لاہور: (ویب ڈیسک) لاہور ہائیکورٹ نے قومی اسمبلی کے حلقہ این اے 108 اور 118 میں ضمنی الیکشن رکوانے کی درخواست پر فیصلہ محفوظ کر لیا۔
لاہور ہائیکورٹ کے جسٹس شاہد کریم نے فیصل آباد اور ننکانہ صاحب کے حلقوں میں ضمنی الیکشن روکنے کے حوالے سے پی ٹی آئی رہنما فرخ حبیب اور اعجاز شاہ کی درخواستوں پر سماعت کی۔
درخواست میں سیکرٹری الیکشن کمیشن، سیکرٹری کیبنٹ اور قومی اسمبلی کو فریق بنایا گیا ہے۔
درخواست گزار نے مؤقف اختیار کیا کہ قومی اسمبلی کی معیاد ختم ہونے سے 120 دن قبل ضمنی انتخاب نہیں ہو سکتا، الیکشن کمیشن نے این اے 108 میں ضمنی انتخاب کا شیڈول جاری کر دیا ہے، پشاور ہائیکورٹ نے خیبر پی کے میں ہونے والے انتخابات کو ملتوی کر دیا ہے، این اے 108 اور 118 میں الیکشن روکنے کا حکم دیا جائے۔
الیکشن کمیشن نے مؤقف اختیار کیا کہ پشاور ہائیکورٹ میں غلط بیانی کر کے انتخابات کو رکوایا گیا، انتخابات کی تمام تیاریاں مکمل ہوچکی ہیں، عدالت درخواست خارج کرے۔
بعدازاں لاہور ہائیکورٹ نے دلائل سننے کے بعد فیصلہ محفوظ کر لیا۔

اسلام آباد: (ویب ڈیسک) الیکشن کمیشن نے توہین الیکشن کمیشن کیس میں عمران خان، اسد عمر اور فواد چودھری کو ذاتی حیثیت میں پیش ہونے کا حکم دے دیا۔
چیئرمین پی ٹی آئی عمران خان، اسد عمر اور فواد چودھری کے خلاف توہین الیکشن کمیشن کیس کی سماعت ممبر الیکشن کمیشن نثار درانی کی سربراہی میں 3 رکنی کمیشن نے کی۔
سابق وزیراعظم عمران خان اور فواد چودھری کی جانب سے وکیل فیصل چودھری اور اسد عمر کی جانب سے معاون وکیل الیکشن کمیشن میں پیش ہوئے۔
وکیل فیصل چودھری نے کمیشن کو بتایا کہ الیکشن کمیشن کا آرڈر کل موصول ہوا، آرڈر تاخیر سے موصول ہوا تو کیسے تیاری کرتے۔
ممبر الیکشن کمیشن اکرام اللہ خان نے کہا کہ گزشتہ سماعت پر بھی عمران خان کو ذاتی حیثیت میں پیش ہونے کا موقع دیا تھا جس پر وکیل نے جواب دیا کہ ہمارے خلاف 150 کیسز ہیں، روزانہ 36 کیسز ہوتے ہیں۔
رکن الیکشن کمیشن شاہ محمد جتوئی نے کہا کہ جب 150 کیسز نہیں تھے تب بھی آپ پیش نہیں ہوتے تھے۔
وکیل فیصل چودھری نے سماعت جون کے پہلے ہفتے تک ملتوی کرنے کی سفارش کرتے ہوئے کہا کہ چیزیں ہمارے ہاتھ میں نہیں ہیں، الیکشن کمیشن یہ بات دماغ سے نکال دے کہ ہم ان کی توہین کر رہے ہیں، یہ کیس تو 6 ماہ سے الیکشن کمیشن میں زیر التوا ہے۔
ممبر الیکشن کمیشن اکرام اللہ خان نے کہا کہ گزشتہ سماعت میں عدم پیشی پر وارنٹ گرفتاری کا حکم دیا تھا۔
الیکشن کمیشن نے عمران خان، فواد چودھری اور اسد عمر کو ذاتی حیثیت میں پیش ہونے کا حکم دیتے ہوئے کہا کہ آئندہ سماعت میں عدم حاضری پر ناقابل ضمانت وارنٹ گرفتاری جاری کریں گے، عدم پیشی پر ہونے والی سماعت میں کیس کو بھی نمٹا دیں گے، الیکشن کمیشن میں کیس کی مزید سماعت 5 جون تک ملتوی کر دی گئی۔

کوہاٹ: (ویب ڈیسک) ہنگو میں مول گیس کمپنی پلانٹ پر دہشت گردوں کے حملے میں فرنٹیئر کانسٹیبلری کے چار اہل کار اور دو نجی سکیورٹی گارڈ شہید ہوگئے۔
ڈی ایس پی ٹل عرفان نے بتایا ہے کہ تحصیل ٹل علاقہ منجی خیل میں مول گیس کمپنی پلانٹ پر صبح 3 سے 4 بجے کے وقت دہشت گردوں نے حملہ کر دیا جس کے نتیجے میں 6 اہلکار شہید ہوئے ان میں چار اہلکار ایف سی اور دو اہلکار نجی سکیورٹی کمپنی کے ہیں۔
ڈی ایس پی عرفان کا کہنا تھا کہ 6 شہید اہلکاروں نے دو گھنٹے سے زائد دہشت گردوں کی ساتھ دلیری سے مقابلہ کیا، پولیس اور فرنٹیئر کور کے بھاری دستوں نے علاقے میں پہنچ کر سرچ آپریشن کیا۔

