اسلام آباد(ویب ڈیسک)اسلام آباد میں متعدد اپوزیشن جماعتوں کے مقامی رہنماو¿ں جانب سے آل پارٹیز کانفرنس کا انعقاد کیا گیا جس میں متقفہ طور پر فیصلہ کیا گیا کہ اپوزیشن کی جانب سے 27 اکتوبر کو کوئی دھرنا نہیں ہوگا۔جمعیت علما اسلام (ف) کے رہنما مولانا مجید ہزاروی نے کانفرنس کے بعد میڈیا سے گفتگو کرتے ہوئے کہا کہ ’27 اکتوبر کو ملک بھر کی طرح اسلام آباد میں یوم یکجہتی کشمیر اور یوم سیاہ منایا جائے گا’ اور اپوزیشن پریس کلب اسلام آباد کے سامنے بڑا مظاہرہ کرے گی’۔31 اکتوبر کے منصوبے کے حوالے سے ان کا کہنا تھا کہ اس روز آزادی مارچ کے شرکا کا استقبال کیا جائے گا اور بھرپور قوت کا مظاہرہ کریں گے۔انہوں نے اپنی جماعت کے مطالبہ دہراتے ہوئے کہا کہ ‘ہم وزیراعظم عمران خان کا استعفی، نئے انتخابات کا مطالبہ کرتے ہیں’۔پاکستان مسلم لیگ (ن) کے صدر طارق فضل چوہدری نے بھی واضح کیا کہ 27 اکتوبر کو مظلوم کشمیریوں کے ساتھ مارچ مکمل طور پر پرامن ہوگا اور کوئی دھرنا نہیں دیں گے۔ان کا کہنا تھا کہ ‘اسلام آباد ہمارا شہر ہے، یہاں کے رہائشیوں کی مشکلات کا اندازہ ہم انتظامیہ سے زیادہ بہتر طریقے سے جانتے ہیں’۔پاکستان پیپلز پارٹی کے رہنما سبط حسن بخاری نے بھی 27 اکتوبر کو اس ہی طرح کی سرگرمیوں کے حوالے سے بتایا اور کہا کہا ‘ہمارا مظاہرہ پرامن ہوگا’۔آل پارٹیز کانفرنس کے شرکا نے ‘نواز شریف، مریم نواز، آصف زرداری سمیت دیگر رہنماو¿ں کی صحت کے حوالے سے بھی تشویش کا اظہار کیا’۔سبط حسن بخاری کا کہنا تھا کہ ‘ہم سلیکٹڈ حکومت سے مطالبہ کرتے ہیں آصف زرداری اور میاں نواز شریف سے کسی کو ملاقات کی اجازت دی جائے’۔31 اکتوبر کے دھرنے میں پیپلز پارٹی کی شمولیت کے حوالے سے سوال کے جواب میں ان کا کہنا تھا کہ ‘اس کا فیصلہ اپوزیشن رہنماو¿ں کی رہبر کمیٹی کرے گی جس کی حکومت مخالف مارچ پر مشاورت جاری ہے’۔واضح رہے کہ گزشتہ روز اپوزیشن کی رہبر کمیٹی نے فیصلہ کیا تھا کہ حکومت سے مذاکرات پرامن مارچ کی یقین دہانی کے بعد ہوں گے۔اجلاس کے بعد میڈیا سے گفتگو کرتے ہوئے جمعیت علما اسلام (ف) کے رہنما اکرم درانی نے کہا تھا کہ ‘حکومت نے اپوزیشن کے ساتھ رابطے کے لیے کمیٹی تشکیل دی ہے لیکن حکومت مذاکرات میں سنجیدہ نظر نہیں آرہی جبکہ غیر سنجیدگی کا ثبوت وزیر اعظم کی اپوزیشن کے بارے میں زبان ہے۔’خیال رہے کہ پاکستان مسلم لیگ (ن) اور پاکستان پیپلز پارٹی سمیت زیادہ تر اپوزیشن جماعتون نے جمعیت علما اسلام (ف) کے سربراہ مولانا فضل الرحمٰن کے 31 اکتوبر کو حکومت مخالف احتجاج کی حمایت کا اعلان کر رکھا ہے۔قبل ازیں اپوزیشن جماعتوں نے کہا تھا کہ وزیر اعظم کے استعفے سے قبل حکومت کے ساتھ مذاکرات نہیں ہوسکتے۔

