لندن: (ویب ڈیسک) برطانوی سائنس دانوں کا ماننا ہے کہ انہوں نے زمین پر گِرنے والے ایک نایاب ترین شہابی پتھر کے ماخذ کی نشان دہی کردی ہے۔
آئی ویونا شہابی پتھر تنزانیہ میں دسمبر 1938 میں گِرا تھا اور ٹوٹ کر متعدد ٹکڑوں میں بِکھر گیا تھا جن میں سے ایک لندن کے نیچرل ہِسٹری میوزیم میں موجود ہے۔
ریوگو نامی سیارچے کا جائزہ لینے والے ماہرین کا ماننا ہے کہ آئی ویونا چٹان ممکنہ طور پر نظام شمسی کے کنارے سے آئی ہو۔
میوزیم کی ٹیم کا کہنا تھا کہ جرنل سائنس ایڈوانسز میں شائع ہونے والی تحقیق کے نتائج نظامِ شمسی کے ابتدائی دور کے متعلق مزید جوابات دے سکتے ہیں اور زمین پر زندگی کیسے وجود میں اس معاملے پر مزید روشنی ڈالی جاسکتی ہے۔
تحقیقی مقالے کی شریک مصنفہ پروفیسر سارا رسل کا کہنا تھا کہ یہ ایک دلچسپ دریافت ہے کیوں کہ یہ بتاتا ہے کہ ہمارے میوزیم اور دنیا بھر میں موجود شہابی پتھر ممکنہ طور پر خلاء میں دور دراز موجود کسی چٹان کا اندرونی حصہ ہیں۔
انہوں نے کہا کہ سائنس دان ان کو استعمال کرتے ہوئے اپنے اصل اور ہمارے ساتھ کے سیاروں کے متعلق مزید جان سکیں گے۔
آئی ویونا کو ایک انتہائی نایاب شہابی پتھروں میں شمار کیا جاتا ہے جن کو سی آئی کونڈرائٹس کہا جاتا ہے۔
یہ کاربن کے حامل پتھر چار ارب سال قبل نظامِ شمسی کی تشکیل کے دور کی کیمسٹری اپنے اندر رکھتے ہیں۔

کینٹکی: (ویب ڈیسک) ایک تحقیق میں بتایا گیا ہے کہ برقی سگریٹ بھی روایتی سگریٹوں کی طرح دل کو نقصان پہنچا سکتی ہیں۔
چوہوں پر کیے جانے والے تجربات میں سائنس دانوں کو معلوم ہوا کہ ای سگریٹ چوہوں میں دل کی دھڑکن میں بے ترتیبی کا سبب بن سکتی ہے۔
بے ترتیب دل کی دھڑکن متعدد جان لیوا پیچیدگیوں کا سبب ہوسکتی ہے جن میں فالج، خون کی گٹھلیاں اور شدید معاملات میں دل کا دورہ شامل ہے۔
جن چوہوں کو ویپ کے دھویں میں رکھا گیا ان کے دل کی دھڑکن تجربے کے فوراً بعد کم ہوگئی اور کچھ ہی لمحوں بعد دوبارہ تیز ہوگئی۔
ایسا صرف ان مخصوص کیمیکلز کی وجہ سے ہوتا ہے جو فروٹی اور مینتھول ذائقے کے ویپس میں موجود ہوتے ہیں اور یہ ذائقے بچوں میں تیزی سے مقبول ہورہے ہیں۔
امریکا کے فوڈ اینڈ ڈرگ اتھارٹی کے مطابق تمباکو نوشی کرنے والوں میں سگریٹ پینے کے 20 منٹ بعد دل کی دھڑکن کی رفتار کم ہوجاتی ہے اور پھر تیز ہوتی ہے۔
یونیورسٹی آف لوئزوِل کی اسسٹنٹ پروفیسر اور تحقیق کے سربراہ ڈاکٹر ایلکس کارل کا کہنا تھا ہماری تحقیق بتاتی ہے کہ ای سگریٹ کے صارفین میں مخصوص کیمیکلز کے متحمل مائع کی وجہ سے دل کی دھڑکن کی ترتیب بگڑتی ہے۔
امریکا اور برطانیہ کے بچوں میں ویپ کا استعمال تیزی سے پھیل رہا ہے۔ اعداد و شمار کے مطابق امریکا میں 26 لاکھ نوجوان باقاعدگی سے ای سگریٹس استعمال کر رہے ہیں۔
نیچر کمیونیکیشنز میں شائع ہونے والی تازہ ترین تحقیق میں چوہوں کو ای سگریٹ کے دھوئیں میں رکھا گیا تاکہ یہ دیکھا جاسکے کہ ان کا دل کیا ردِ عمل دیتا ہے۔