ایف آئی اے امیگریشن نے کراچی ایئرپورٹ پر بڑی کارروائی کرتے ہوئے عمرے کی آڑ میں گداگری میں ملوث خاتون کو گرفتار کرلیا۔
ترجمان ایف آئی اے کے مطابق مسافر خاتون کی شناخت گل شانہ کے نام سے ہوئی جس کو سعودی عرب سے پاکستان پہنچنے پر گرفتار کیا گیا۔ ملزمہ فلائٹ نمبر XY313 کے ذریعے کراچی ایئرپورٹ پہنچی تھی۔
گرفتار ملزمہ عمرہ ادا کرنے کی بنیادی طریقہ کار سے مکمل طور پر ناواقف تھی جبکہ ملزمہ نے سعودی عرب میں گداگری میں ملوث ہونے کا اعتراف بھی کیا۔
ابتدائی تفتیش کے مطابق ملزمہ روزانہ کی بنیاد پر 100 سعودی ریال بھیک مانگ کر اکھٹا کرتی تھی۔ ملزمہ نے بتایا کہ اس کے دیگر رشتے دار بھی سعودی عرب میں گداگری میں ملوث ہیں جبکہ ملزمہ کا خاوند بھی گداگری میں ملوث ہے جس کی معلومات حاصل کی جا رہی ہیں۔
گرفتار مسافر خاتون کو مزید قانونی کارروائی کے لیے انسدادِ انسانی اسمگلنگ سرکل کراچی منتقل کر دیا گیا ہے اور مزید تفتیش جاری ہے۔
آئی ایم ایف کی جانب سے پٹرولیم مصنوعات پر 18 فیصد ٹیکس عائد کرنے کی ہدایت کے بعد پٹرولیم مصنوعات کی قیمتوں میں اضافے کا خدشہ ہے۔
او ایم سی ذرائع کے مطابق پٹرولیم مصنوعات پر ٹیکس کا معاملہ سنگین ہوگیا ہے۔ گزشتہ دنوں وزارت پٹرولیم اور خزانہ نے دو فیصد سیلز ٹیکس عائد کرنے کی سفارش کی تھی لیکن آئی ایم ایف نے پٹرول، ڈیزل، لائٹ ڈیزل سمیت دیگر پٹرولیم مصنوعات پر 2 کے بجائے 18 فیصد ٹیکس عائد کرنے کا کہہ دیا۔
او ایم سی ذرائع کا کہنا ہے کہ پٹرولیم مصنوعات پر 2 کے بجائے 18 فیصد سیلز ٹیکس عائد ہونے سے پٹرولیم مصنوعات کی قیمتوں میں اضافہ ہوجائے گا۔
وزارت پٹرولیم اس حوالے سے وزیراعظم شہباز شریف کو تفصیلی بریفنگ دے گی۔
واضح رہے کہ آئی ایم ایف نے اس سلسلے میں صاف بتادیا ہے کہ سیلز ٹیکس 18 فیصد ہی ہوگا۔
ڈی آئی خان کی یونین کونسل مورگا اور بحرین تحصیل درزندہ میں ایک بچے اور بچی کے پولیو وائرس سے متاثر ہونے کے کیسز سامنے آئے ہیں۔
محکمہ صحت کے مطابق ڈی آئی خان کی یونین کونسل مورگا اور بحرین تحصیل درزندہ کی رہائشی 18 ماہ کی بچی اور یونین کونسل بحرین کے 36 ماہ کے بچے کے ماحولیاتی نمونے پولیو وائرس سے آلودہ پائے گئے۔
دونوں متاثرہ بچوں کے ماحولیاتی نمونے قومی ادارہ صحت اسلام آباد کو بھیجے گئے تھے، جہاں ادارہ صحت نے 21 نومبر کو متاثرہ بچوں میں پولیو وائرس کی موجودگی کی تصدیق کی ہے۔
واضح رہے کہ رواں سال ڈی آئی خان سے پولیو کا یہ پانچواں کیس ہے۔