لاہور (ویب ڈیسک)وزیر قانون و انصاف فروغ نسیم کا کہنا ہے کہ وفاقی کابینہ نے مفاد عامہ کے 8 قوانین کی منظوری دے دی ہے۔وفاقی کابینہ کے اجلاس کے بعد وزیر قانون فروغ نسیم نے معاون خصوصی اطلاعات ڈاکٹر فردوس عاشق اعوان کے ہمراہ میڈیا بریفنگ دیتے ہوئے بتایا کہ ‘آج پاکستان کے لیے ایک بڑا دن ہے کیونکہ کابینہ اجلاس میں مفاد عامہ کے 8 قوانین کی منظوری دی گئی ہے۔’انہوں نے کہا کہ وزیر اعظم کا وعدہ ہے کہ انصاف کا تیز ترین حصول یقینی بنایا جائے گا، یہ قوانین تیز تر انصاف کی فراہمی سے متعلق ہیں جن کے اطلاق کے لیے میڈیا کا تعاون درکار ہو گا۔ان کا کہنا تھا کہ ‘سول پروسیجر کوڈ (سی پی سی) میں ترمیم کی منظوری دی گئی ہے، یہ انگریز کا فرسودہ نظام ہے، اب دیوانی مقدمات کو بیک وقت دو بینچز میں سنا جائے گا اور ایک عدالت سے اگر حکم امتناعی ہوجائے تو دوسرا بینچ کیس سنتا رہے گا۔’فروغ نسیم نے کہا کہ ‘پرانے قوانین کے تحت صرف مقدمہ دائر کرنے میں ہی عرصہ لگ جاتا ہے، مقدمات جلد نمٹانے کے لیے جدید ٹیکنالوجی کا استعمال ناگزیر ہو چکا ہے، جدید ٹیکنالوجی کے استعمال سے وقت کی نمایاں بچت ہو گی اور مقدمات میں جدید طریقہ کار کے استعمال سے بدعنوانی میں کمی آئے گی۔’انہوں نے کہا کہ وراثتی اور دیگر سرٹیفکیٹس 15 سے 20 دنوں میں جاری کیے جائیں گے اور یہ عمل فنگر پرنٹس کے ذریعے مکمل کیا جائے گا۔ان کا کہنا تھا کہ اطلاع دینے والے کی شناخت خفیہ رکھی جائے گی اور اس سلسلے میں مکمل تحفظ یقینی بنایا جائے گا۔ وزیر قانون کا کہنا تھا کہ اگر کوئی واجبات وصول کیے گئے تو اس کا 20 فیصد اطلاع دینے والے کو دیا جائے گا۔انہوں نے کہا کہ خواتین سے متعلق مقدمات میں ان کی دادرسی کی جائے گی اور خواتین کی وراثتی جائیداد سے متعلق مقدمات بھی جلد نمٹائے جائیں گے۔میڈیا بریفنگ کے دوران وفاقی کابینہ کے دیگر فیصلوں سے آگاہ کرتے ہوئے وزیر اعظم کی معاون خصوصی برائے اطلاعات و نشریات فردوس عاشق اعوان نے کہا کہ ‘کابینہ کا اجلاس انتہائی اہم تھا جس میں کئی فیصلے کیے گئے، جبکہ مختلف وزارتوں نے عوام کی فلاح کے لیے شروع کیے گئے منصوبوں پر بریفنگ دی۔’انہوں نے کہا کہ تمام وزارتوں کو عام آدمی کی زندگی میں بہتری کے لیے اقدامات اٹھانے کی ہدایت کی گئی ہے، ان اقدامات کا مقصد حکومتی اداروں کے ذریعے لوگوں کی زندگی میں آسانی پیدا کرنا ہے۔’فردوس عاشق اعوان کا کہنا تھا کہ خسارے اور مہنگائی میں کمی کے لیے اقدامات کو اجلاس کا ایجنڈا نمبر ایک رکھا گیا تھا، مہنگائی پر قابو پانے کے لیے اسلام آباد میں پائلٹ پراجیکٹ شروع کیا جارہا ہے تاکہ کسانوں اور عوام کے درمیان براہ راست رابطہ یقینی بنایا جائے اور آڑھتیوں کا کردار ختم کیا جائے۔’ان کا کہنا تھا کہ کابینہ نے بی او ٹی کی بنیاد پر پاک فوج کے لیے سولر پاور پراجیکٹ کی منظوری دی، کم لاگت گھروں کی تعمیر کے لیے بلاسود قرضوں کی بھی منظوری دی گئی جس کے تحت ایک لاکھ سے 10 لاکھ روپے تک قرض دیا جائے گا۔