ابو ظہبی: (ویب ڈیسک) متحدہ عرب امارات میں چیف آف آرمی سٹاف جنرل عاصم منیر اور یو اے ای کے صدر شیخ محمد بن زیاد النہیان کے درمیان ملاقات ہوئی جس میں باہمی دلچسپی کے امور پر تبادلہ خیال کیا گیا۔ پاکستان میں یو اے ای ایمبیسی کی جانب سے جاری بیان میں کہا گیا کہ جنرل عاصم منیر اور شیخ محمد بن زیاد النہیان کے درمیان ملاقات باہمی تعاون کو مزید بڑھانے اور دونوں ممالک کے درمیان مشترکہ مفادات کے کاموں پر توجہ مرکوز کرنے پر بات چیت کی گئی۔
نارووال: (ویب ڈیسک) وفاقی وزیر منصوبہ بندی احسن اقبال نے کہا ہے کہ عمران خان 4 سال میں پاکستان کو قرضوں کی دلدل میں دھنسا کر گیا ہے۔
ڈیرانوالہ میں ورکر کنونشن سے خطاب کرتے ہوئے احسن اقبال نے کہا کہ ہمارے ادارے الیکشن کا فیصلہ کریں گے، ہم الیکشن کیلئے تیار ہیں، پی ٹی آئی کی قیادت کو عوام کے سامنے مہنگائی اور ملک کی تباہی کا جواب دینا پڑے گا، مسلم لیگ (ن) اپنے 5 سال کی کارگردگی پر لوگوں کے پاس جائے گی، جب بھی الیکشن کا اعلان ہو گا ہم عوام کے سامنے جائیں گے اور عوام کارگردگی پر ہمیں ووٹ دیں گے۔
وفاقی وزیر منصوبہ بندی احسن اقبال نے مزید کہا ہے کہ الیکشن کا فیصلہ ملک کی سکیورٹی اور آئینی معاملات پر کرنا ہے، چھٹی مردم شماری ہو رہی ہے، یہ فیصلہ انہوں نے کرنا ہے کیا الیکشن آدھی پرانی مردم شماری پر آدھی نئی مردم شماری پر ہونے ہیں، سارے الیکشن ایک مردم شماری پر ہونے ہیں، پرانی مردم شماری پر الیکشن کروائے گئے تو اس کے 6 ماہ بعد نئی حلقہ بندی ہو جائے گی۔
احسن اقبال نے کہا ہے کہ 2013 میں مہنگائی کا جن بوتل سے باہر نکلا ہوا تھا، مسلم لیگ (ن) نے نواز شریف کی قیادت میں مہنگائی کے جن کو بوتل میں بند کیا، 2018 میں جب ہماری حکومت چھینی گئی تو ملک میں مہنگائی نام کی کوئی چیز نہیں تھی، 4 سال بعد جب عمران خان حکومت چھوڑ کر گیا ہے تو مہنگائی کے جن کو بوتل سے نکال کر گیا ہے، پاکستان کو قرضوں کی دلدل میں دھنسا کر گیا ہے۔
وفاقی وزیر منصوبہ بندی نے کہا کہ صحت مند ہونے کیلئے کڑوی گولی بھی کھانی پڑتی ہے، اگر ہم نے اس ملک کا علاج کرنا ہے تو کڑوی گولیاں کھانا پڑیں گی، ہم نے صحیح علاج کر لیا تو 2 ، 3 سال میں ملک دوبارہ اسی طرح دوڑے گا جیسے 2017 ،18 میں چھوڑا تھا، 4 سالوں میں ان کے پاس پوری حکومت تھی، مرکز میں جسے چاہتا تھا جیلوں میں میں ڈال دیتا تھا، طاقتور ترین وزیراعظم تھا۔
احسن اقبال نے مزید کہا کہ ہر بات میں کہتے تھے ہماری پشت پر فوج کھڑی ہے، فوج بھی، عدالتیں بھی ان کے ساتھ تھیں، اپوزیشن کو جیلوں میں ڈال دیا تھا، 4 سال میں کراچی سے لے کر پشاور تک کوئی ایک منصوبہ ہے جسے عمران خان کہے کہ میرے دماغ کی سوچ ہے۔
کراچی: (ویب ڈیسک) پاکستان سپر لیگ (پی ایس ایل) 8 کے حوالے سے نیشنل سٹیڈیم کراچی میں تیاریوں کا آغاز کر دیا گیا۔
