انگلش کرکٹ بورڈ (ای سی بی) کی جانب سے کھلاڑیوں پر پاکستان سپر لیگ (پی ایس ایل) سمیت دیگر لیگز میں شرکت پر پابندی کے باوجود کھلاڑیوں نے اپنے بورڈ کے احکامات ہوا میں اُڑا دیے۔

انگلینڈ کرکٹ بورڈ (ای سی بی) نے ڈومیسٹک سیزن کے باعث اپنے کھلاڑیوں کو پاکستان سپر لیگ سمیت دیگر فرنچائز لیگ میں شرکت پر پابندی عائد کی تھی تاہم کرکٹرز نے اپنے بورڈ کی پابندی کو پاؤں تلے روند ڈالا ہے۔

گزشتہ دنوں انگلینڈ کے فاسٹ بولر ڈیوڈ ولی، جارح مزاج اوپنر جیسن رائے کے بعد ڈیوڈ ملان اور سیم کرن نے بھی پی ایس ایل کیلئے غیرملکی ڈرافٹس باضابطہ طور پر اپنا نام درج کروایا ہے۔

انکے علاوہ دیگر ممالک کے سرکردہ کھلاڑیوں میں زمبابوے کے کپتان سکندر رضا، آسٹریلوی وکٹ کیپر ایلکس کیری، بنگلادیش کے فاسٹ بولر مستفیض الرحمان اور آل راؤنڈر شکیب الحسن شامل ہیں۔

پی سی بی اس سے قبل غیر ملکی پلئیرز ڈرافٹس میں شامل کرکٹرز میں انگلینڈ کے ڈیوڈ ولی اور آسٹریلیا کے عثمان خواجہ کے نام کی تصدیق بھی کرچکا ہے۔

خیال رہے کہ پی ایس ایل کے 10ویں ایڈیشن کیلئے پلیئرز کا ڈرافٹ 11 جنوری کو گوادر میں ہوگا۔

آسٹریلین میڈیا نے باکسنگ ڈے ٹیسٹ کے پہلے روز ڈیبیو کرنے والے اوپنر سیم کونسٹاس سے ویرات کوہلی کو بدتمیزی کرنے پر جوکر کہہ کر پُکارنا شروع کردیا۔

گزشتہ روز میلبرن میں کھیلے جارہے سیریز کے چوتھے ٹیسٹ میچ کے پہلے روز ڈیبیو کرنیوالے آسٹریلوی اوپنر سیم کونسٹاس سے الجھ پڑے تھے جس پر انہیں تنقید کا نشانہ بنایا گیا تھا۔

ٹیسٹ کے آغاز پر 19 سالہ آسٹریلوی اوپنر سیم کونسٹاس نے غیر معمولی بیٹنگ کرتے ہوئے بھارتی بولر جسپریت بمرا کی دھلائی بھی کردی تھی جس پر ہندوستانی فیلڈرز پریشان نظر آرہے تھے۔

میچ کے 10ویں اوور کے اختتام پر ویرات کوہلی اور سیم کونسٹاس کے آپس میں کندھے ٹکرا گئے جس پر دونوں کے درمیان تکرار ہوئی تاہم عثمان خواجہ اور امپائرز نے بیچ بچاؤ کروا دیا۔

واقعہ کے بعد ویرات کوہلی کو تنبیہ کرتے ہوئے میچ فیس کا صرف 20 فیصد جرمانہ اور ایک ڈیمیرٹ پوائنٹ دیا گیا۔

سوشل میڈیا پر اس واقعے کے وائرل ہونے کے بعد ویرات کوہلی کو کم از کم ایک میچ کی معطلی کے حوالے کرنے کا مطالبہ کیا جارہا ہے تاہم آسٹریلوی میڈیا نے جمعہ کی صبح کے اخبارات میں کوہلی کو ‘مسخرہ’ اور جوکر کہہ کر پُکارا جبکہ ایک تصویر میں انکے منہ میں بچے کی فیڈر بھی دیکھائی گئی۔

دی ویسٹ آسٹریلیا نامی اخبار نے ‘مسخرہ کوہلی’ کی ہیڈلائن درج کی، جس پر بھارتی سپورٹرز اور فینز بھڑک اُٹھے۔

دوسری جانب پوسٹ ڈے پریس کانفرنس میں سیم کونسٹاس نے میدان پر ویرات کوہلی کے خود سے ٹکرانے کو غلطی کہا، انکا کہنا تھا کہ میں اپنے گلفوز ایڈجسٹ کررہا تھا، اور مجھے لگتا ہے کہ وہ غلطی سے مجھے ٹکرا گئے۔

سلیکٹر کی حکم عدولی شاہین آفریدی کو مہنگی پڑگئی، پیسر کو چار روزہ میچ کھیلنے سے گریز پر ٹیسٹ اسکواڈ کا حصہ نہیں بنایا گیا۔

تفصیلات کے مطابق شاہین شاہ آفریدی کو عمدہ فارم کے باوجود جنوبی افریقا سے ٹیسٹ سیریز میں موقع نہیں دیا گیا، انھوں نے ون ڈے سیریز میں سب سے زیادہ 7 وکٹیں لے کر ٹیم کی کامیابی میں اہم کردار ادا کیا تھا۔

ذرائع کا کہنا ہے کہ شاہین کو اسکواڈ کا اعلان ہونے سے قبل ایک سلیکٹر نے فون کر کے چار روزہ میچ کھیلنے کا کہا، وہ بعض وجوہات کی بنا پر ایسا نہ کر پائے، اسے حکم عدولی سمجھتے ہوئے انھیں ٹیسٹ اسکواڈ سے ہی باہر کردیا گیا، اسی قسم کی ہدایت بابراعظم کو بھی ملی تھی جس پر انھوں نے بھی عمل نہ کیا مگر وہ ٹیم میں شامل ہوگئے۔

ذرائع کا کہنا ہے کہ ایک سلیکٹر کے رویے سے قومی کرکٹرز خوش نہیں ہیں، وہ کچھ عرصے قبل ہی ریٹائر ہوئے لیکن اپنے ساتھ کھیلنے والوں کے ساتھ ہی ان کا رویہ حکمانہ ہوتا ہے۔

قریبی ذرائع نے مزید بتایا کہ شاہین بدستور ریڈ بال کرکٹ کھیلنا چاہتے ہیں اور دورئہ جنوبی افریقا کے اسکواڈ میں عدم انتخاب پر انھیں دھچکا لگا تھا، ون ڈے میچز کے بعد واپسی سے قبل بھی انھوں نے ٹیم مینجمنٹ کو پیشکش کی تھی کہ اگر وہ چاہے تو وہ ٹیسٹ میچز کیلیے بھی رک سکتے ہیں مگر کسی نے انھیں روکنے کی زحمت گوارا نہ کی۔

جنوبی افریقا کیخلاف سنچورین ٹیسٹ میں پاکستانی ٹیم میں لیفٹ آرم فاسٹ بولر کی کمی محسوس ہوئی، میر حمزہ کو بھی چار منتخب پیسرز میں شامل نہیں کیا گیا۔

دلچسپ بات یہ ہے کہ شاہین آفریدی کو ورک لوڈ مینجمنٹ کے نام پر ٹیسٹ اسکواڈ میں منتخب نہیں کیا گیا اور بنگلادیش پریمیئر لیگ میں شرکت کی اجازت دے دی گئی، 30 دسمبر کو شروع ہونے والے ایونٹ میں وہ  فورچیون بریشال کی نمائندگی کریں گے، انھیں 15 جنوری تک کا این او سی ملا ہے، وہ 5 میچز  میں حصہ لیں گے۔