لاہور : (ویب ڈیسک) حریت کانفرنس نے مقبوضہ کشمیر میں جی 20 اجلاس کے بائیکاٹ پر چین، سعودی عرب، ترکیہ اور مصر سے اظہار تشکر کیا ہے۔
حریت کانفرنس کی جانب سے جاری بیان میں کہا گیا ہےکہ مودی حکومت مقبوضہ کشمیر پر ناجائز قبضےکو جائز قرار دینے کے لیے ڈرامے رچا رہی ہے۔حریت کانفرنس نے کہا کہ مقبوضہ کشمیر میں کوئی بھی بین الاقوامی تقریب علاقےکی زمینی صورتحال کو تبدیل نہیں کرسکتی، بھارتی فورسز جی 20 اجلاس کے وفود کی سکیورٹی کے نام پر گھروں پر چھاپے مار رہی ہیں۔
حریت کانفرنس کے مطابق گھروں میں گھس کر خواتین اور بچوں کوبھی کو ہراساں کیا جارہا ہے۔

کراچی : (ویب ڈیسک) پاکستان تحریک انصاف (پی ٹی آئی)کی خواتین رہنماؤں کی راولپنڈی میں جی ایچ کیو پر دھا وا بولنے سے متعلق مبینہ آڈیو سامنے آگئی۔
مبینہ آڈیو میں پی ٹی آئی کی سابق رکن پنجاب اسمبلی فرح آغا پارٹی کی خواتین ارکان کے ساتھ جی ایچ کیو پر دھا وا بولنے سے متعلق گفتگو کر رہی ہیں۔فرح آغا پی ٹی آئی ویمن ونگ کی خواتین سے جی ایچ کیو کی طرف جانے کی بات کر رہی ہیں۔
مبینہ آڈیو میں سابق ایم پی اے فرح آغا پی ٹی آئی کی کارکن سبرینا سےکہہ رہی ہیں کہ ‘اب جی ایچ کیو پہنچنا ہے، میں نکل آئی ہوں کیونکہ میم کنول ( سابق ایم این اے کنول شوذب) نکلی ہوئی ہیں، میم کنول نے کہا ہے کہ جی ایچ کیو کی طرف آنا ہے، جی ایچ کیو جانے کے لیے میم کنول نےکہا ہے، ہم نے جی ایچ کیو جانا ہے فیض آباد آدمی جا رہے ہیں’۔
فرح آغا کا مزید کہنا تھا کہ انٹرنیٹ نہیں چل رہا ساری سروسز بند ہیں۔
فرح آغا پی ٹی آئی ویمن ونگ کی ڈپٹی جنرل سیکرٹری فرخندہ سے بھی بات کر رہی ہیں، جس میں ان کا کہنا تھا کہ ‘ لیاقت باغ والی جگہ پر اتنی بری شیلنگ ہو رہی ہے، پولیس اور لڑکوں کی لڑائی ہو رہی ہے، صدر جانے کے سارے راستے بند ہیں، ، فیض آباد میں راشد حفیظ،شفیق اور سماویہ ہے، سماویہ ہیروئن بنی آگے آگے جا رہی ہے’۔

کراچی : (ویب ڈیسک) کراچی میں آئندہ 24 گھنٹوں کے دوران مطلع جزوی ابر آلود اور موسم گرم و مرطوب رہنےکا امکان ہے۔
محکمہ موسمیات کے مطابق شہر میں آج بھی تیز ہوائیں چلتی رہیں گی، اس دوران زیادہ سے زیادہ درجہ حرارت 34 سے 36 ڈگری سینٹی گریڈ تک پہنچ سکتا ہے جب کہ کم سےکم درجہ حرارت 28.5 ڈگری سینٹی گریڈ ریکارڈ کیا گیا۔
محکمہ موسمیات کے مطابق ہوا میں نمی کا تناسب 85 فیصد ہے جب کہ جنوب مغرب سے چلنے والی ہواؤں کی رفتار27 کلو میٹر فی گھنٹہ ہے۔

کراچی : (ویب ڈیسک) کراچی سے کوئٹہ کے لیے قومی ائیرلائن کی پرواز اڑان کے 17 منٹ بعد واپس اتار لی گئی۔
پی آئی اے کی پرواز پی کے 310 نے صبح 8 بج کر 44 منٹ پر جناح انٹرنیشنل ائیرپورٹ کراچی سے کوئٹہ کے لیے ٹیک آف کیا۔
اڑان کے 5 منٹ بعد طیارہ 5000 فٹ کی بلندی پر پہنچا تو پائلٹ نے ٹریفک کنٹرول کو واپسی کی اطلاع دی، اڑان کے 17 منٹ بعد پرواز 9 بجے کراچی کے جناح انٹرنیشنل ائیرپورٹ پر واپس لینڈ کرگئی۔
ترجمان پی آئی اے کے مطابق پرواز کی واپسی طیارے سے پرندہ ٹکرانے سے ہوئی، لینڈنگ کےبعد طیارے کا معائنہ کیا گیا۔

