عوام کی جیبوں پر ایک اور خاموش مگر کاری وار سامنے آ گیا

اسلام آباد (لیڈی رپورٹر )مہنگائی کے طوفان میں گھرے عوام کی جیبوں پر ایک اور خاموش مگر کاری وار سامنے آ گیا۔ وفاقی حکومت نے رواں مالی سال کے تین ماہ کے دوران پیٹرولیم مصنوعات پر لیوی اور ٹیکسوں کی مد میں 404 ارب 8 کروڑ روپے کی ریکارڈ رقم وصول کر لی ہے۔وزارت خزانہ کی دستاویزات کے مطابق اس عرصے میں پٹرولیم
لیوی کی مد میں 382 ارب روپے جبکہ کاربن لیوی کی مد میں 22 ارب روپے عوام سے وصول کیے گئے۔دستاویزات کے مطابق شہری اس وقت فی لیٹر پٹرول کی خریداری پر تقریبا 106 روپے براہِ راست حکومتی ٹیکس ادا کر رہے ہیں، جس میں پٹرولیم لیوی، کاربن لیوی اور کسٹمز ڈیوٹی شامل ہے۔ ملکی تاریخ میں پہلی بار ابتدائی تین ماہ میں ایندھن پر ٹیکس لگا کر اتنی بڑی رقم اکٹھی کی گئی ہے۔دوسری جانب عالمی بینک کی رپورٹ اور عوامی سروے میں بھی مہنگائی پر شدید بے چینی ظاہر کی گئی ہے۔ شہریوں کی اکثریت کا کہنا ہے کہ ایندھن مہنگا ہونے سے ٹرانسپورٹ کے کرائے 30 فیصد تک بڑھ چکے ہیں اور انہیں کوئی عملی ریلیف نہیں مل رہا۔اس حوالے سے ایک نجی ملازم کا کہنا تھا کہ "ہماری تنخواہیں رکی ہوئی ہیں لیکن پٹرول پر بھاری ٹیکسوں نے گھر کا چولہا جلانا مشکل بنا دیا ہے۔”تاجر رہنما نے کہا کہ "ایندھن پر ٹیکسوں سے مال برداری مہنگی اور کاروبار ٹھپ ہو گئے ہیں۔”جبکہ ٹرانسپورٹ ایسوسی ایشن کے عہدیدار کے مطابق "فی لیٹر 100 روپے سے زائد ٹیکس وصولی سراسر ظلم ہے، جس سے کرایوں میں اضافہ مجبوری بن چکا ہے۔”شہریوں اور تاجروں نے حکومت سے پرزور مطالبہ کیا ہے کہ خزانہ بھرنے کے لیے غریب عوام کا گلا نہ گھونٹا جائے اور پٹرولیم لیوی میں فوری کمی کر کے عملی ریلیف دیا جائے۔