پاکستان میں باکسنگ کے فروغ کیلئے بڑا قدم، نیشنل باکسنگ چیمپئن شپ کا آج سے حیدر آباد سپورٹس کلب میں آغاز ہوگا۔
ایونٹ پاکستان آرمی کے زیر اہتمام اور باکسنگ فیڈریشن کے تعاون سے ہو رہا ہے، دس ٹیمیں ان ایکشن ہوں گی، دو سو سے زائد مرد اور خواتین باکسرز صلاحیتوں کے جوہر دکھائیں گے۔
واضح رہے کہ نیشنل باکسنگ چیمپئن شپ کا پرومو بھی جاری کر دیا گیا ہے۔
پولٹری مصنوعات کی قیمتوں میں اتار چڑھاؤ کا سلسلہ جاری ہے، تاہم برائلر کے نرخوں میں آج کوئی ردوبدل دیکھنے میں نہیں آیا۔
سرکاری نرخ نامے کے مطابق برائلر گوشت کی قیمت 595 روپے فی کلو مقرر ہے، جبکہ صافی گوشت شہریوں کو 690 روپے فی کلو تک فروخت کیا جا رہا ہے۔
زندہ برائلر کے نرخ بھی مستحکم رہے، فارم گیٹ پر زندہ برائلر کی قیمت 383 روپے فی کلو مقرر کی گئی ہے، جبکہ ہول سیل میں یہ 397 روپے فی کلو کے حساب سے فروخت ہو رہا ہے، پرچون بازار میں زندہ برائلر 411 روپے فی کلو مقرر ہے۔
دوسری جانب عید کے بعد سے اب تک برائلر گوشت کی قیمت میں مجموعی طور پر 84 روپے تک اضافہ ریکارڈ کیا جا چکا ہے، جس سے شہریوں کو مشکلات کا سامنا ہے۔
ادھر انڈوں کی قیمت میں بھی اضافہ دیکھنے میں آیا ہے، فی درجن انڈوں کی قیمت میں 2 روپے اضافہ ہونے کے بعد نئی قیمت 224 روپے مقرر کر دی گئی ہے، جبکہ ہول سیل مارکیٹ میں انڈوں کی پیٹی 6 ہزار 660 روپے میں فروخت ہو رہی ہے۔
پاکستان کی کوششیں کام کرگئیں،مشرق وسطیٰ میں جنگ ختم ہونے کی امیدپیدا ہوگئی۔
امریکی اخبار نے صدرٹرمپ کی جانب سے جلد ایران جنگ ختم کرنے کا دعویٰ کردیا،وال اسٹریٹ جنرل نے لکھا کہ صدر ٹرمپ آبنائے ہرمز کھولے بغیر ہی جنگ ختم کرنا چاہتے ہیں۔
امریکی اخبارنے ٹرمپ انتظامیہ کے ایک عہدیدار کے حوالے سے دعویٰ کیا کہ صدر ٹرمپ نے اپنے مشیروں کوبتا دیا کہ وہ آبنائے ہرمز کھولے بغیر ہی جنگ ختم کرنا چاہتے ہیں، آبنائے ہرمز کھولنے کا پیچیدہ آپریشن بعد میں کیا جائےگا۔
امریکی اخبار کے مطابق ٹرمپ اور ان کے معاونین نے اندازہ لگایا کہ آبنائے ہرمز کو کھولنے کا مشن اس جنگ کو 4 سے 6 ہفتوں تک آگے بڑھا دے گا۔
شہر کا مطلع جزوی ابر آلود، ٹھنڈی ہوائیں چلنے سے موسم خوشگوار ہو گیا، محکمہ موسمیات نے شہر میں 24گھنٹوں کے دوران بارش کی پیشگوئی کر دی۔
لاہور کا موجودہ درجہ حرارت 24 ڈگری سینٹی گریڈ ریکارڈ کیا گیا، 10کلومیٹرفی گھنٹہ کی رفتارسے چلنے والی ہوا میں نمی کا تناسب60 فیصد رہا، شہر کا کم سے کم درجہ حرارت 18 ڈگری سینٹی گریڈ رہنے کا امکان ہے۔
