صنعا(این این آئی)یمن کی حوثی عسکریت پسند تنظیم نے بحیرہ احمر کے شمالی حصے میں گشت پر
مامور امریکی بحریہ کے ایک تباہ کن جنگی جہاز اور اس کے ساتھ چلنے والے سپلائی جہاز پر متعدد بیلسٹک میزائلوں اور دھماکہ خیز ڈرونز سے حملہ کرنے کا باضابطہ دعوی کیا۔ حوثی عسکری ترجمان بریگیڈیئر جنرل یحیی سریع نے ٹیلی ویژن پر جاری کردہ بیان میں کہا کہ یہ کارروائی غزہ اور لبنان میں جاری اسرائیلی جارحیت اور یمن پر ہونے والے فضائی حملوں کے جواب میں کی گئی جس میں میزائلوں نے اپنے اہداف کو کامیابی سے نشانہ بنایا۔ عسکری ترجمان کا مزید کہنا تھا کہ جب تک فلسطینی عوام کے خلاف محاصرہ اور بمباری ختم نہیں ہوتی اس وقت تک بحیرہ احمر اور بحیرہ عرب میں دشمن ممالک کے جنگی اور تجارتی جہازوں کے خلاف عسکری آپریشن مزید شدت کے ساتھ جاری رہیں گے۔ دوسری جانب خطے میں موجود مغربی دفاعی ذرائع نے دعوی کیا کہ فضائی دفاعی نظام نے سمندر کی جانب آنے والے بیشتر میزائلوں کو فضا میں ہی ناکارہ بنا دیا اور کسی جنگی جہاز کو بڑا نقصان نہیں پہنچا۔
امریکی جنگی بحری جہاز
