اسلام آباد(آن لائن) وزیراعظم نوازشریف نے کہا ہے کہ مسئلہ کشمیر پاکستان اور بھارت کے درمیان یہ بنیادی تنازعہ ہے ، برطانیہ مسئلہ کشمیر کے حل کیلئے اقوام متحدہ کی قراردادوں پر عملدرآمد کرانے کیلئے ٹھوس کردار ادا کرے، عالمی برادری مقبوضہ کشمیر میں انسانی حقوق کی خلاف ورزیوں کا نوٹس لے،پاکستان ہمسایہ ممالک کیساتھ اچھے اور دوستانہ تعلقات کی پالیسی پر عمل پیرا ہے ۔ان خیالات کا اظہار انہوں نے برطانیہ کے قومی سلامتی کے مشیر مارک لائل گرانٹ سے ملاقات کے دوران گفتگو کرتے ہوئے کیا ۔اس موقع پر دونوں رہنماﺅں نے خطے کی مجموعی امن وامان اور سیاسی صورتحال پر تبادلہ خیال کیا ، مارک لائل گرانٹ نے پاک افواج، عوام اور حکومت کی دہشت گردی کیخلاف جنگ میں قربانیوں کی تعریف کی اور ہمسایہ ممالک کے ساتھ تعلقات بہتر بنانے بارے وزیراعظم کی پالیسیوں کو سراہا ،مارک لائل گرانٹ نے آئی ایم ایف پروگرام کامیابی سے مکمل کرنے پر وزیراعظم کو مبارکباد پیش کی ۔وزیراعظم نے کہا کہ مقبوضہ کشمیر میں بھارتی افواج معصوم ونہتے کشمیریوںپر ظلم کے پہاڑ توڑ رہی ہے ، بھارتی سکیورٹی فورسز کی جانب سے پیلٹ گنوں کا استعمال کیا جارہاہے جس کے باعث سینکڑوں کشمیریوں کی بینائی چلی گئی ہے اور درجنوں دیگر اس کے استعمال سے متاثر ہوئے ۔بھارتی فوج کی بربریت سے تقریباً100سے زائد قیمتی جانیں ضائع ہوئیں۔انہوں نے کہاکہ مسئلہ کشمیر پاکستان اوربھارت کے درمیان کشیدگی کی بنیادی وجہ ہے اس کے حل سے ہی خطے میں امن کی ضمانت دی جاسکتی ہے۔ انہوں نے کہاکہ کشمیرکا کیس اقوام متحدہ کے پاس پڑا ہے اس لئے اقوام متحدہ کو کشمیریوں کی امنگوں کے مطابق مسئلہ کشمیر کوحل کرنا چاہیے کشمیریوں کو ان کے حقوق دیئے جائیں، برطانیہ کو اس سلسلے میں اپنا ٹھوس اور موثر کردار ادا کرنا ہوگا ۔وزیر اعظم نواز شریف سے وفاقی وزیر برائے مذہبی امور سردار محمد یوسف ،سیکرٹری مذہبی امور مرزا سہیل عامر اور ڈی جی حج جدہ ساجد یوسفانی نے ملاقات کی ۔وزیر اعظم نے بہترین حج انتظامات پر وفاقی وزیر اور وزارت مذہبی اموروحج ڈائریکٹوریٹ کے تمام ملازمین کی کوششوں کو سراہا۔وزیراعظم نے کہاحج انتظامات پچھلے سالوں کے مقابلے میں انتہائی موثراور احسن انداز میں سرانجام دیئے گئے،اس ضمن میں سعودی حکومت کے بھرپور تعاون کے شکر گزار ہیں۔انہوںنے کہایہ بات قابل تحسین ہے کہ حجاج کرام کو رہائشی ،سفری اورصحت کی بہترین سہولیات فراہم کی گئیں۔نواز شریف نے آئندہ کیلئے حجاج کرام کی سہولیات کو مد نظر رکھتے ہوئے مدینہ منورہ میں حج ڈائریکٹوریٹ بنانے کی منظوری دیدی ہے۔وزیر اعظم نے اسلام آباد میں موجودہ حج ٹریننگ ڈائریکٹوریٹ کو ترقی دے کر ڈائریکٹوریٹ جنرل بنانے کے احکامات بھی جاری کردیئے۔اس موقع پر وزیر اعظم نے حج کے بہترین انتظامات پر وزارت مذہبی امور اورحج ڈائریکٹوریٹ کے تمام ملازمین کیلئے چار مہینوں کی اضافی تنخواہیں دینے کے بھی احکامات جاری کیے۔

