کرائسٹ چرچ(ویب ڈیسک) یاسر شاہ ٹیسٹ کیریئر میں پہلی بار وکٹ کو ترستے رہ گئے، مسلسل سات سیریز کے ابتدائی معرکے میں پاکستان کے ناقابل شکست رہنے کا سلسلہ تھم گیا، کولن ڈی گرینڈہوم ڈیبیو پر مین آف دی میچ اعزاز حاصل کرنے والے چوتھے کیوی پلیئر بن گئے۔نیوزی لینڈ کے خلاف کرائسٹ چرچ میں کھیلا جانے والا پہلا ٹیسٹ پاکستانی لیگ اسپنر یاسر شاہ کیلئے بھی انتہائی مایوس کن ثابت ہوا جس میں وہ ایک وکٹ بھی نہیں لے سکے، یہ ان کے کیریئرکا پہلا ایسا مقابلہ ہے جس میں وہ مکمل طور پر خالی ہاتھ رہے۔انھوں نے اس میں صرف 13.3 اوورز کرائے جبکہ اس سے قبل ان کی اوسط 55 اوورز فی ٹیسٹ تھی۔ اس سیریز سے قبل کھیلی گئی گذشتہ سات ٹیسٹ سیریز کے دوران پاکستان ٹیم ایک بار بھی پہلا ٹیسٹ نہیں ہاری تھی، اس طرح یہ سلسلہ اب ختم ہوگیا ہے، آخری بار سیریز کے پہلے ٹیسٹ میں گرین کیپس کو 2014 میں سری لنکا کے خلاف شکست ہوئی تھی۔ اس کے بعد وہ سات سیریز میں سے پانچ کے ابتدائی میچز میں فاتح رہے جبکہ دو ڈرا ہوئے تھے۔یہ دوسرا موقع ہے جب پاکستان کو نیوزی لینڈ کے ہاتھوں مسلسل دوسرے ٹیسٹ میں ناکامی کامنہ دیکھنا پڑا ہے، اس سے قبل کھیلے جانے والے آخری مقابلے میں پاکستان ٹیم کو شارجہ میں 2014-15 میں شکست کا سامنا کرنا پڑا تھا۔اس سے قبل گرین کیپس کو کیویز کے ہاتھوں مسلسل دو ٹیسٹ میچز میں شکست 1984-85 کی سیریز کے دوران آکلینڈ اور ڈونیڈن میں ہوئی تھی، یہ وہ آخری سیریز تھی جس میں گرین کیپس کو آخری بار نیوزی لینڈ کے ہاتھوں مات ہوئی تھی۔یہ پہلا موقع ہے جب نیوزی لینڈ میں کسی ٹیم کی ابتدائی تین اننگز کی تمام 30 وکٹیں فاسٹ بولرز نے اڑائی ہیں، ماضی میں ایسا 7 مرتبہ ہوا جب30 میں سے 29 وکٹیں فاسٹ بولرزکے نام رہیں۔اس ٹیسٹ میں جیت راول نے مجموعی طور پر 4 کیچز تھامے جوکہ ڈیبیو پرکسی بھی نان وکٹ کیپر کیوی پلیئر کے کیچز کی سب سے زیادہ تعداد ہے، اس سے قبل نیوزی لینڈ کے تین پلیئرز ڈیبیو پر تین تین کیچز تھام چکے ہیں۔کولن ڈیگرینڈہوم ٹیسٹ ڈیبیو پر مین آف دی میچ ایوارڈ حاصل کرنے والے چوتھے کیوی پلیئر بنے ہیں، ان سے قبل اسٹیفن فلیمنگ، میتھیو سنکلیئر اور مارک کریگ یہ اعزاز حاصل کرچکے ہیں، مجموعی طور پر پاکستان کے خلاف ڈیبیو پر اس سے قبل مین آف دی میچ کا اعزاز آر پی سنگھ اورکائل ایبٹ نے بھی حاصل کیا ہے۔

