دوسرا بین الاقوامی مقابلہ حسن قرت 24 سے 26 نومبر اسلام آباد میں ہوگا

اسلام آباد (آئی این پی) دوسرا بین الاقوامی مقابلہ حسن قرات 24 سے 26 نومبر اسلام آباد میں ہوگا، مقابلے کے لئے 31 ممالک سے ممتاز قرا کرام کی نامزدگیاں موصول ہوگئیں ہیں۔ تفصیل کے مطابق وفاقی وزارتِ مذہبی امور و بین المذاہب ہم آہنگی کے زیرِ اہتمام دوسرے بین الاقوامی مقابلہ حسنِ قرت کی تیاریاں حتمی مرحلے میں داخل ہو گئی ہیں۔ یہ عالمی مقابلہ 24 سے 26 نومبر تک اسلام آباد میں منعقد ہوگا۔ ترجمان وزارتِ مذہبی امور کی جانب سے جاری کردہ بیان میں کہا گیا کہ اس بین الاقوامی مقابلے میں شرکت کے لئے دنیا کے 31 ممالک سے ممتاز قرا کرام کی نامزدگیاں موصول ہوچکی ہیں اور تمام غیرملکی مہمانوں کے ویزوں کا اجراء بھی مکمل کرلیا گیا ہے۔ مقابلے میں منصفین کے فرائض انجام دینے کیلئے مصر اور ایران کے ممتاز قرا کرام خصوصی طور پر شرکت کریں گے، جبکہ پاکستان کی نمائندگی ملک کے معروف اور بین الاقوامی شہرت یافتہ قاری سید صداقت علی کریں گے۔ ترجمان کے مطابق مہمانوں کی آمد، رہائش اور ایونٹ کے انعقاد کے حوالے سے تمام سفری اور انتظامی انتظامات کو حتمی شکل دے دی گئی ہے۔