فضائی آلودگی میں کمی سے شہر کا مجموعی ایئر کوالٹی انڈیکس 96 ریکارڈ کیا گیا ہے، محکمہ موسمیات نے شہر میں 24گھنٹوں کے دوران بارش کی پیشگوئی کی ہے، محکمہ موسمیات کے مطابق آئندہ ہفتے بارشوں کا نیا سپیل ملک میں داخل ہو گا۔
اسرائیلی فوج نے تہران میں میزائل بنانے والی تنصیبات کو نشانہ بنانے کا دعویٰ کیا ہے۔
اسرائیلی فوج نے تنصیبات کو نشانہ بنانے کا دعویٰ کرتے ہوئے کہا کہ تقریباً 40 اسلحہ سازی اور تحقیقاتی مراکز پر حملے کیے ہیں۔
ادھر اصفہان میں شدید دھماکوں کی ویڈیو امریکی صدر ڈونلڈ ٹرمپ نے اپنے سوشل میڈیا اکاؤنٹ سے بھی شیئر کردی۔
اس حوالے سے امریکی اخبار کی جانب سے بتایا گیا ہے کہ 2 ہزار پاؤنڈ وزنی بم سے اسلحہ ذخائر کو نشانہ بنایا گیا۔
عالمی تیل سپلائی میں یومیہ تقریباً 11 ملین بیرل کی کمی ریکارڈ، رپورٹ
امریکی اشاعتی و نشریاتی ادارے بلوم برگ نےتیل کی قیمت 200 ڈالر فی بیرل تک جانے کا خدشہ ظاہر کردیا۔
امریکی اشاعتی و نشریاتی ادارے بلوم برگ نے ایران سے امریکا اسرائیل کی جنگ طویل ہونے کی صورت میں عالمی معیشت کو بڑا دھچکا لگنے کا انتباہ بھی کردیا،رپورٹ میں کہا گیا ہے آبنائے ہرمز کی بندش سے عالمی تیل سپلائی میں یومیہ تقریباً 11 ملین بیرل کی کمی ریکارڈ کی جا رہی ہے
رپورٹ کےمطابق یورپ میں ڈیزل کی قلت کےخطرات بڑھ گئے،عالمی مہنگائی میں اضافہ اور معیشتوں پر دباؤ تیز ہورہا ہے،کئی ممالک نے ایندھن بچانے کے اقدامات اور راشننگ شروع کردی ہے،بلوم برگ کے مطابق سعودی عرب اوریو اے ای متبادل راستوں سے سپلائی بڑھانے کیلئے کوشاں ہیں،بحران سے نمٹنے کیلئےعالمی ذخائر بھی استعمال کیےجارہےہیں لیکن یہ حل مستقل اور پائیدار حل نہیں۔
بلوم برگ رپورٹ کےمطابق ایل این جی سپلائی متاثر،گیس بحران کے خدشات بھی بڑھ گئے،کئی ممالک نے ایندھن بچانے کے اقدامات اور ریشننگ شروع کردی،طویل جنگ کی صورت میں عالمی معیشت کو بڑا جھٹکا لگنے کا خدشہ ہے، طلب کم کرنے کیلئے قیمتوں میں مزید اضافہ ناگزیر ہے۔
خیبر پختونخوا کے بالائی اضلاع میں گلیشیائی جھیلوں کے پھٹنے کا خدشہ، پی ڈی ایم اے نے متعلقہ 5 حساس اضلاع کی انتظامیہ کو الرٹ جاری کر دیا۔
پی ڈی ایم اے کے مطابق چترال اپر، چترال لوئر، دیر اپر، سوات اور کوہستان اپر میں موسمی صورتحال کے پیش نظر گلیشیئرز پگھلنے کا امکان ہے۔ شدید بارشوں کے باعث گلیشیائی جھیلوں کے پھٹنے، فلیش فلڈ اور لینڈ سلائیڈنگ جیسے واقعات کا خدشہ ہے۔
ترجمان کے مطابق پی ڈی ایم اے کی جانب سے متعلقہ ضلعی انتظامیہ کو ہنگامی اقدامات اور پیشگی تیاریوں کی ہدایات جاری کر دی گئی جبکہ ضلعی انتظامیہ کو حساس گلیشیائی مقامات کی مسلسل نگرانی اور فوری وارننگ سسٹم فعال رکھنے کی ہدایت بھی کی گئی ہے۔