محکمہ صحت کے مطابق صوبے میں رواں سال لکی مروت میں پولیو کے 2 کیسز، ڈی آئی خان 5، ٹانک 2، جبکہ کوہاٹ، درہ آدم خیل، نوشہرہ، مہمند ایجنسی سے ایک ایک کیس رپورٹ کیا گیا۔
رپورٹس کے مطابق رواں سال صوبہ سندھ میں پولیو کے 13 کیسز سامنے آئے، جبکہ صوبہ بلوچستان میں 24، خیبرپختوانخوا میں 13، اور پنجاب اور اسلام آباد میں ایک ایک پولیو کا کیس رپورٹ ہوا۔
پشاور میں پولیو کے حالیہ دو کیسز سامنے آنے کے بعد پاکستان میں 2024 میں پولیو کے متاثرہ کیسز کی تعداد بڑھ کر 52 ہوگئی ہے۔
قومی ٹیم کے فاسٹ بولر محمد عباس نے سابق کرکٹر اور 92 کا ورلڈکپ جتوانے والے کپتان عمران خان کا فرسٹ کلاس ریکارڈ برابر کردیا۔
فاسٹ بولر محمد عباس نے قائداعظم ٹرافی کے پانچویں راؤنڈ میں لاہور بلیوز کی جانب سے کھیلتے ہوئے فاٹا ریجن کے خلاف پہلی اننگز میں 22 اوورز میں 6 وکٹیں صرف 39 رنز دے کر حاصل کیں، جن میں 10 میڈن اوور بھی شامل تھے جبکہ دوسری اننگز میں 35 رنز کے عوض 4 وکٹیں حاصل کرکے یہ کارنامہ سرانجام دیا۔
محمد عباس فرسٹ کلاس کرکٹ میچ میں 13ویں مرتبہ 10 وکٹیں حاصل کرکے سابق کپتان اور لیجنڈری کرکٹر عمران خان کے برابر آگئے ہیں۔
ان کے علاوہ فرسٹ کلاس کرکٹ میں 13 بار ایک ٹیسٹ میچ میں 10 وکٹیں حاصل کرکے عظیم فاسٹ بولرز وسیم اکرم، وقار یونس اور عمران خان جیسے لیجنڈری کرکٹر کی فہرست میں شامل ہوگئے ہیں۔
محمد عباس فہرست میں عمران خان کے ساتھ تیسرے نمبر پر ہیں جبکہ وقار یونس 14 بار اور وسیم اکرم 16 بار 10 وکٹیں لے کر پہلے نمبر پر ہیں۔
محمد عباس رواں قائداعظم ٹرافی کے دوسرے سب سے زیادہ وکٹیں لینے والے بولر بھی ہیں، انہوں نے اب تک 31 وکٹیں حاصل کی ہیں اور ان کی اوسط 14.39 اور اکانومی ریٹ صرف 2.35 ہے۔
محمد عباس نے اس ٹورنامنٹ میں سب سے زیادہ میڈن اوورز (60) بھی کیے ہیں۔
خیال رہے محمد عباس نے پاکستان کی جانب سے آخری ٹیسٹ میچ اگست 2021 میں ویسٹ انڈیز کے خلاف کھیلا تھا۔
اسپیشل جج سینٹرل نے بانی پی ٹی آئی کے توشہ خانہ ٹو کیس میں ضمانتی مچلکے منظور کرلیے۔
توشہ خانہ ٹو کیس میں ضمانت ملنے کے بعد بانی پی ٹی آئی کی رہائی کی روبکار جاری کردی گئی، روبکار اسپیشل جج سینٹرل شاہ رخ ارجمند نے جاری کی۔
بانی پی ٹی آئی کے دس لاکھ روپے کے دو مچلکے طارق نون اور راجہ غلام سجاد نے دیے، عدالت نے بانی پی ٹی آئی کو رہا کرنے کی ہدایت دیتے ہوئے کہا کہ اگر وہ کسی اور مقدمہ میں گرفتار نہیں تو رہا کردیں۔