کراچی: (ویب ڈیسک) پاکستان پیپلز پارٹی کے رہنما شرجیل میمن نے کہا ہے کہ عمران خان کو عدالتوں سے جو ریلیف ملے اس کے مقاصد سامنے آ رہے ہیں۔
میڈیا سے گفتگو کرتے ہوئے رہنما پیپلز پارٹی شرجیل میمن نے کہا کہ آپ کے کیسز کی تفصیل سامنے آئے گی تو لوگوں کو پتا چلے گا آپ سے بڑا کرپٹ کوئی نہیں، پاکستان کا سب سے اہم ادارہ عدلیہ ہے، ہم دل سے عدلیہ کا احترام کرتے ہیں، ثاقب نثار کی کون عزت کرے گا جو سیاسی جماعتوں کی ٹکٹ بیچ رہا تھا۔
انہوں نے کہا کہ کل عمران خان نے ٹوئٹ کیا کہ حیران ہوں جبری علیحدگیاں ہو رہی ہیں، خان صاحب ہم نے پاکستان میں 2018ء سے پہلے جبری شمولیتیں بھی دیکھی ہیں، کیسے جہاز بھر بھر کر سیاست دانوں کی پی ٹی آئی میں شمولیت کروائی گئی، آپ کو جس طرح مصنوعی وزیراعظم بنوایا گیا پاکستان کے عوام بھولے نہیں۔
شرجیل میمن نے کہا کہ یہ کوئی آپ کے نظریے کی وجہ سے سے نہیں آئے تھے، جس طرح سے یہ جا رہے ہیں اس سے بھی زیادہ تیزی سے یہ آئے تھے، اتحادی بھی خوش نہیں تھے وہ جبری اتحادی بنائے گئے تاکہ ناجائز بلز پاس کیے جائیں۔
انہوں نے کہا کہ عدلیہ کو سفارش نہیں سننی چاہیے، قانون اور آئین کے دائرے میں چلیں، قانون و آئین کے مطابق فیصلے دیں ہم دل سے عزت کریں گے، کوئی جج کیسے کسی کو منع کر سکتا ہے تفتیش کرنے سے، یہ سارے غیر قانونی غیر آئینی فیصلے ہیں۔

اسلام آباد: (ویب ڈیسک) پاکستان تحریک انصاف (پی ٹی آئی) کے سینیٹر علی ظفر نے کہا ہے کہ توڑ پھوڑ ایک انفرادی عمل ہے جس کی بنیاد پر کسی جماعت پر پابندی نہیں لگائی جاسکتی۔
سپریم کورٹ کے باہر میڈیا سے گفتگو کرتے ہوئے سینیٹر علی ظفر نے کہا ماضی میں جماعت اسلامی پر پابندی لگانے کی کوشش کی گئی تھی، سپریم کورٹ قرار دے چکی ہے کہ آپ کسی سیاسی جماعت پرپابندی نہیں لگا سکتے، اگر پی ٹی آئی پر پابندی لگائی گئی تو امید ہے سپریم کورٹ ایک ہی دن میں کالعدم قرار دے گی۔
انہوں نے کہا کہ قوانین پرکوئی عمل درآمد نہیں ہو رہا، اس وقت 2 صوبوں میں کوئی اسمبلی نہیں ہے، میری نظر میں آئین کا قتل ہوچکا ہے، عدالتیں ضمانت دیتی ہیں، جیل سے نکلتے ہی دوسرے مقدمے میں گرفتار کرلیا جاتا ہے، یہ لاقانونیت ہے، اس پر پٹیشن فائل کر رہے ہیں، عدالت ایکشن لے گی۔
سینیٹر علی ظفر کا کہنا تھا کہ اسمبلیاں نہ ہوں تو میں سمجھتا ہوں آئین چل ہی نہیں سکتا، عدالتوں کے احکامات نہ مانیں جائیں گے تو لوگوں کا عدالتوں پر سے اعتماد ختم ہو جائے گا، جب سے پاکستان بنا ہے ہزاروں قوانین ایسے ہیں جن کو عدالتوں نے کالعدم قرار دیا ہے، اس کو عدالتوں اور پارلیمنٹ کے درمیان تصادم نہ سمجھا جائے۔