مزید کمی اور انتظامی امور کی کارکردگی بہتر بنانے کے لیے کوششیں جاری رکھنے کی ہدایت کرتے ہوئے کہا ہے کہ حکومت کی کفایت شعاریمہم کے مطلوبہ اہداف کے حصول کے لیے فیصلوں پر مسلسل عملدرآمد اور تمام متعلقہ اداروں کے درمیان قریبی رابطہ و ہم آہنگی ناگزیر ہے۔ نائب وزیراعظم کے آفس سے جاری بیان کے مطابق نائب وزیراعظم اسحاق ڈار کی زیر صدارت وزارت خارجہ میں بچت اور کفایت شعاری کے اضافی اقدامات پر عملدرآمد اور ان کی نگرانی کیلئے قائم کمیٹی کا اجلاس منعقد ہواجس میں مختلف وزارتوں اور ڈویژنز میں ان اقدامات پر جاری عملدرآمد اور سابقہ فیصلوں پر پیشرفت کا جائزہ لیا گیا۔اجلاس میں سرکاری اخراجات کے موثر انتظام، قومی وسائل کے تحفظ اور غیر ضروری اخراجات میں کمی کے حوالے سے جاری کوششوں پر غور کیا گیا۔اس موقع پر نائب وزیراعظم و وزیر خارجہ اسحاق ڈار نے اس امر پر زور دیا کہ حکومت کی کفایت شعاری مہم کے مطلوبہ اہداف کے حصول کے لیے فیصلوں پر مسلسل عملدرآمد اور تمام متعلقہ اداروں کے درمیان قریبی رابطہ و ہم آہنگی ناگزیر ہے۔انہوں نے غیر ضروری اخراجات میں مزید کمی اور انتظامی امور کی کارکردگی بہتر بنانے کے لیے کوششیں جاری رکھنے کی ہدایت کرتے ہوئے کہا کہ ان اقدامات کو دیرپا بچت میں تبدیل کرنا تمام متعلقہ اداروں کی مشترکہ ذمہ داری ہے۔اجلاس میں وزیر برائے انفارمیشن ٹیکنالوجی و ٹیلی کمیونیکیشن، وزیراعظم کے معاون خصوصی طارق باجوہ، کابینہ، قانون و انصاف، اطلاعات و نشریات اور وفاقی تعلیم و پیشہ ورانہ تربیت کے سیکٹری صاحبان کے علاوہ چاروں صوبوں، آزاد کشمیر، گلگت بلتستان اور متعلقہ وزارتوں کے سینئر نمائندوں نے شرکت کی۔دریں اثناء نائب وزیراعظم و وزیر خارجہ سینیٹر اسحاق ڈار نے ازبکستان کے وزیر خارجہ بختیار سعیدوف سے ٹیلی فون پر رابطہ کیا، جس میں آئندہ کثیرالجہتی اجلاسوں، بالخصوص اسلام آباد میں ہونے والے اقتصادی تعاون تنظیم کے وزرائے خارجہ اجلاس کے حوالے سے تبادلہ خیال کیا گیا۔ترجمان دفتر خارجہ کے مطابق دونوں رہنمائوں نے پاکستان اور ازبکستان کے درمیان دوطرفہ تعاون مزید مضبوط بنانے اور کثیرالجہتی فورمز پر باہمی رابطہ کاری بڑھانے کے عزم کا اعادہ کیا۔دفتر خارجہ کے مطابق گفتگو کے دوران آئندہ مشترکہ سفارتی مصروفیات اور علاقائی و بین الاقوامی سطح پر تعاون کے امکانات بھی زیرِ غور آئے۔اس موقع پر پاکستان اور ازبکستان کے درمیان مختلف شعبوں میں تعاون بڑھانے کے عزم کا اظہار کیا گیا۔
اسحق ڈار