اسی طرح، متعلقہ اداروں اور ضلعی انتظامیہ کو خطرے سے دوچار علاقوں میں انخلاء سے متعلق مشقیں کروانے کی ہدایت بھی کی گئی ہےجبکہ محفوظ مقامات پر انخلاء مراکز کو مکمل طور پر فعال اور سہولیات سے لیس رکھنے کی تاکید کی گئی ہے۔
پی ڈی ایم اے نے نشیبی علاقوں میں رہنے والے افراد کو فوری طور پر الرٹ رہنے اور مقامی آبادی کو ممکنہ خطرات سے پیشگی آگاہ کرنے کی ہدایت جاری کی ہے جبکہ ریسکیو اور ایمرجنسی سروسز کے عملے کو ہر وقت تیار رہنے کی ہدایت بھی کر دی گئی ہے۔
ہنگامی صورتحال سے نمٹنے کے لیے ضروری مشینری اور آلات پہلے سے تعینات کرنے جبکہ عوام کو ندی نالوں اور دریاؤں کے قریب غیر ضروری نقل و حرکت سے گریز کرنے کی ہدایت کی گئی ہے۔ تیز بہاؤ والے پانی میں گاڑیوں کے بہہ جانے کے خطرے سے متعلق عوام کو خبردار کیا گیا ہے۔
ترجمان پی ڈی ایم اے کے مطابق نشیبی علاقوں میں رہنے والوں کو اضافی احتیاطی تدابیر اختیار کرنے کی تاکید کی گئی جبکہ سیاحوں اور مسافروں کو حساس علاقوں کی جانب غیر ضروری سفر سے گریز کرنے کی ہدایت بھی کی گئی۔
سڑکوں کی بندش یا نقصان کی صورت میں این ایچ اے، ایف ڈبلیو او اور سی اینڈ ڈبلیو سے فوری رابطے جبکہ شدید خطرے کی صورت میں گلیشیائی جھیلوں کے کنٹرولڈ اخراج پر بھی نظر رکھنے کی ہدایت کی گئی۔
پی ڈی ایم اے کا ایمرجنسی آپریشن سینٹر مکمل طور پر فعال ہے عوام کسی بھی ہنگامی صورتحال میں پی ڈی ایم اے کی ہیلپ لائن 1700 پر رابطہ کریں۔
ملک بھر میں بجلی صارفین کے لیے فکسڈ چارجز کو کھپت کی بجائے لوڈ سے منسلک کرنے کے فیصلے کے بعد ماہانہ بلوں میں کئی گنا اضافہ ہو گیا ہے۔
نیشنل الیکٹرک پاور ریگولیٹری اتھارٹی (نیپرا) نے جنوری 2026 سے نافذ ہونے والے نئے ٹیرف میں فکسڈ چارجز کو لوڈ کی بنیاد پر لاگو کرنے کی منظوری دی تھی جو وفاقی حکومت کی درخواست پر دی گئی۔
اس سے قبل فکسڈ چارجز ماہانہ بجلی کی کھپت کے مطابق عائد کیے جاتے تھے اور یہ صرف اُن صارفین پر لاگو ہوتے تھے جو 300 یونٹ سے زائد بجلی استعمال کرتے تھے۔ پرانے نظام کے تحت فکسڈ چارجز کم از کم 200 روپے اور زیادہ سے زیادہ 1000 روپے تک محدود تھے۔
نئے ٹیرف کے مطابق گھریلو صارفین کے لیے فکسڈ چارجز ماہانہ فی کلوواٹ لوڈ کی بنیاد پر مقرر کیے گئے ہیں،اس نظام کے تحت لائف لائن صارفین کے علاوہ تمام گھریلو صارفین پر فکسڈ چارجز لاگو کر دیے گئے ہیں، چاہے ان کی بجلی کی کھپت کم ہی کیوں نہ ہو۔