واضح رہے کہ اسلام آباد ہائی کورٹ کے جسٹس میاں گل حسن اورنگزیب نے بدھ کو توشہ خانہ ٹو کیس میں بانی پی ٹی آئی کی ضمانت منظور کی تھی۔
عدالت عالیہ کی جانب سے بانی پی ٹی آئی کو 10، 10 لاکھ روپے کے مچلکوں کے عوض ضمانت دی گئی تھی۔
بھارتی فاسٹ بولر محمد شامی نے سابق کرکٹر سنجے منجریکر کی سوشل میڈیا پر کلاس لے لی۔
سابق بھارتی کرکٹر نے اپنی انسٹاگرام اسٹوری میں پیشگوئی کی تھی کہ رواں برس شیڈول انڈین پریمئیر لیگ (آئی پی ایل) ڈرافٹس میں فاسٹ بولر محمد شامی کی کم بولی لگ سکتی ہے۔
سنجے منجریکر نے کمی بولی لگنے جواز پیش کرتے ہوئے کہا تھا کہ محمد شامی سرجری کے بعد طویل ری ہیبلی ٹیشن کے بعد کھیل میں واپس لوٹ رہے ہیں تاہم انکی واپسی کو دیکھتے ہوئے فرنچائزز انکی کم بولی لگا سکتے ہیں۔
بھارتی فاسٹ بولر کو اپنے ہی ہم وطن سابق کرکٹر کی بات بلکل پسند نہ آئی اور انہوں نے جوابی وار کرتے ہوئے پوسٹ کے اسکرین شاٹس شیئر کیا اور لکھا کہ ”بابا کی جے ہو، تھوڑا گیان اپنے فیوچر کیلیے بھی بچالو کام آئے گا! سنجے جی”۔
شامی نے مداحوں کو مشورہ دیا کہ ”کسی کو اپنا فیوچر جاننا ہو تو سر سے ملے”۔
چیمپئینز ٹرافی پر بھارتی ڈھٹائی سے انٹرنیشنل کرکٹ کونسل (آئی سی سی) پریشان ہے اور ٹورنامنٹ کا شیڈول اگلے ہفتے تک جاتا دکھائی دے رہا ہے۔
تفصیلات کے مطابق پاکستان میں فروری مارچ میں شیڈول چیمپئینز ٹرافی کے انعقاد میں اب 90 دن سے بھی کم کا وقت باقی رہ گیا ہے مگر ابھی تک ٹورنامنٹ کا شیڈول ہی فائنل نہیں ہوسکا۔
پاکستان ٹیم بھیجنے کے حوالے سے بھارتی ڈھٹائی سے آئی سی سی پریشان ہے، پی سی بی اس بار سخت موقف اختیار کرتے ہوئے کسی بھی صورت میں اپنی میزبانی سے پیچھے ہٹنے یا ہائبرڈ ماڈل اختیار کرنے سے انکار کرچکا ہے۔
اصولی طور پر اب تک شیڈول سامنے آجانا چاہیے تھا مگر ایسا نہیں ہوسکا، شائقین اور ٹیمیں سب ہی اندھیرے میں ہیں، حتمی تاریخوں کا علم ہے نہ ہی میزبان وینیوز کی تصدیق ہو رہی ہے، خود پاکستان کرکٹ بورڈ (پی سی بی) کو بھی اس حوالے سے کوئی علم نہیں ہے۔
آئی سی سی کی جانب سے اس معاملے پر کوئی رابطہ ہی نہیں کیا جارہا، کونسل کے ذرائع کا کہنا ہے کہ ہم چیمپئنز ٹرافی شیڈول کے حوالے سے میزبان اور شریک ممالک کے ساتھ بدستور گفت و شنید میں مصروف ہیں۔
