راولپنڈی کے تھانہ روات کے علاقے میں کاروباری شخصیت کو اغوا کرکے اغوا کاروں نے بدسلوکی کی اور پھر اس کے بعد اغوا کار مغوی کو برہنہ کر کے بنائی گئی ویڈیو وائرل کرنے کی دھمکیاں دے کر بلیک میل کرنے لگے۔

پولیس کے مطابق  پراپرٹی کا کاروبار کرنے والے شہری نے مقدمہ درج کراتے ہوئے بتایا کہ ثاقب وغیرہ کے ساتھ ہوٹل پر بیٹھ کر چائے پی رہے تھے کہ ثاقب نے کہا کسی سے ملاقات کرنے مانکیالہ جانا ہے ۔میں اپنی گاڑی میں انہیں لیکر نکلا تو کچھ فاصلے پر پہنچ کر ثاقب اور عمر کیانی وغیرہ نے پستول نکال لیے اور زبردستی ڈیڑھ لاکھ کہ نقدی اور پانچ لاکھ روپے کی گھڑی چھین لی۔

انہوں نے بتایا کہ بلاک سے بنے ایک کمرے میں جہاں چار افراد پہلے سے موجود تھے لے گئے اور تشدد کرکے ایک کروڑ روپے کا بندوبست کرنے کا کہتے رہے اور منت سماجت پر ستر لاکھ طے پائے۔

تمام ساتوں ملزمان نے ہراساں کرتے ہوئے برہنہ کردیا اور فحش ویڈیو بناتے رہے، ملزمان نے دھمکیاں دیں اگر رقم نہ دی تو ویڈیو وائرل کر دیں گے اس کے بعد گاڑی سے چیک بک نکلوا کر تین چیکوں اور سادہ کاغذ پر انگوٹھے لگوائے اور مزید رقم کی ادائیگی کی یقین دہانی پر آنکھوں پر پٹی باندھ کر گاڑی سمیت جی ٹی روڈ چھوڑ دیا۔

ملزمان کے چنگل سے رہا ہونے کے بعد ڈر کے مارے خاموش رہا اور اب ثاقب وغیرہ فون کرکے ویڈیو وائرل کرنے کی دھمکیاں دیکر بلیک میل کرکے مزید 65 لاکھ روپے کا مطالبہ کر رہے ہیں۔

پولیس کا کہنا تھا کہ مدعی پراپرٹی کا کاروباری کرتا ہے درخواست پر مقدمہ درج کر لیا گیا اور مزید تفتیش میں مصروف ہیں۔

وزیراعظم شہباز شریف آج بدھ کو کراچی کا ایک روزہ دورہ کریں گے۔

سرکاری ذرائع کے مطابق وزیراعظم پاکستان اسٹاک ایکسچینج،کے پی ٹی  اور آغا خان یونیورسٹی میں ہونے والی تقاریب میں شرکت کریں گے۔

سرکاری ذرائع کے مطابق امکان ہے کہ وزیراعظم سے بزنس کمیونٹی اور دیگر وفود ملاقاتیں بھی کریں گے۔

26ویں آئینی ترمیم کے مضمرات پروکلا برادری منقسم ہے جس نے نہ صرف اعلیٰ عدالتوں کے ججوں کی تقرری میں ایگزیکٹو کے اثر و رسوخ میں اضافہ کیا ہے بلکہ عدلیہ کے اندرونی کام کو بھی متاثر کیا ہے۔ انڈیپینڈنٹ گروپ اس کی حمایت کر رہا ہے  جبکہ سپریم کورٹ بار کے موجودہ صدر کا تعلق بھی اسی گروپ سے ہے،  دوسری جانب آل پاکستان وکلا  ایکشن کمیٹی  میں حامد خان گروپ کی بڑی تعداد شامل ہے جو اس ترمیم کی سختی سے مخالفت کر رہی ہے۔

سپریم کورٹ بار ایسوسی ایشن کے صدر  رؤف عطا نے آئینی بنچ اور سپریم کورٹ  پر اپنے اعتماد کا اظہار کیا ہے۔ ایک بیان میں صدر بار ایسوسی ایشن نے کہاکہ 26ویں آئینی ترمیم کی حمایت کی وجہ دو اہم باتیں ہیں، سب سے پہلے یہ پارلیمنٹ کی اجتماعی مرضی کی نمائندگی کرتی  ہے، دوئم اس نے موثر طریقے سے عدالتی حد سے تجاوز کو کم کیا ہے اور آنے والے ہر وقت کے لیے اختیارات کی علیحدگی کے اصول کو مضبوط کیا ہے۔

آئین میں ترمیم کرنے کی اہل صرف پارلیمنٹ ہی ہے، ترمیم نے عدلیہ کو پہلے سے زیادہ خود مختار بنا دیا ہے اور عام شہریوں کے لیے انصاف کی رسائی میں اضافہ کیا ہے۔یہ غلط دعوی کیا گیا ہے کہ ترمیم نے ایگزیکٹو کوماسٹر آف دی روسٹربنا دیا ہے۔

ہمیں جوڈیشل کمیشن کی موجودہ ساخت، آئینی بنچوں کی تشکیل اور اس کے کام کاج پر مکمل اعتماد ہے۔کسی کو بھی عدالت کو فل کورٹ بلانے پر مجبور نہیں کرنا چاہیے۔ سیاسی دباؤ کے تحت اس طرح کے کسی بھی اجلاس کا کوئی تعلق نہیں ہوگا اور اسے وکلا برادری قبول نہیں کرے گی۔ہم چند افراد کی طرف سے اس طرح کے خطوط لکھنے کی سختی سے مذمت کرتے ہیں کیونکہ ان کے نقطہ نظر کو وکلا برادری پہلے ہی مسترد کر چکی ہے۔ مستقبل میں ایسا کرنے کی کسی بھی کوشش کا سخت جواب دیا جائے گا۔

دوسری جانب  حامد خان گروپ پر مشتمل آل پاکستان لائرز ایکشن کمیٹی نے ایس سی بی اے کے صدر کے بیان پر شدید ردعمل کا اظہار کرتے  ہوئے کہا ہے کہ رؤف عطا کا بیان ایگزیکٹو کے مفادات کے ساتھ ہم آہنگ ہے اور  عدالتی آزادی کو مجروح کرتا ہے، رؤف عطا وکلا کے متفقہ نقطہ نظر کی نمائندگی نہیں کرتے جو قانون کی حکمرانی، آئینی بالادستی اور عدلیہ کی آزادی کو برقرار رکھنے کے لیے پرعزم ہے۔

 26ویں ترمیم کی فل کورٹ میں سماعت کا مطالبہ انصاف اور شفافیت کو یقینی بنانے کیلئے ہے، جوڈیشل کمیشن آف پاکستان (جے سی پی) کے متوازن ہونے کا دعویٰ حقیقت کے برعکس ہے۔ ترمیم سے  ایگزیکٹو کو ماسٹر آف دی روسٹر بنا دیا گیا ہے، کمیٹی نے وکلا کے اندر اختلاف رائے کو خاموش کرنے کی کسی بھی دھمکی یا کوشش کو مسترد کرتے ہوئے کہا ہے کہ آئین کا آرٹیکل 19 آزادی اظہار کی ضمانت دیتا ہے، جس میں عدالتی آزادی کو مجروح کرنے والے اقدامات پر تنقید اور سوال کرنے کا حق شامل ہے۔