چیمپئینز ٹرافی کے حوالے سے شیڈول جاری کرنے کیلئے انٹرنیشنل کرکٹ کونسل (آئی سی سی) کو دی گئی ڈیڈ لائن کا وقت بھی گزر گیا تاہم ڈیڈلاک برقرار ہے۔

میڈیا رپورٹس کے مطابق پاکستان ٹیم بھیجنے سے بھارتی انکار اور ہائبرڈ ماڈل کے تحت ایونٹ کروانے کی کوششوں میں مصروف بھارتی بورڈ (بی سی سی آئی) بھی پاکستان کے سخت موقف میزبانی سے پیچھے نہ ہٹنے کو دیکھ حیران ہے۔

پاکستان اپنے مؤقف پر ڈٹا ہوا ہے کہ بھارت پاکستان نہیں آئے گا تو ہمیں کسی اور ملک میں کھیلنا قبول نہیں ہے البتہ بھارت کو کھلانے کی کوشش کی گئی تو دفاعی چیمپئینز نے دھمکی دی ہے کہ وہ ٹورنامنٹ سے دستبردار ہوجائیں گے۔

دوسری جانب بھارتی کرکٹ بورڈ کے سیکرٹری جے شاہ آئی سی سی ہیڈ کوارٹر دبئی پہنچ گئے ہیں۔

پاکستان کرکٹ بورڈ (پی سی بی) کے چیئرمین محسن نقوی نے بھارت سے خاموشی سے بات چیت اور درمیانی راستہ اختیار کرنے کا مشورہ ماننے سے انکار کرکے آئی سی سی حکام کو پیغام پہنچا دیا ہے کہ اگر بھارت چیمپئینز ٹرافی کھیلنے نہیں آتا تو ہماری حکومت بھی بتا چکی ہے کہ بھارت سے نہ کھیلیں اس لیے جیسے کو تیسا کی پالیسی اختیار کی جائے گی۔

انہوں نے موقف اختیار کیا ہے کہ اگر بھارت ہماری سرزمین پر کھیلنے نہ آیا تو قانون کے مطابق نویں ٹیم سری لنکا کو شامل کیا جائے تاہم مالی بحران کا شکار آئی سی سی بھارت کو ایونٹ کھلانے پر بضد ہے۔

ادھر انٹرنیشنل کرکٹ کونسل (آئی سی سی) کے نئے سربراہ جے شاہ یکم دسمبر کو چیئرمین بن جائیں گے۔ مصدقہ ذرائع کا کہنا ہے کہ اسپانسرز، بھارتی براڈ کاسٹرز اور سب سے بڑھ کر بھارتی اثر و رسوخ میں کام کرنے والی آئی سی سی فرنٹ فٹ پر آنے کو تیار نہیں ہے۔

رپورٹس میں کہا گیا ہے کہ دونوں ممالک کے غیرلچکدار موقف کے بعد آئی سی سی کا ہنگامی بورڈ اجلاس بلایا جاسکتا ہے جس میں اس معاملے پر تبادلہ خیال اور ووٹنگ کا امکان ہے۔

چوتھے بلائنڈ کرکٹ ورلڈکپ کی افتتاحی تقریب بھارت کے بغیر آج (جمعہ) کو لاہور میں سجے گی، جس میں ٹرافی کی رونمائی اور کلچرل شو بھی پیش کیا جائے گا۔

ملک میں بلائنڈ کرکٹ کے فروغ میں اہم کردار اداکرنے والی شخصیات کو لائف ٹائم اچیومنٹ ایوارڈز بھی دیے جائیں گے، افتتاحی تقریب میں تمام 6 ٹیمیں شرکت کریں گی جبکہ ورلڈکپ کا پہلا میچ ہفتے کو پاکستان اور جنوبی افریقہ کے مابین ہفتے کو کھیلا جائے گا۔

افغانستان، جنوبی افریقہ کے بعد نیپال، بنگلادیش اور سری لنکن ٹیم بھی پاکستان پہنچ گئی ہے جبکہ ایونٹ سے بھارتی ٹیم دستبردار ہوچکی ہے۔

درین اثنا پاکستان بلائنڈ کونسل کے چیئرمین سید سلطان شاہ نے ایکسپریس نیوز سے گفتگو کرتے ہوئے کہا کہ بھارتی کرکٹ ٹیم کے ورلڈکپ میں پاکستان نہ آنے سے ہمیں ایک کروڑ روپے کا نقصان ہوگا۔

انہوں نے کہا کہ ہم اگلے سال بھارت میں شیڈول ویمنز بلائنڈ ورلڈکپ کی کسی دوسرے ملک منتقلی کیلیے آواز اٹھائیں گے،ان کی ٹیم آئے یا نہیں بلائنڈ ورلڈکپ پاکستان میں ہی ہوگا۔

انھوں نے کہا کہ 2022 میں بھارت نے ویزے نہ دے کر ہمیں ایونٹ میں شرکت سے محروم کیا، اب اپنی ٹیم کو پاکستان آنے کی اجازت نہیں دی، ایسا کب تک چلے گا؟ ہم یہ معاملہ ورلڈ بلائنڈ کونسل کے اجلاس میں اٹھائیں گے۔

بھارتی فاسٹ بولر محمد شامی نے سابق کرکٹر سنجے منجریکر کی سوشل میڈیا پر کلاس لے لی۔

سابق بھارتی کرکٹر نے اپنی انسٹاگرام اسٹوری میں پیشگوئی کی تھی کہ رواں برس شیڈول انڈین پریمئیر لیگ (آئی پی ایل) ڈرافٹس میں فاسٹ بولر محمد شامی کی کم بولی لگ سکتی ہے۔

سنجے منجریکر نے کمی بولی لگنے جواز پیش کرتے ہوئے کہا تھا کہ محمد شامی سرجری کے بعد طویل ری ہیبلی ٹیشن کے بعد کھیل میں واپس لوٹ رہے ہیں تاہم انکی واپسی کو دیکھتے ہوئے فرنچائزز انکی کم بولی لگا سکتے ہیں۔

بھارتی فاسٹ بولر کو اپنے ہی ہم وطن سابق کرکٹر کی بات بلکل پسند نہ آئی اور انہوں نے جوابی وار کرتے ہوئے پوسٹ کے اسکرین شاٹس شیئر کیا اور لکھا کہ ”بابا کی جے ہو، تھوڑا گیان اپنے فیوچر کیلیے بھی بچالو کام آئے گا! سنجے جی”۔

شامی نے مداحوں کو مشورہ دیا کہ ”کسی کو اپنا فیوچر جاننا ہو تو سر سے ملے”۔