لاہور: (ویب ڈیسک) نامور سکالر، دانشور اور موٹیویشنل سپیکر قاسم علی شاہ کو چیئرمین بورڈ آف گورنرز لاہور آرٹس کونسل تعینات کر دیا گیا۔
تفصیلات کے مطابق قاسم علی شاہ کو 3 برس کے لئے چیئرمین کے عہدے پر فائز کیا گیا ہے، دیگر اراکین میں عمران قریشی، قدسیہ رحیم، عباس تابش، رضی احمد، ساجدہ ونڈل شامل ہیں۔
شاہد محمود ندیم، محمد احمد شاہ، حماد غزنوی، سلیمہ ہاشمی، صوفیہ بیدار اور ڈاکٹر نیلم ناز بھی گورننگ باڈی کا حصہ ہوں گی۔
الحمراء آرٹس کونسل کی گورننگ باڈی وزیر اعلیٰ پنجاب کی ہدایات پر تشکیل دی گئی ہے۔
اعلامیے کے مطابق یہ باڈی ادب و ثقافت کے میدان میں نئی نئی پالیسیز تشکیل دیتی ہے اور نئے رخ متعین کرتی ہے۔

واشنگٹن: (ویب ڈیسک) بھارتی اداکار رنویر سنگھ نے پاکستان کی نوبیل انعام یافتہ ملالہ یوسفزئی کے ساتھ سیلفی لے لی جو سوشل میڈیا پر وائرل ہو گئی۔
ملالہ اور رنویر کی ملاقات این بی اے کی باسکٹ بال گیم کے موقع پر ہوئی جہاں ہالی ووڈ کے دیگر مشہور اداکار بھی موجود تھے۔
رنویر سنگھ نے اپنے انسٹاگرام پر متعدد تصاویر شیئر کی ہیں جس میں وہ مختلف فنکاروں کے ساتھ نظر آرہے ہیں۔
ایک تصویر میں دیکھا جاسکتا ہے کہ وہ ملالہ یوسفزئی اور ان کے شوہر عصر ملک کے ساتھ ہیں اور موبائل سے تینوں کی سیلفی لے رہے ہیں۔
یاد رہے کہ ملالہ یوسفزئی اپنے شوہر کے ساتھ امریکن لیگ کے آل سٹارز ویک اینڈ کی تقریب میں شرکت کیلئے آئی تھیں۔

ممبئی: (ویب ڈیسک) بالی ووڈ کے کنگ شاہ رُخ خان کی فلم ’پٹھان‘ دنیا بھر سے 1 ہزار کروڑ کمانے میں کامیاب ہوگئی۔
یش راج فلمز کی جانب سے سوشل میڈیا پر یہ اعلان کیا گیا ہے کہ پٹھان نے دنیا بھر سے ایک ہزار کروڑ انڈین روپے کما لیے ہیں۔
ایکشن اور تھرلر سے بھرپور اس ہندی فلم نے بھارت سے اپنی ریلیز کے پہلے ہی ہفتے میں 500 کروڑ کمائے جبکہ ریلیز کے چوتھے ہفتے میں بھارت سمیت دنیا بھر سے 1 ہزار کروڑ کما کر پٹھان نے گزشتہ تمام ہندی فلموں کے ریکارڈ تور دیئے ہیں۔
پٹھان ریلیز کے پہلے مرحلے اور چوتھے ہفتے میں 1 ہزار کروڑ کا بزنس کرنے والی پہلی ہندی فلم کا اعزاز بھی اپنے نام کر چکی ہے۔
یاد رہے کہ باکس آفس پر دھوم مچانے والی فلم پٹھان رواں سال 25 جنوری کو ریلیز ہوئی تھی فلم میں شاہ رُخ خان، سٹائل کوئین ڈیپکا پڈوکون اور جان ابراہم سمیت سلمان خان نے بھی کیمیو رول ادا کیا تھا۔
خیال رہے کہ 4 سال کے وقفے کے بعد سکرین پر جلوہ گر ہونے والے شاہ رُخ خان کی دو اور بڑی فلمیں جوان اور ڈنکی بھی جلد سنیما گھروں کی زینت بنیں گی۔

لاہور: (ویب ڈیسک) پاکستانی گلوکار آئمہ بیگ نے کہا ہے کہ ان کا نیا گیت “وش ملے” بلوچستان کی ثقافت کو خراج تحسین پیش کرنے کیلئے ہے۔
آئمہ بیگ کے گیت کا عنوان ’وش ملے‘ ہے اور اس میں ان کے ساتھ معروف گلوکار ساحر علی بگا نے پرفارم کیا۔
انسٹاگرام پوسٹ میں آئمہ بیگ نے لکھا کہ ان کا گیت پاکستان کے سب سے بڑے صوبے بلوچستان کی ثقافت کیلئے ایک خراج تحسین ہوگا۔
انہوں نے لکھا کہ میں بلوچستان کی میٹھی زبان اور خوبصورت روایات پر ایک گیت بنانا چاہتی تھی اور اس گیت کے ذریعے ایک بڑے صوبے کی ثقافت کو منایا جائے گا۔
گلوکارہ نے لکھا کہ میں ہمیشہ سے اپنے ملک کی ثقافت کی حامی رہی ہوں چاہے وہ پنجابی ہو یا سرائیکی اور یہ ہم پر قرض ہے کہ ہم فراموش شدہ علاقوں کی ثقافت کو فروغ دیں۔
ساحل علی بگا اور آئمہ بیگ نے اپنے گانے کا تازہ پوسٹر بھی جاری کیا ہے اور اس میں بلوچی ثقافت کی جھلک نظر آتی ہے۔