لندن (ویب ڈیسک)برطانوی ٹینس سٹار اینڈی مرے نے پانچ مرتبہ کے چیمپیئن نوواک جوکووچ کو اپنے پہلے اے ٹی پی ورلڈ ٹوور فائنلز میں شکست دے کر ٹائٹل اپنے نام کرنے کے ساتھ ساتھ سال 2016 کا اختتام بطور عالمی نمبر ایک کر دیا ہے۔لندن کے او2 ارینا میں انتہائی بے چینی سے انتظار کیے جانے والے اس فائنل میچ میں اینڈی مرے نے نوواک جوکووچ کو چھ، تین اور چھ، چار سے شکست دی۔اینڈی مرے نے اس موقع پر کہا کہ میچ جیتنے پر بہت خوش ہوں اور عالمی نمبر ایک ہونا میرے لیے بہت خاص ہے۔ اس قسم کے میچ میں نوواک جوکووچ کے خلاف کھیلنا بہت زبردست ہے۔اس کے ساتھ ہی نوواک جوکووچ کا ٹینس سٹار راجر فیڈرر کا لگاتار چھ بار اے ٹی پی ورلڈ ٹوور فائنلز جیتنے کا سفر بھت ختم ہوگیا۔ وہ اس سے قبل لگاتار چار بار یہ اعزاز جیت چکے ہیں۔نوواک جوکووچ اور اینڈی مرے کے درمیان کھیلے جانے والے گذشتہ 34 میچوں میں مرے دس میچ جیت چکے ہیں۔ اینڈی مرے کا کہنا ہے کہ ہم اس سے قبل گرینڈ سلیم فائنلز اور اولپمک میں آمنے سامنے ہو چکے ہیں لیکن میں اس جیت پر بہت خوش ہوں۔اینڈی مرے نے مزید کہا کہ یہ وہ لمحہ ہے جس کا میں نے کبھی تصور نہیں کیا تھا۔سترہ ہزار شائقین سے بھرے ٹینس کورٹ میں یہ میچ ٹینس مقابلے سے زیادہ ہیوی ویٹ باکسنگ چیمپیئن شب دکھائی دے رہا تھا اور آخر میں اینڈی مرے اس میں کامیاب رہے۔جوکوچ نے اس موقع پر کہا کہ اینڈی مرے عالمی نمبر ایک کھلاڑی ہیں اور وہ اس کے حقدار بھی ہیں، وہ بہترین کھلاڑی ہیں۔انھوں نے مزید کہا کہ فیصلہ کن لمحے پر میں کھیل میں واپس نہیں آسکا۔ میں آخر میں اچھا کھیلا لیکن وہ کافی نہیں تھا۔

لاہور(ویب ڈیسک) قومی ٹیم کے بغیرلڑے ہمت ہار جانے پر سابق کرکٹرز بھی تشویش میں مبتلا ہیں، عالمی نمبر 2 ٹیم کی ساکھ کو بڑا دھچکا لگا، تکنیکی خامیاں اپنی جگہ لیکن کھلاڑیوں پر عجیب سی گھبراہٹ طاری تھی، بیٹسمین کے کریز پر طویل قیام کا کوئی مقصد ہونا چاہیے، بولرز بھی مواقع ملنے کے باوجود دباﺅ برقرار نہیں رکھ سکے،پاکستان ٹیم نیوزی لینڈ میں مشکلات کا شکار ہوگئی تھی، وارم اپ میچ نہ ملنے کا بھی مہمان ٹیم کو نقصان ہوا،کیوی ٹریکس پر باﺅنسر کو کھیلنے کیلئے وقت نہیں ملتا،پاکستانی ٹیم کو اچھے آل راﺅنڈر کی ضرورت ہے ،محمد نواز امیدوں کا مرکز تھے ،بیٹنگ اور باﺅلنگ میں متاثر نہیں کرسکے ۔ ان خیالات کا اظہارا رمیر راجہ ،وسیم اکرم ،محمدیوسف و دیگر سابق کرکٹرزپہلے ٹیسٹ میں شکست کے بعدکیا ۔ انہوںنے کہا کہ کرائسٹ چرچ ٹیسٹ میں پاکستان کے بغیرلڑے ہمت ہارجانے پر سابق کرکٹرز بھی تشویش میں مبتلا ہوگئے ہیں۔ رمیزراجہ نے کہا کہ عالمی نمبر 2 ٹیم کی ساکھ کو بہت بڑا دھچکا لگا ہے، تکنیکی خامیاں اپنی جگہ کھلاڑیوں پر عجیب سی گھبراہٹ طاری تھی، نیوزی لینڈ اور آسٹریلیا کی پچز پر مثبت کرکٹ کھیلنا پڑتی ہے،گرین کیپس کی کارکردگی میں یہ بات کہیں نظر نہیں آئی۔