نیشنل سٹیڈیم کراچی میں پوسٹرز آویزاں کر دیے گئے، سٹیڈیم میں پی ایس ایل کی تمام ٹیموں کے کپتانوں کی تصویریں آویزاں کی گئی ہیں۔
کراچی نیشنل میں سٹیڈیم میں پی ایس ایل 8 کے آفیشل سلوگن سب ستارے ہمارے کے پوسٹر بھی آویزاں کر دیے گئے جبکہ سٹیڈیم میں انکلوژرز کی صفائی ستھرائی کا کام بھی تیزی سے جاری ہے۔
یاد رہے کہ پاکستان سپر لیگ (پی ایس ایل) 8 کا باقاعدہ آغاز 13 فروری سے ہو رہا ہے، ایونٹ کے پہلے میچ میں ملتان سلطانز اور لاہور قلندرز کی ٹیمیں آمنے سامنے ہوں گی۔
اسلام آباد: (ویب ڈیسک) وزیر اعظم محمد شہباز شریف نے کہا ہے کہ ایک گمنام پاکستانی کی مثال دیکھ کر دل بہت متاثر ہوا ہے ۔
سماجی رابطے کی ویب سائٹ ٹوئٹر پر اپنے پیغام میں وزیر اعظم شہباز شریف نے کہا کہ گمنام پاکستانی نے امریکا میں ترکیہ کے سفارت خانے جا کر ترکی اور شام میں زلزلہ زدگان کی مدد کے لیے 30 ملین ڈالر کا عطیہ دیا۔
وزیر اعظم نے کہا کہ یہ انسان دوستی کے ایسے شاندار کام ہیں جو انسانیت کو بظاہر ناقابل تسخیر مشکلات پر فتح حاصل کرنے کے قابل بناتے ہیں۔
لاہور: (ویب ڈیسک) سابق وزیر اعظم اور چیئرمین پاکستان تحریک انصاف عمران خان نے کہا ہے کہ قانون کی حکمرانی کے بغیر جمہوریت قائم نہیں ہو سکتی۔
سماجی رابطے کی ویب سائٹ ٹویٹر پر ہائی کورٹ کے فیصلے پر ردعمل میں عمران خان نے کہا کہ ایک مضبوط، آزاد، معتبر عدالتی نظام قانون کی حکمرانی کو یقینی بناتا ہے اور آئین کی حفاظت کرتا ہے۔
سابق وزیر اعظم نے ٹوئٹ میں مزید کہا قوم انتخابات کے حوالے سے لاہور ہائیکورٹ کے فیصلے کو سراہتی ہے، آئین کو برقرار رکھنے اور عدالتی نظام میں امید کی بحالی کیلئے عدلیہ کے ساتھ کھڑی ہے۔
علاوہ ازیں چیئرمین پی ٹی آئی عمران خان سے صدر ڈسٹرکٹ بار ایسوسی ایشن گوجرانوالہ چودھری پرویز عابد ہرل ایڈووکیٹ کی قیادت میں وکلاء وفد نے ملاقات کی، اس موقع پر انہوں نے تحریک انصاف میں باضابطہ طور پر شمولیت اختیار کر لی۔
وکلاء وفد کی جانب سے ملک میں قانون کی بالادستی کیلئے عمران خان کی کاوشوں کی بھرپور تائید کا اعلان بھی کیا گیا، چیئرمین تحریک انصاف نے چودھری پرویز عابد ہرل ایڈووکیٹ اور دیگر وکلاء کا شمولیت پر خیرمقدم کیا۔
کراچی: (ویب ڈیسک) ایم کیو ایم پاکستان نے کراچی میں حلقہ بندیوں کے خلاف کل ہونے والا دھرنا مؤخر کر دیا۔
گورنر سندھ کامران ٹیسوری نے ایم کیو ایم پاکستان کے کنوینئر خالد مقبول صدیقی کے ساتھ میڈیا سے گفتگو کرتے ہوئے کہا کہ اس وقت ملک میں پاک بحریہ کی ایکسپو جاری ہے، جو 14 فروری تک جاری رہے گی، دنیا بھر کے مندوبین اس وقت کراچی میں موجود ہیں، عالمی میڈیا بھی کراچی میں ہے، ایم کیو ایم کی جانب سے کل غیر معینہ مدت کیلئے دھرنے کا اعلان کیا گیا تھا۔
