ایلون مسک کی سابق گرل فرینڈ گرائمز نے اپنے بچے سے ملنے کے لیے دنیا کے امیر ترین شخص کے خلاف مقدمہ دائر کردیا۔
عالمی خبر رساں ادارے کے مطابق 52 سالہ ایلون مسک اور 35 سالہ گرائمز 2018 سے ایک ساتھ رہے تھے اور دونوں کے درمیان 2021 میں علیحدگی ہوئی۔ جس کے دوران تین بچے بھی ہوئے تاہم دونوں نے شادی نہیں کی تھی۔
ایلون مسک اور گرائمز کے پہلے بیٹے کا نام X AE A-12 ہے اور پھر 2021 میں سروگریسی کے ذریعے بیٹی کی پیدائش ہوئی جس کا نام Exa Dark Siderael Musk رکھا گیا جب کہ تیسرے بچے کا نام ٹیکنو میکانکس تھا۔
تیسرے بچے کے بارے میں معلومات پہلی بار پچھلے ماہ صحافی والٹز آئزاکسن کی ایلون مسک کی سوانح عمری میں سامنے آئی ورنہ اس سے قبل جوڑے کے دو بچوں کے بارے میں ہی معلوم تھا۔
ایلون مسک کی گرائمز کے ساتھ دوستی سے قبل دو شادیاں ناکام ہوچکی تھیں۔ دوسری بیوی سے طلاق کے ایک سال بعد دوبارہ شادی کی تھی لیکن یہ رشتہ تین سال بعد دوبارہ طلاق پر ختم ہوا تھا۔
اپنی اولادوں کے حوالے سے ایلون مسک متضاد دعوے کرتے ہیں اور زیادہ تر بچوں کی تعداد 11 بتاتے ہیں اور کہیں یہ تعداد 10 کہتے ہیں۔ یہ بچے دو بیویوں اور ایک گرل فرینڈ سے ہیں۔
گرل فرینڈ گرائمز نے اپنی درخواست میں دعویٰ کیا کہ ایلون مسک انہیں ایک بچے سے ملنے نہیں دیں گے۔ انھوں نے عدالت سے یہ بھی استدعا کی کہ اس بچے کے قانونی والد کا تعین بھی کرے۔
غالبا گرائمز اپنے تیسرے بچے کے حوالے سے عدالت سے رجوع کیا ہے۔ دوسری جانب ایلون مسک کا اس پر کوئی تبصرہ تاحال سامنے نہیں آیا۔