کوئٹہ (بیورو رپورٹ،مانیٹرنگ ڈیسک) سریاب کے علاقے میں واقع پولیس ٹریننگ سینٹر پر دہشت گردوں نے حملہ کردیا اور ہاسٹل میں گھس کر اندھا دھند فائرنگ کردی جس کے بعد فورسز اور دہشت گردوں کے درمیان مقابلہ جاری ہے جب کہ اس دوران اب تک 5فوجی جوانوں سمیت106 اہلکار زخمی ہوگئے۔ 4 خود کش حملہ آور مارے گئے، 280 یرغمال کیڈٹس کو بازیاب کرا لیا گیا۔ میڈیا کے مطابق کوئٹہ کے علاقے سریاب میں واقع پولیس ٹریننگ سینٹر پر نامعلوم مسلح افراد نے حملہ کردیا اور سینٹر میں گھس کر اندھا دھند فائرنگ کردی جب کہ مسلح افراد ہاسٹل کی طرف چلے گئے۔ پولیس حکام نے ٹریننگ سینٹر پر حملے کی تصدیق کرتے ہوئے بتایا کہ سینٹر پر 5 سے 6 دہشت گردوں نے حملہ کیا ہے اور فائرنگ کرتے ہوئے ہاسٹل کی جانب گئے ہیں، حملہ آور فائرنگ کرتے ہوئے سینٹر میں داخل ہوئے اور اس دوران سکیورٹی پر تعینات اہلکاروں نے بھی فائرنگ کردی جس کے بعد دو طرفہ فائرنگ کا سلسہ شروع ہوگیا۔ پولیس حکام کے مطابق ٹریننگ سینٹر کے نیو ہاسٹل پر حملہ کیا گیا ہے جہاں 200 سے 250 اہلکار زیر تربیت ہیں۔فائرنگ کی اطلاعات ملتے ہی فورسز کی بھاری نفری موقع پر پہنچ گئی اور سینٹر کو چاروں طرف سے گھیر رکھا ہے جب کہ پولیس کمانڈوز اور ایف سی کے اہلکار ٹریننگ سینٹر میں داخل ہوگئے ہیں جن کا دہشت گردوں سے مقابلہ جاری ہے۔ سکیورٹی فورسز اور دہشت گردوں کے درمیان فائرنگ کے دوران سینٹر میں زور دار دھماکا بھی ہوا ہے جس کی آواز دور دور تک سنی گئی ہے۔صوبائی حکومت نے ٹریننگ سینٹر پر فائرنگ کی اطلاع ملتے ہی شہر بھر کے اسپتالوں میں ایمرجنسی نافذ کردی ہے جب کہ شہر سے مزید پولیس کی نفری کو فوری طور پر ٹریننگ سینٹر طلب کرلیا گیا ہے۔ فورسز نے ٹریننگ سینٹر کے اطراف کے علاقوں کو بھی سیل کردیا اور علاقے میں ٹریفک کو بھی مکمل طور پر بند کردیا گیا ہے۔صوبائی حکام کے مطابق اب تک 75 زخمیوں کو سول اسپتال، سی ایم ایچ اور شیخ زید اسپتال منتقل کیا گیا ہے جن میں سے بیشتر زخمیوں کو ٹانگوں پر گولیاں لگی ہیں۔ ترجمان پاک فوج کے مطابق کوئٹہ میں پولیس ٹریننگ سینٹر کے مین ہاسٹل پر 5 سے 6 دہشت گردوں نے حملہ کیا ہے جس کے بعد فوری طور پر دہشت گردوں کے خلاف آپریشن شروع کردیا گیا ہے، ایف سی اور پاک فوج کے دستوں نے عمارت کو گھیرے میں لے کر پوزیشنیں سنبھال لی ہیں۔ وزیر داخلہ بلوچستان سرفراز بگٹی نے کہا کہ دہشت گردوں کے خلاف فوری طور پر آپریشن شروع کردیا گیا ہے اور شہر بھر کے اسپتالوں میں ایمرجنسی نافذ کرتے ہوئے ڈاکٹروں کو طلب کرلیا گیا ہے۔ وزیراعلیٰ بلوچستان نواب ثنااللہ زہری نے ٹریننگ سینٹر پر حملے کا نوٹس لیتے ہوئے آئی جی بلوچستان اور ڈی آئی جی کوئٹہ سے رابطہ کیا ہے۔ وزیراعلیٰ بلوچستان نے آئی جی پولیس کو دہشت گردوں کے خلاف بھرپورکارروائی اور زیر تربیت اہلکاروں کی حفاظت یقینی بنانے کی ہدایت کی ہے۔ وزیراعلیٰ بلوچستان نے بتایا کہ رات 11 بجے کے قریب دہشت گردوں نے ٹریننگ سینٹر پر حملہ کیا، ٹریننگ سینٹر کوئٹہ شہر سے دور دیہی علاقے میں ہے ۔ صدر، وزیراعظم، آرمی چیف، وزیرداخلہ، وزیراعلیٰ، عمران خان، بلاول بھٹو، سراج الحق نے حملے کی مذمت کرتے ہوئے افسوس کا اظہار کیا ہے۔