واضح رہے کہ آئی سی سی اور پی سی بی کی جانب سے مشترکہ طور پر تیار کیا جانے والا ابتدائی شیڈول رواں برس مئی میں دیگر شریک بورڈز کے ساتھ شیئر کیا تھا، اکتوبر میں دبئی میں ہونے والی آئی سی سی بورڈ میٹنگ کے منٹس کے مطابق کسی بھی شریک ملک کی جانب سے شیڈول پر کوئی اعتراض نہیں کیا گیا، جس کے مطابق 15 میچز پاکستان کے 3 وینیوز کراچی، لاہور اور راولپنڈی میں کھیلے جانے ہیں۔
اس شیڈول کی مرکزی براڈکاسٹنگ پارٹنر نے منظوری بھی دے دی جبکہ شریک تمام ممالک کو اس کی کاپی بھیج دی گئی تھی، تب کسی بھی ممبر نے اس پر کوئی بھی اعتراض نہیں کیا تھا، ایونٹ کے حوالے سے غیر یقینی تب پیدا ہوئی جب بھارت نے زبانی کلامی آئی سی سی کو بولا کہ ان کی حکومت نے ٹیم پاکستان بھیجنے سے منع کردیا ہے، جس کے جواب میں پی سی بی نے حکومتی پالیسی کے تحت سخت موقف اختیار کرتے ہوئے واضح کیا کہ اگر بھارت اپنی ٹیم پاکستان نہیں بھیجتا تو پھر پی سی بی کسی بھی لیول پر بھارت کے ساتھ میچز کھیلنے سے انکار کردے گا۔
ذرائع کا کہنا ہے کہ اس ہفتے کے اختتام یا پھر اگلے ہفتے کے شروع میں آئی سی سی کے وفد کا پاکستان آنے کا امکان ہے، گورننگ کونسل خود کو اس گمبھیر صورتحال سے ریسکیو کرنا چاہتی ہے، اس کی جانب سے پی سی بی کو ہائبرڈ ماڈل پر منانے کی ایک کوشش ہوگی، تاحال پاکستان کی جانب سے لکھے گئے خط کا بھی آئی سی سی نے کوئی جواب نہیں دیا۔
ایک رپورٹ کے مطابق آئی سی سی اور بھارتی کرکٹ بورڈ (بی سی سی آئی) کے درمیان بھی چیمپئینز ٹرافی کے حوالے سے گزشتہ روز بات چیت ہونا تھی، اس کا واحد ایجنڈا بھارت کی ایونٹ میں شرکت تھا، اس بات چیت کا ٹورنامنٹ کی پلاننگ پر گہرا اثر پڑسکتا ہے۔
دوسری جانب پاکستان کے سابق کپتان راشد لطیف نے ایک بھارتی میڈیا آؤٹ لیٹ کیلیے کالم تحریر کیا، انھوں نے کہا کہ گائیڈلائنز کے تحت کسی بھی ملک میں ہونے والے آئی سی سی ٹورنامنٹ میں تمام ٹیموں کا شریک ہونا لازمی ہے، پاکستانی سائیڈ 2016 کے ٹی20 ورلڈکپ اور پھر گزشتہ برس ون ڈے ورلڈکپ کیلئے بھارت کا سفر کرچکی، اس لیے میں سمجھتا ہوں کہ پی سی بی کا اس بار بھارت کے ٹیم نہ بھیجنے پر سخت موقف اختیار کرنا جائز ہے، یہ کوئی باہمی سیریز نہیں بلکہ آئی سی سی ایونٹ ہے، بھارت کو اس میں شریک ہونا چاہیے۔
پاکستان کی پوزیشن بہتر ہے کیونکہ وہ اس عرصے میں 2 مرتبہ اپنی ٹیم بھارت بھیج چکا، بھارتی پوزیشن کمزور مگریہ سارا معاملہ سیاسی نوعیت کا ہے کیونکہ چند بھارتی اسٹیٹس میں الیکشن ہونے ہیں۔
راشد لطریف نے کہا کہ پاکستان کو سخت موقف اختیار کرنا چاہیے کہ اگر بھارت نے اپنی ٹیم نہیں بھیجی تو وہ بھی بھارت اپنی ٹیم نہیں بھیجے گا جسے آنے والے 7 برس میں آئی سی سی کے 3، 4 ایونٹس کی میزبانی کرنا ہے۔
