ٹک ٹاک کے وفد نے حکومت کو یقین دہانی کرائی ہے کہ ٹک ٹاک پر زیادہ سے زیادہ معیاری اور سود مند مواد کو یقینی بنایا جائے گا، ٹک ٹاک وزارت آئی ٹی کے ذیلی اداروں کے ساتھ مل کر کام کرنا چاہتا ہے۔

اس بات کی یقین دہانی ٹک ٹاک کے وفد نے وزیر مملکت برائے آئی ٹی و ٹیلی کمیونی کیشن شزہ فاطمہ خواجہ سے ملاقات میں کہی۔ وفد کی قیادت ٹک ٹاک کے ڈائریکٹر پبلک پالیسی مسٹر ایمر گیلنکی نے کی۔

ملاقات میں باہمی دلچسپی کے امور اور سوشل میڈیا پر معیاری مواد کے حوالے سے گفتگو ہوئی۔ اس موقع پر سیکریٹری آئی ٹی ضرار ہاشم خان بھی موجود تھے وفد نے وزیر مملکت آئی ٹی کو ٹک ٹاک کے پاکستان میں اقدام اور مستقبل کے پروگرامز کے بارے میں بریف کیا۔

وزیر مملکت شزہ فاطمہ نے کہا کہ پاکستان میں ٹک ٹاک کے بہت زیادہ صارفین ہیں یہ بہت ضروری ہے کہ سوشل میڈیا پلیٹ فارمز پر معیاری مواد میسر ہو، چاہتے ہیں کہ پاکستان میں ٹک ٹاک پلیٹ فارم تعلیمی مقاصد کے لیے بھی استعمال ہو، اس کے ذریعے مختلف قسم کی اسکلز اور لوکل زبانوں میں بنیادی تعلیم دی جا سکتی ہے۔

ٹک ٹاک کے ڈائریکٹر پبلک پالیسی مسٹر ایمر گیلنکی کی قیادت میں آئے وفد نے حکومت کو یقین دہانی کرائی کہ ٹک ٹاک پر زیادہ سے زیادہ معیاری اور سود مند مواد کو یقینی بنایا جائے گا۔ وفد نے کہا کہ ٹک ٹاک وزارت آئی ٹی کے ذیلی اداروں کے ساتھ مل کر کام کرنا چاہتا ہے۔

وفاقی وزیر اطلاعات عطاء اللہ تارڑ کا کہنا ہے کہ پاکستان تحریک انصاف (پی ٹی آئی) کے بانی عمران خان کی رہائی کا ابھی کوئی امکان نہیں ہے۔

عطاء تارڑ نے اسلام آباد ہائیکورٹ کی جانب سے توشہ خانہ ٹو کیس میں ضمانت کی منظوری اور رہائی کے حکم کے بعد پریس کانفرنس کرتے ہوئے کہا کہ بانی پی ٹی آئی کی آٹھ ایف آئی آرز میں ابھی ضمانت نہیں ہوئی، ان کیسز میں بانی کی ابھی تک رہائی نہیں ہوئی۔

خیال رہے کہ بانی پی ٹی آئی عمران خان کے خلاف 6 بڑے قانونی معاملات چل رہے ہیں جن میں سے بیشتر میں وہ بری ہو چکے ہیں یا ان کی سزا معطل ہو چکی ہے یا پھر عدالت نے انہیں ضمانت دے دی ہے۔ لیکن حکومت کے پاس عمران خان کو جیل میں رکھنے کا کچھ جواز اب بھی موجود ہے اگر وہ اسے استعمال کرنا چاہے۔

عمران خان کیخلاف درج مقدمات میں عبوری ضمانت کی استدعا خارج

عمران خان کے خلاف نو مئی سے متعلق آٹھ مقدمات ہیں، جبکہ راولپنڈی میں حالیہ احتجاج کے تین مقدمات درج ہیں۔

پاکستان تحریک انصاف کے احتجاج کے پیش نظر اسلام آباد پولیس نے پنجاب اور سندھ پولیس سے مدد مانگ لی۔ 

پنجاب پولیس سے دو ڈی آئی جیز ، اور دس ڈی پی اوز اسلام آباد میں ڈیوٹی کریں گے۔ پنجاب کے دس ڈی پی اوز پانچ پانچ سو اہلکاروں کے ہمراہ طلب کیے گئے ہیں۔

سندھ اور پنجاب کانسٹیبلری کے بھی دو دو ہزار اہلکار مانگے گئے ہیں، ایف سی اور پنجاب پولیس کے جوان اینٹی رائٹس کیٹ کے ہمراہ ڈیوٹی کریں گے۔

احتجاج کے موقع پر وفاقی دارالحکومت میں چار ہزار رینجرز اہلکاروں کے ہمراہ پانچ ہزار ایف سی کے اہلکار بھی ڈیوٹی سر انجام دیں گے۔ رینجرز اینٹی رائیٹس کٹس کے ہمراہ ڈیوٹی دیں گے۔

وزیراعلیٰ مریم نواز کی ہدایت پر پنجاب میں سب سے بڑے ہائیر ایجوکیشن انٹرن شپ پروگرام کا آغاز کردیا گیا ہے۔

ایکسپریس نیوز کے مطابق وزیراعلیٰ مریم نوازشریف کی زیر صدارت خصوصی اجلاس میں سیکرٹری ہائیرایجوکیشن ڈاکٹر فرخ نوید نے بریفنگ دی اور بتایا کہ پنجاب کی تاریخ کے سب سے بڑے ہائیر ایجوکیشن انٹرن شپ پروگرام کے تحت سرکاری کالجز میں 7354 ٹیچز کو 8 ماہ کیلیے ماہانہ 50 ہزار وظیفے پر بطور انٹرن بھرتی کیا گیا ہے۔