انہوں نے کہا کہ بلاسود قرضہ اسکیم سے 5 سے 10 لاکھ افراد مستفید ہوں گے جبکہ قرضوں کی واپسی کے لیے ایک سے 4 سال تک وقت رکھا گیا ہے۔معاون خصوصی نے کہا کہ کابینہ اجلاس میں ٹی وی او کے بورڈ آف ڈائریکٹرز اور ایڈورٹائزمنٹ ایکٹ میں ترامیم کی منظوری بھی دی گئی۔ان کا کہنا تھا کہ کرتارپور راہداری کے حوالے سے پاکستان اور بھارت کے درمیان معاہدے کی منظوری دی گئی، وزیر اعظم 9 نومبر کو کرتارپور راہداری کا افتتاح کریں گے۔سابق وزیر اعظم نواز شریف کی صحت اور ان کی ہسپتال منتقلی سے متعلق انہوں نے کہا کہ ‘نواز شریف کو گھر سے مرغن غذائیں بھیجی جا رہی ہیں جس سے ان کی صحت متاثر ہوئی۔انہوں نے کہا کہ نواز شریف کی ہسپتال منتقلی کے وقت احتجاجی مظاہرے کیے گئے اور اپوزیشن نے وزیر اعظم کے بغض میں نواز شریف کی بیماری پر سیاست کی۔

لندن(ویب ڈیسک) سابق وزیر اعظم نواز شریف کے صاحبزادے حسین نواز نے کہا ہے کہ والد کے خون میں پلیٹلیٹس کی کمی کی ایک وجہ زہر بھی ہو سکتی ہے۔ نواز شریف کے صاحبزادے حسین نواز نے اپنی ٹوئٹ میں کہا ہے کہ طے شدہ طبی معاملہ ہے کہ نواز شریف کے خون میں پلیٹلیٹس کی کمی کی ایک وجہ زہر بھی ہو سکتی ہے۔ جو ایک یا دوسری صورت میں دیا جا رہا ہو۔ کسی کو شبے کا فائدہ نہ دیں۔ اگر نواز شریف کو کوئی نقصان پہنچا تو آپ جانتے ہیں کون لوگ اس کے ذمہ دار ہوں گے۔ نیب کو کس طرح معلوم ہوا کہ پلیٹلیٹس خون پتلا کرنے والی دوائی سے کم ہوئے؟ خون کے ٹیسٹ کی وہ رپورٹ سامنے لائی جائے جو یہ ثابت کریں؟ تاریخ گواہ ہے ایسی روش کبھی بھی کامیاب نہیں ہو سکی۔حسین نواز نے کہا کہ ہمیں حالات کے جبر کی وجہ سے بھولنا نہیں چاہیے کہ مریم نواز بھی بیمار ہیں۔ حکومت پنجاب کی طرف سے نہ تو ان تک ڈاکٹر کو رسائی دی گئی ہے نہ ان کی بیماری کے بارے میں تفصیلات سے ہی آگاہ کیا گیا ہے۔ انہیں بے وجہ قید رکھا گیا ہے۔

راولپنڈی (ویب ڈیسک)مسلم لیگ ن کے سیکریٹری جنرل احسن اقبال نے الزام عائد کیا ہے کہ سابق وزیراعظم شاہد خاقان عباسی کو اڈیالہ جیل میں سزائے موت کے مجرموں کی چکی میں رکھا گیا ہے۔مسلم لیگ ن کے سینئر نائب صدر اور سابق وزیراعظم شاہد خاقان عباسی ایل این جی ٹرمینل کیس میں نیب کی حراست میں ہیں۔سابق وزیر داخلہ اور ن لیگ کے سینئر رہنما احسن اقبال نے الزام عائد کیا ہے کہ وزیراعظم عمران خان کی ہدایت پر سابق وزیراعظم شاہد خاقان عباسی کو سزائے موت کے مجرموں کی چکی میں رکھا گیا ہے۔احسن اقبال نے مزید کہا کہ شاہد خاقان عباسی نا سزا یافتہ ہیں اور نا ہی مجرم بلکہ وہ قوم کے ہیرو ہیں جنہوں نے گیس کا بحران حل کیا۔رہنما ن لیگ نے حکومت کو تنقید کا نشانہ بناتے ہوئے مزید کہا کہ یقیناً چھوٹے لوگ بڑے عہدوں پر بیٹھ گئے ہیں۔