پاکستان تحریک انصاف (پی ٹی آئی) کے 24 نومبر کے احتجاج کے پیش نظر اسلام آباد، خیبرپختونخوا اور پنجاب کے مختلف اضلاع میں انٹرنیٹ اور موبائل سروس جزوی معطل کرنے کا فیصلہ کیا گیا ہے۔
میڈیا رپورٹس کے مطابق 22 نومبر سے موبائل انٹرنیٹ سروس پر فائر وال ایکٹو کر دی جائے گی جس سے انٹرنیٹ کی رفتار سست ہو جائے گی اور سوشل میڈیا ایپس پر ویڈیوز اور آڈیو ڈاؤن لوڈ نہیں ہو سکیں گی۔
انٹرنیٹ اور موبائل سروس کی ممکنہ بندش پر پی ٹی آئی کے علاوہ صحافیوں اور عام شہریوں کی جانب سے بھی شدید ردعمل کا اظہار کیا جا رہا ہے۔
تاہم بعض پی ٹی آئی کارکنان نے موبائل اور انٹرنیٹ سروس کی بندش کا توڑ بھی ڈھونڈ نکالا ہے، جنہوں نے ایسی ایپلیکیشنز کی نشاندہی کی ہے جو احتجاج کے دوران آپس میں رابطے کے لیے بغیر انٹرنیٹ کے بھی کام کریں گی۔
سوشل میڈیا پلیٹ فارم ‘ایکس’ پر پی ٹی آئی کے ایک کارکن شفقت ایاز نے بتایا کہ ‘احتجاج کے دوران آپس میں رابطے کے لئے اہم ایپلیکیشن ‘Bridgefy’ ہے جو بغیر انٹرنیٹ کے کام کرے گی، یہ اپلیکیشن ایپل سٹور اور پلے سٹور دونوں پہ موجود ہے، ابھی ڈاؤن لوڈ کریں اور اپنے دوستوں کو بھی اطلاع کریں’۔
(اسکرین شاٹ: ایکس)
پی ٹی آئی مظاہرین کی مدد اور رہنمائی کیلئے پارٹی کارکنان کے علاوہ پی ٹی آئی رہنما بھی پیچھے نہ رہے۔
سابق ڈپٹی اسپیکر قومی اسمبلی و رہنما پی ٹی آئی قاسم خان سوری نے ‘ایکس’ پر اپنی پوسٹ میں بتایا کہ ‘موبائل اور انٹرنیٹ بند ہونے کی صورت میں آپ BRIAR ایپ کے ذریعے ایک دوسرے کو ٹیکسٹ میسیج کرسکتے ہیں، احتجاج پر جانے سے قبل آپ کی ٹیم یا گروپ ممبرز یہ ایپ انسٹال کر لیں اور ایک دوسرے کو ایڈ کر لیں’۔
(اسکرین شاٹ: ایکس)
انہوں نے مزید بتایا کہ ‘اس ایپ میں اکاؤنٹ بنانے کے لیے نا تو آپ کو اپنا فون نمبر دینا ہے نا ہی ای میل ایڈریس، بلکہ آپ فرضی نام استعمال کر سکتے ہیں، یہ ایپ بلوٹوتھ کے ذریعے کمیونیکیٹ کرتی ہے لہٰذا اس کی زیادہ سے زیادہ رینج 100 میٹر یا 300 فٹ ہوتی ہے’۔
اُن کا کہنا تھا کہ ‘جتنے زیادہ لوگوں کے پاس یہ ایپ ہو گی اتنی دور تک آپ کی پہنچ ہو گی، یہ ایپ صرف اینڈرائڈ کے لیے میسر ہے، آئی فون یوزرز Bridgefy ایپ استعمال کر سکتے ہیں’۔
دوسری جانب چئیرمین پاکستان ٹیلی کمیونیکیشن اتھارٹی (پی ٹی اے) میجر جنرل (ر) حفیظ الرحمٰن نے کہا ہے کہ ملک میں انٹرنیٹ سروسز معطل کرنے سے متعلق تاحال ہدایات موصول نہیں ہوئی ہیں۔
