کراچی(آئی این پی)کراچی سمیت سندھ بھر میں گندم کا بحران شدت اختیار کرنے کا خدشہ ظاہر کیا گیا ہے، جس پر فلور ملز ایسوسی ایشن نے شدید تشویش کا اظہار کرتے ہوئے خطرے کی گھنٹی بجا دی ۔چیئرمین فلار ملز ایسوسی ایشن ملک اقبال کے مطابق اگر فوری طور پر اقدامات نہ کیے گئے تو صورتحال مزید خراب ہو سکتی ہے۔ سندھ حکومت کی جانب سے گندم ریلیز کرنے کا اعلان کیے ہوئے ایک ماہ گزر چکا ہے، لیکن اس کے باوجود فلار ملز کو ایک دانہ بھی فراہم نہیں کیا گیا۔ملک اقبال نے انکشاف کیا ہے کہ سرکاری کوٹہ صرف کاغذوں تک محدود ہے جبکہ فلار ملز گندم کے لئے خالی ہاتھ بیٹھی ہیں۔ گندم نہ ملنے کے باعث کوٹری اور جامشورو سمیت اندرونِ سندھ کی متعدد فلار ملز پہلے ہی بند ہو چکی ہیں، اور خدشہ ہے کہ اگر یہی صورتحال رہی تو کراچی کی فلار ملز کے پہیے بھی رک جائیں گے اور مارکیٹ سے آٹا مکمل طور پر غائب ہو سکتا ہے۔ایسوسی ایشن کے مطابق، اوپن مارکیٹ میں گندم کی شدید قلت پیدا ہو چکی ہے اور فلار ملز کی یومیہ ضرورت پوری نہیں ہو رہی، جس کی وجہ سے سندھ میں گندم کی طلب اور رسد کا فرق خطرناک حد تک بڑھ گیا ہے۔دوسری جانب کراچی میں درآمدی گندم سے متعلق کچھ اقدامات بھی سامنے آئے ہیں، جن کے تحت کراچی پورٹ سے ایک فلار مل کو پانچ ہزار بوری گندم کے چالان جاری کیے گئے ہیں اور فلار ملز کو کراچی پورٹ سے براہِ راست گندم اٹھانے کی اجازت دی گئی ہے۔ایسوسی ایشن کا کہنا ہے کہ درآمدی گندم کا نیا جہاز 15 سے 20 روز میں کراچی پہنچ سکتا ہے۔ عالمی مارکیٹ میں گندم سستی ہے لیکن پاکستان میں نجی درآمد پر فی کلو لاگت تقریبا 100 روپے آنے کا تخمینہ ہے۔فلار ملز ایسوسی ایشن نے سندھ حکومت کو خط لکھ کر مطالبہ کیا ہے کہ بحران سے بچنے کے لیے فلار ملز کو فوری طور پر ایک ملین ٹن گندم فراہم کی جائے، بصورت دیگر آنے والے مہینوں میں سپلائی مزید کم ہونے سے آٹا مارکیٹ سے ناپید ہو جائے گا۔