اظہرعلی سمیت اگر کسی بیٹسمین نے کریز پر طویل عرصہ قیام کیا تو اس کا کوئی مقصد ہونا چاہیے تھا، ٹیل اینڈرز بھی ہمارے سب سے زیادہ کمزور ہیں، ٹاپ آرڈرکی کمی کوپورا کرنے کیلئے تھوڑی مزاحمت کی بھی صلاحیت نہیں رکھتے، دوسری جانب ہمارے بولرز کی کارکردگی بھی توقعات کے مطابق نہیں، پہلی اننگز میں کیویز دبا ﺅمیں آگئے تھے توان کو150رنز بھی نہیں بنانا چاہیے تھے لیکن تساہل پسندی سے میزبان لوئرآرڈرکوتیزی سے رنزبنانے کا موقع فراہم کردیا گیا، دوسری اننگز میں فائٹ کرسکتے تھے لیکن بالکل ہی دبا ﺅنہیں ڈال سکے۔وسیم اکرم نے کہا کہ پاکستان ٹیم نیوزی لینڈ میں مشکلات کا شکار ہوگی، یہ سب جانتے تھے، وارم اپ میچ نہ ملنے کا بھی مہمان ٹیم کو نقصان ہوا، پریکٹس کا موقع مل جاتا تو شاید کرائسٹ چرچ کی پہلی اننگزمیں کارکردگی بہتر ہوتی، ایسی پچ پر اسٹرائیک تبدیل کرتے ہوئے رنز بنانے کی بھی ضرورت ہوتی ہے لیکن ہمارے کھلاڑی اس قدرگھبرائے ہوئے تھے کہ کئی کریز پر رکنے کے باوجود اسکور بورڈ متحرک نہیں رکھ سکے، بیٹسمینوں کی تکنیک کا مسئلہ ہے، ان پچز پر انھیں سنگلز ڈبلز لینے میں بھی دشواری ہوگی۔کیوی ٹریکس پر باﺅنسر کو کھیلنے کیلئے وقت نہیں ملتا، بیٹسمین کو بڑی چابکدستی کا مظاہرہ کرنا پڑتا ہے، بابر اعظم بھی ایسی ہی اٹھتی ہوئی گیندکا شکار ہوئے، تاہم ان میں صلاحیتیں موجود ہیں، نوجوان بیٹسمین ایک سسٹم کے تحت جونئیر لیول سے گروم ہو کر اوپر آئے ہیں، انھیں مزید موقع ملنا چاہیے، متبادل کے طور پر ہمارے پاس زیادہ آپشن بھی موجود نہیں ہے، انھوں نے کہا کہ پاکستان ٹیم کو اظہرمحمود یا عبدالرزاق جیسے قابل بھروسہ آل راﺅنڈر کی ضرورت ہے، محمد نواز امیدوں کا مرکز تھے لیکن وہ بولنگ اور بیٹنگ دونوں سے زیادہ متاثر نہیں کرسکے، ہملٹن میں شیڈول اگلے میچ میں ٹیم کو مثبت انداز میں اور اپنی صلاحیتوں کے مطابق کھیلے تو کم بیک کیا جاسکتا ہے۔کھلاڑیوں کو چاہیے کہ دلیری کے ساتھ پرفارم کریں، گھبراکر کھیلے تو ہار جائیں گے۔ ایشیائی وکٹوں پر اوپننگ کرنا آسان لیکن آسٹریلیا اور نیوزی لینڈ میں ایک مشکل کام ہے امید ہے کہ قائم مقام کپتان اظہرعلی ، شرجیل خان کو بطور اوپنر موقع دے کر خود تیسرے نمبر پر بیٹنگ کیلئے آئیں گے، ان کی بہتر کارکردگی سے آغاز میں بیٹنگ پر دبا کم کرنے میں مدد ملے گی۔سابق پیسر نے یاسر شاہ کو ٹیم میں برقرار رکھنے کی حمایت کرتے ہوئے کہا کہ درست کمبی نیشن کیلئے 3پیسرز کیساتھ ایک اسپنر کا ہونا لازمی ہے، میچ پانچویں روز تک جائے تو سلو بولر کی 3یا 4 وکٹیں بازی پلٹ سکتی ہیں۔محمد یوسف نے مصباح الحق کی عدم موجودگی میں اظہرعلی کی کپتانی کے حوالے سے بات کرتے ہوئے کہا کہ کسی کھلاڑی پر ذمہ داری کا بوجھ پڑے، تب ہی اس کی صلاحیتوں کا اندازہ ہوتا ہے، ایک دن میں کسی کے انداز قیادت کے بارے میں فیصلہ نہیں کیا جاسکتا، مواقع ملنے پر ہی کارکردگی نکھرتی یا خراب ہوتی ہے، بیٹسمین کی جگہ ٹیم میں بیٹسمین ہی شامل کرنا چاہیے، دوسرے ٹیسٹ میں شرجیل خان کو بطور اوپنر آزمائے جانے کا زیادہ امکان ہے۔