گوجرانوالہ: (ویب ڈیسک) اینٹی کرپشن کورٹ گوجرانوالہ نے کرپشن کے دو مقدمات میں سابق وزیراعلیٰ پنجاب چودھری پرویز الہٰی کی عبوری ضمانت میں یکم جون تک توسیع کر دی۔
سابق وزیراعلیٰ پنجاب چودھری پرویز الہٰی کے وکیل نے ان کی بیماری کی بنیاد پر حاضری سے استثنیٰ کی درخواست دی تھی جسے اینٹی کرپشن عدالت نے منظور کر لیا، درخواست کے ساتھ پرویز الہٰی کی میڈیکل رپورٹ بھی لگائی گئی تھی۔
ڈپٹی ڈسٹرکٹ پبلک پراسیکیوٹر یوسف سندھو نے چودھری پرویز الہٰی کی درخواست کی مخالفت کی، ایف آئی آرز میں چودھری پرویز الہٰی پر ترقیاتی سکیم میں 2 ارب روپے رشوت لینے کا الزام ہے۔

راولپنڈی: (ویب ڈیسک) پاکستان تحریک انصاف (پی ٹی آئی) کے چیئرمین اور سابق وزیراعظم عمران خان 190 ملین پاؤنڈز کی مبینہ غیر قانونی منتقلی کے کیس میں کمبائنڈ انویسٹی گیشن ٹیم نے عمران خان سے پوچھ گچھ مکمل کر لی۔
ذرائع کے مطابق سابق وزیراعظم عمران خان طلبی کے نوٹس پر نیب راولپنڈی کے سامنے پیش ہوئے جہاں کمبائنڈ انویسٹی گیشن ٹیم نے ایک گھنٹہ بات چیت کے بعد کیس سے متعلق پوچھ گچھ مکمل کر لی۔
تحقیقاتی ٹیم کے سوالوں پر چیئرمین پی ٹی آئی کا کہنا تھا کہ 190 ملین پاؤنڈ سے متعلق فیصلے کا ریکارڈ کابینہ ڈویژن کے پاس ہے، این سی اے برطانیہ کے ریکارڈ تک میری رسائی نہیں اور القادر ٹرسٹ کا ریکارڈ نیب کو پہلے ہی مل چکا۔
خیال رہے کہ سابق وزیراعظم عمران خان نے نیب راولپنڈی میں پیشی کے دوران اپنی ممکنہ گرفتاری کا خدشہ بھی ظاہر کر رکھا ہے، ان کا کہنا تھا کہ قانون تو ہے نہیں یہ کسی بھی چیز پر گرفتار کر سکتے ہیں، دوسری جانب نقص امن کے پیش نظر راولپنڈی میں دفعہ 144 میں 28 مئی تک توسیع کر دی گئی ہے۔

لاہور: (ویب ڈیسک) آمدن سے زائد اثاثہ جات کیس میں سابق وزیراعلیٰ پنجاب عثمان بزدار کی ایک روز کیلئے حاضری سے استثنیٰ کی درخواست منظور کر لی گئی۔
احتساب عدالت میں سابق وزیراعلیٰ پنجاب عثمان بزدار کیخلاف آمدن سے زائد اثاثہ جات کے کیس کی سماعت ہوئی، عثمان بزدار کے وکیل نے ان کی حاضری سے استثنیٰ کی درخواست دائر کی جس پر فاضل جج نے ناراضگی کا اظہار کیا، انہوں نے ریمارکس دیئے کہ 3 گھنٹے میں ملزم کو پیش کریں ورنہ فیصلہ سنا دیں گے۔
پراسیکیوٹر نے موقف پیش کیا کہ گزشتہ روز بھی عثمان بزدار کی ایک ضمانت اینٹی کرپشن کورٹ سے خارج ہوئی۔
عثمان بزدار کے وکیل نے کہا کہ معاملہ دیکھنے خود عدالت آیا ہوں۔
عدالت نے ریمارکس دیئے کہ پچھلی تاریخ پر بھی کہا تھا کہ ملزم کو پیش کرائیں، ملزم یا جیل جائے گا یا کہیں اور، عثمان بزدار وزیراعلیٰ رہے ہیں، جواب بھی دینا ہو گا۔ 5 بار فائدہ دیدیا، 5 بار حاضری معافی دی، جتنا فائدہ دے سکتے تھے دیدیا، جو میڈیکل ساتھ لگایا، ڈاکٹر بھی بلا لیتے ہیں اور بورڈ بھی بٹھا لیتے ہیں، کیا یہ چلنے پھرنے کے قابل نہیں، یہ جواب جو دیا وہ دستخط کے بغیر اور کاپی ہے، نیب کو اصل کاغذات دے دیں۔
عثمان بزدار کے وکیل نے کہا کہ سارے کاغذات نیب کو دے دیں گے، عدالت نے دونوں جانب سے وکلا کے دلائل سننے کے بعد حاضری سے استثنی کی درخواست منظور کر لی۔
فاضل جج نے عثمان بزدار کی عبوری ضمانت میں 25 مئی تک توسیع کر دی۔