تاہم وفاقی وزیر داخلہ محسن نقوی کیجانب سے جاری ایک بیان میں کہا گیا ہے کہ موبائل فون اور انٹرنیٹ سروس بند کرنے کا فیصلہ آج (22 نومبر کو) کیا جائے گا۔
اسلام آباد کی انسداد دہشتگردی عدالت نے تھانہ آئی نائن میں درج مقدمے میں وزیراعلیٰ خیبرپختونخوا علی امین گنڈا پور کو اشتہاری قرار دے دیا۔
انسداد دہشت گردی عدالت اسلام آباد کے جج طاہر عباس سپرا نے وزیراعلیٰ خیبرپختونخوا علی امین گنڈا پور کے خلاف مقدمے کا تحریری حکم نامہ جاری کردیا۔ حکم نامے کے مطابق علی امین گنڈا پور کو اشتہاری قراردینے کے بعد کیس کے دیگر ملزمان سے الگ کردیا گیا ہے۔ ملزمان راجہ راشد حفیظ،واثق قیوم،راجہ خرم نواز،فیصل جاوید اورعمر تنویر کے ناقابل ضمانت وارنٹ گرفتاری جاری کردئیے گیے۔
تمام غیر حاضر ملزمان کے وکلاء سردار مصروف،مرتضی طوری،زاہد بشیر ڈار نے حاضری سے استثنی کی درخواست دائر کی۔ عدالت نے غیرحاضر ملزمان کی حاضری سے معافی کی درخواست مسترد کرتے ہوئے کہا کہ تمام غیرحاضر ملزمان کے ضمانتی مچلکے منسوخ کیے جاتے ہیں۔ کیس کی سماعت 28 نومبر تک ملتوی کردی گئی۔
پاکستان شوبز انڈسٹری کے معروف نوجوان اداکار احد رضا میر نے ہالی ووڈ فلم ’ریزیڈنٹ ایول‘ میں اپنے بولڈ سین کرنے پر وضاحت دے دی۔
حال ہی میں احد ایک پوڈکاسٹ شریک ہوئے جہاں انہوں نے نیٹ فلکس پروجیکٹ ’ریزیڈنٹ ایول‘ میں فلمائے گئے اپنے ایک بولڈ سین پر بات کی۔
احد رضا میر نے اعتراف کیا کہ انہیں معلوم تھا کہ اس سین پر عوام کا شدید ردعمل آئے گا۔
انہوں نے کہا کہ یہ کافی خوفناک تجربہ تھا کیونکہ مجھے اندازہ تھا کہ لوگوں کی جانب سے تنقید ہوگی۔ لیکن ہمارے ڈراموں میں تشدد، تھپڑ مارنے اور بدسلوکی کے مناظر دکھائے جاتے ہیں جنہیں بڑی تعداد میں لوگ دیکھتے ہیں اور کسی کو کوئی مسئلہ نہیں ہوتا۔
اداکار کا کہنا تھا کہ لوگوں کو مسئلہ صرف اس وقت ہوتا ہے جب ہم محبت یا قربت کے مناظر دکھاتے ہیں۔ احد نے مزید کہا کہ پاکستانی ناظرین بالی ووڈ اور ہالی ووڈ کی فلمیں دیکھنے میں کوئی عار محسوس نہیں کرتے، لیکن اپنے فنکاروں پر تنقید کرتے ہیں۔
احد رضا میر کا کہنا تھا کہ وہ بین الاقوامی سطح پر کام کر رہے ہیں اور برطانیہ میں یہ ممکن نہیں کہ وہ یہ کہیں کہ وہ کچھ مخصوص چیزیں نہیں کریں گے۔
یاد رہے کہ آصف رضا میر کے بیٹے احد رضا میر جلد ہی نئے ڈرامے ’م سے محبت‘ سے ایک مرتبہ پھر ڈراموں میں واپسی کریں گے۔