لاہور (ویب ڈیسک)قومی کرکٹ ٹیم کے چیف سلیکٹر انضمام الحق نے کہا ہے کہ شاہد آفریدی اچھی پرفارم دیں ضرورت پڑنے پر ٹیم میں شامل کیا جائے گا، اسد شفیق میں جتنا ٹیلنٹ ہے اتنی پرفارمنس نہیں دی،محمد عامر بولنگ جیسی پرفارمنس نہیں دے رہے ،ہماری ٹیم کو برداشت اوراعتماد کی ضرورت ہے ،اظہر علی کو یونس خان اچھی طرح گائیڈ کرسکتے ہیں،ویوین رچرڈز اور برائن لارا پسندیدہ کھلاڑی ہیں، وسیم اکرم اور وقار یونس بہترین بولرہیں،دور حاضر میں ویرات کوہلی اور ہاشم آملہ اچھا کھیل رہے ہیں۔ان خیالا ت کا اظہار انہوںنے میڈیا سے گفتگو کرتے ہوئے کیا۔ انہوں نے کہا کہ بہتر پرفارمنس اور ٹیم میں جگہ ہونے پر کھلاڑیوں کو شامل کیاجاتاہے، اگر کوئی اچھی پرفارمنس کررہاہوگا تو اسے ضرور سلیکٹ کیا جائےگا۔ملک کی سیاست کے حوالے سے ایک سوال کے جواب میں انضمام الحق نے کہا کہ ان کا سیاست میں آنے کا کوئی ارادہ نہیں ہے۔چیف سلیکٹر کا کہنا تھا کہ ٹیلنٹ کو آرگنائز کرنے کی ضرورت ہے، بہت سارے نئے کھلاڑی فرسٹ کلاس میں اچھی پرفارمنس دے رہے ہیں، انہیں کیمپ میں بلا کر ٹریننگ دیں گے۔انہوں نے کہا کہ اسد شفیق میں جتنا ٹیلنٹ ہے اس نے اتنی پرفارمنس نہیں دی،محمد عامر کی بولنگ بہت بہترین ہے لیکن ویسی پرفارمنس نہیں دے رہا جیسی پہلے دیتا تھا، امید ہے بہت جلد اپنی پرانی پرفارمنس دے گا۔انضمام الحق نے کہا کہ مصباح کی غیر موجودگی میں ٹیم کی قیادت اظہر علی کریں گے،یونس خان انہیں اچھا گائیڈ کرسکتے ہیں،اظہر کے لیے اچھا موقع ہے کہ سینئر کھلاڑی یونس خان ٹیم میںموجود ہے۔ہماری ٹیم کو برداشت اوراعتماد کی ضرورت ہے ، ہماری اکیڈمی کے کوچز بہت زبردست ہیں،جاوید میانداد سے بہت کچھ سیکھا ہے۔انضمام الحق نے بتایا کہ عمراکمل اور احمد شہزاد کو ڈسپلن کی خلاف ورزی پر سزادی تھی، سلمان بٹ کو میں نے فرسٹ کلاس کھیلنے کی اجازت دی۔انہوں نے کہا کہ ویوین رچرڈز اور برائن لارا پسندیدہ کھلاڑی ہیں، وسیم اکرم اور وقار یونس بہترین بولر ہیں، دور حاضر میں ورات کوہلی بہت اچھا کھلاڑی ہے اور ہاشم آملہ بہت بہترین کھیلتا ہے۔چیف سلیکٹر کا کہنا تھا کہ شرجیل خان اگر کریز پر رک جائے تو اسکور کرتاہے، اچھی اوسط کی وجہ سے اسے ٹیسٹ اسکواڈ میں شامل کیا۔انضمام الحق کا کہنا تھا کہ پاکستان کرکٹ بورڈپی ایس ایل فائنل پاکستان میں کرانے کی کوشش کررہاہے،پی سی بی کے اقدامات سے پاکستان میں کرکٹ واپس لانے میں آسانی ہوگی۔انہوں نے کہا کہ جنید خان کو ویسٹ انڈیز کے خلاف سائیڈ گیم میںکپتان بنایا تھا، جنید خان کاآپریشن ہوا ہے اسے ریکور کرنے کے لیے وقت درکار ہے، ا ٓکر وہ جلد ی پرانی پرفارمنس پر آجائے۔