نیپرا کی منظوری کے مطابق مختلف گھریلو سلیبز میں فکسڈ چارجز 200 روپے فی کلوواٹ سے بڑھ کر 675 روپے فی کلوواٹ ماہانہ تک مقرر کیے گئے ہیں، جس کا اطلاق پروٹیکٹڈ اور نان پروٹیکٹڈ دونوں اقسام کے صارفین پر ہوتا ہے۔
نئے فارمولے کے تحت فکسڈ چارجز کا انحصار صارف کے منظور شدہ لوڈ پر ہوگا، جس کے باعث مجموعی بل میں نمایاں اضافہ دیکھا جا رہا ہے۔ مثال کے طور پر اگر کسی صارف کا لوڈ 5 کلوواٹ ہے تو اس کے ماہانہ فکسڈ چارجز 1000 روپے سے بڑھ کر 3375 روپے تک جا سکتے ہیں۔
ماہرین کے مطابق اس تبدیلی کے بعد کم بجلی استعمال کرنے والے صارفین بھی زیادہ بل ادا کرنے پر مجبور ہو گئے ہیں، کیوں کہ اب بل کا بڑا حصہ کھپت کے بجائے لوڈ سے منسلک ہو چکا ہے۔
اس مرتبہ پاکستانی فلموں نے اچھا بزنس کیا خوشی ہے ہماری یہ فلم عوامی توقعات پر پوری اتری ہے، فہد مصطفیٰ
لاہور: پاکستان کے ناموراداکار فہد مصطفیٰ نے فلم ’’آگ لگے بستی میں‘‘ کی کامیابی کا راز بتا دیا۔
تفصیلات کے مطابق عید پر ریلیز ہونیوالی پاکستانی فلم آگ لگے بستی میں کا لاہور میں خصوصی پریمیئر شو منعقد ہوا، جس میں اداکار فہد مصطفیٰ، سہیل احمد ، عماد عرفانی، نادیہ جمیل کرکٹر احمد شہزاد اور دیگر شخصیات شریک ہوئیں۔
اس دوران میڈیا سے گفتگو کرتے ہوئے اداکار فہد مصطفیٰ نے کہا کہ اس مرتبہ پاکستانی فلموں نے اچھا بزنس کیا خوشی ہے ہماری یہ فلم عوامی توقعات پر پوری اتری ہے۔
جبکہ اس موقع پر دیگر شوبز شخصیات نے کہا آگ لگے بستی کی کہانی بہت منفرد ہے تمام اداکاروں نے انصاف کیا۔
خیال رہے کہ فلم ’’آگ لگے بستی میں‘‘ کی کاسٹ میں اداکارہ ماہرہ خان ، فہد مصطفیٰ ، ایوب کھوسو، تابش ہاشمی، جاوید شیخ اور دیگر شامل ہیں فلم نے اب تک باکس آفس پرریکارڈ بزنس کیا۔
لاہور کے لیڈی ولنگڈن ہسپتال میں ویڈیو سکینڈل کے بعد معطل کئے گئے ڈاکٹروں کی جگہ محکمہ صحت نے نئی تعیناتیاں کر دیں۔
تفصیلات کے مطابق ڈاکٹر حنا منیر بٹ کو لیڈی ولنگڈن ہسپتال میں میڈیکل سپرنٹنڈنٹ (ایم ایس) کی ذمہ داریاں سونپ دی گئی ہیں، جبکہ پروفیسر آف گائنی ڈاکٹر فرزانہ لطیف کو نواز شریف میڈیکل کالج گجرات سے لیڈی ولنگڈن ہسپتال تعینات کیا گیا ہے۔
اسی طرح سینئر رجسٹرار انستھیزیا ڈاکٹر رابعہ سرور کو سروسز ہسپتال سے، ڈاکٹر صبا قمر کو سر گنگارام ہسپتال سے اور ڈاکٹر صائقہ یاسمین کو سروسز ہسپتال سے لیڈی ولنگڈن ہسپتال تعینات کیا گیا ہے۔
محکمہ صحت کی جانب سے تعینات ہونے والے تمام ڈاکٹروں کو ہدایت جاری کی گئی ہے کہ وہ فوری طور پر اپنی نئی ذمہ داریاں سنبھالیں اور آج ہی اپنی پوسٹنگ کی جگہ پر رپورٹ کریں۔