وزیراعلیٰ پنجاب مریم نواز نے شفافیت اور میرٹ پر انٹرنیز بھرتی کرنے پر ہائیر ایجوکیشن ٹیم کو شاباش دی اور امید ظاہر کی کہ اس اقدام کے اچھے نتائج سامنے آئیں گے۔

اعلامیے کے مطابق کالج ٹیچر انٹرنز 31مارچ تک سرکاری کالجز میں اکیڈمیک سیشن مکمل ہونے تک تدریسی خدمات سرانجام دیں  گے۔ اس کے علاوہ ای ٹرانسفر پالیسی کے تحت کالجز کے 962 اساتذہ کی ٹرانسفر پوسٹنگ کا عمل مکمل کرلیا گیا۔

انٹرن بھرتی ہونے والے کالج کے ٹیچرزکو گھر بیٹھے پورٹل پر آن لائن اپلائی کرنے کے بعد آرڈر مل گئے ہیں۔

چیف ایگزیکٹو افسر پاکستان ریلویز عامر علی بلوچ نے ای کچہری میں عوام الناس کے سوالوں کے جواب دیتے ہوئے کہنا تھا کہ پاکستان ریلوے کی ٹرینیں آج کل بنیادی طور پر اسموگ اور موسم کی خرابی کی وجہ سے تاخیر کا شکار ہیں پاکستان ریلوے کا آپریشن تب بھی آچل رہا ہوتا ہے جب ایئرپورٹس اور موٹر ویز بند ہوتے ہیں ہمیں تاخیر سے زیادہ مسافروں کے جانی تحفظ کی فکر ہوتی ہے۔

عامر علی بلوچ نے کہا کہ میں ٹرینوں کے اوقات کار کی خود نگرانی کر رہا ہوں، ہم ان تمام وجوہات کو دور کرنے کی کوشش کر رہے ہیں جن کی وجہ سے آمد ورفت کے اوقات متاثر ہوں۔

ان کا مزید کہنا تھا کہ مسافروں کی سہولت کے لیے آئندہ تمام ٹرینوں میں تعینات ٹرین مینیجرز کا نام اور فون نمبر واضح طور پر ٹرین میں لکھا جائےگا۔ انہوں نے کہا کہ بہت جلد دو سے تین ٹرینیں اپ گریڈ کر کے سسٹم میں شامل کی جائیں گی اور مزید ایک ٹرین کم اسٹاپجز کے ساتھ چلانے کا ارادہ ہے۔

چیف ایگزیکٹو افسر پاکستان ریلویز نے کہا کہ مسافروں کو سہولتیں پہنچانا ہماری ذمہ داری ہے اور ہم اپنی استطاعت کار کے مطابق دستیاب وسائل کو بروئے کار لا رہے ہیں۔

سی ای او ریلوے نے کہا کہ ریجنل کنکٹیوٹی کے پراجیکٹ اربوں ڈالر کے ہوتے ہیں اور اس ضمن میں مختلف پراجیکٹس پر بات چیت ہورہی ہے۔ انہوں نے کہا کہ تھر کول پراجیکٹ پر بھی کام تیزی سےجاری ہے۔

ای کچہری میں چھبیس ہزار سے زائد لوگ شامل ہوئے اور سات ہزار تین سو کے قریب کمنٹس موصول ہوئے۔

وزیراعلیٰ پنجاب مریم نواز شریف نے کہا ہے کہ بلوچستان میں رہنے والے بھائیوں کی مانند ہیں، دہشت گرد بلوچستان کی ترقی پر اثر انداز ہونا چاہتے ہیں۔

مریم نواز شریف نے ان خیالات کا اظہار ملاقات کے لیے آنے والے وزیراعلیٰ بلوچستان سرفراز بگٹی سے گفتگو کرتے ہوئے کیا۔ ملاقات میں ملک کی مجموعی سیاسی صورتحال پر گفتگو اور باہمی دلچسپی کے امور اور بین الصوبائی ہم آہنگی کے فروغ کیلئے اقدامات پر تبادلہ خیال کیا گیا۔

مریم نواز نے کہا کہ بلوچستان کی ترقی دراصل پاکستان کی ترقی ہے، دہشت گردی کے مسئلے کے حل کیلئے بھرپور معاونت کریں گے۔

مریم نواز نے وزیراعلیٰ بلوچستان سے تبادلہ خیال کرتے ہوئے مزید کہا کہ صوبائی سطح پر باہمی تعاون کو مزید فروغ دیں  گے اور پاکستان میں ترقی کا سفر جاری و ساری رہے گا۔

انہوں نے کہا کہ قومی یکجہتی اور بین الصوبائی ہم آہنگی کو فروغ دینے کیلیے مل جل کر کام کریں گے۔

 اس موقع پر وزیراعلیٰ بلوچستان سرفراز بگٹی نے کہا کہ مریم نواز شریف پنجاب کے عوام کی مثالی خدمت کر رہی ہیں،  ملک کی ترقی اور عوام کی خوشحالی کیلیے جامع حکمت عملی کے تحت کام کرنا ہے۔

 ملاقات میں پنجاب کی سینیئر وزیر مریم اورنگزیب اور سابق وزیراعظم انوار الحق کاکڑ بھی موجود تھے۔