گورنر سندھ نے خالد مقبول صدیقی سے کل کے دھرنے کو مؤخر کرنے کی درخواست کرتے ہوئے کہا کہ پیپلز پارٹی کے ساتھ معاہدے میں مردم شماری کرانا بھی شامل ہے، راستے میں بلاول بھٹو، چیف منسٹر سے بات ہوئی، چیف منسٹر نے کہا 53 حلقوں میں مردم شماری کرانے کیلئے خط لکھ دیا تھا، الیکشن کمیشن کی جانب سے بلدیاتی الیکشن سے پہلےمردم شماری نہیں کرائی گئی۔
اس موقع پر گفتگو کرتے ہوئے ایم کیو ایم کے کنوینئر خالد مقبول صدیقی نے کہا کہ گورنر سندھ وفاق اور ہمارے بھی نمائندے ہیں، وہ اہم پیغام لیکر آئےہیں، بحریہ کی ایکسپو میں کوئی رکاوٹ نہیں ڈالنا چاہتے، تقریباً 58 ممالک کےمندوبین اس وقت کراچی میں ہیں، بحریہ کی مشقیں ختم ہونے تک دھرنے کو مؤخر کر رہے ہیں، ہمارے ڈیڑھ کروڑ کے بینرز لگ چکے تھے، آج ہم نے پھر حب الوطنی ثابت کی ہے۔
خالد مقبول صدیقی نے مزید کہا کہ دو، چار دن کا فرق ہے، سٹرکیں ہمارا انتظار کر رہی ہیں، بحریہ کی مشقیں ختم ہونے پر دھرنے کی تاریخ کا فیصلہ کریں گے، رابطہ کمیٹی میں مشاورت کے بعد اپنا حتمی فیصلہ گورنر کو بتا دیں گے، سنجیدگی کو نہ دیکھتے ہوئے ہمیں انتہائی اقدام اٹھانا پڑا، گورنر سندھ کی تجویز پر رابطہ کمیٹی کے اجلاس میں مشاورت کریں گے۔
کنوینئر ایم کیو ایم نے کہا کہ چینی صدر کے دورے کے دوران دھرنے کو مؤخر نہیں کیا گیا تھا، ہم پاکستان کی محبت کیلئے دھرنے کی قربانی دینے کو تیار ہیں، ہم شہر کے حق کی بات کر رہے ہیں، ہم عوام کیلئے جدوجہد کر رہے ہیں، ہمارا کوئی سیاسی مفاد نہیں ہے، ہماری جدوجہد کی بنیاد سب سے پہلے پاکستان ہے، کراچی پاکستان کا معاشی حب ہے، اس کے استحکام کے ساتھ پاکستان کا استحکام وابستہ ہے۔
خالد مقبول صدیقی نے مزید کہا کراچی میں بلدیاتی حلقہ بندیاں بدنیتی پر مبنی تھیں، حلقہ بندیوں میں غلطیاں شائد جان بوجھ کر کی گئیں، ہم نے کہا تھا کم سے کم 73 یوسیز میں اضافہ کیا جائے، بلدیاتی انتخابات غیر آئینی وغیر قانونی تھے، ہمارے مطالبے کے پیچھے اپنا میئر لانا نہیں تھا، ہمارا مطالبہ کراچی کو حق دلانا تھا، گورنر سندھ نے خالد مقبول صدیقی کا شکریہ ادا کرتے ہوئے کہا کہ امید ہے پاکستان کی بہتری کیلئے فیصلہ کریں گے۔
گورنر سندھ کامران ٹیسوری نے کہا کہ رابطہ کمیٹی کی اکثریتی رائے ہے اب پیپلز پارٹی سے مذاکرات نہیں کرنے، چیف منسٹر نے کہا ہے ڈرافٹ تیار کر رہے ہیں رات تک مل جائے گا، خالد مقبول صدیقی نے کہا پہلے ڈرافٹ کو دیکھ لیتے ہیں، پیپلز پارٹی کے ساتھ ملاقات میں لاپتا افراد، دفاتر کی بحالی کا معاملہ لازمی اٹھایا جاتا ہے، جماعت اسلامی کا احتجاج سب کے سامنے ہے۔
اسلام آباد: (ویب ڈیسک) الیکشن کمیشن کا لاہور ہائی کورٹ کے فیصلہ کے تناظر میں صوبائی اسمبلی پنجاب کے انتخابات کے انعقاد کے حوالہ سے لائحہ عمل اور عملدرآمد پر غور کیلئے اجلاس پیر کو ہوگا۔
الیکشن کمیشن کے مطابق چیف الیکشن کمشنر سکندر سلطان راجہ نے جنرل الیکشن صوبائی اسمبلی پنجاب کے انعقاد کے لئے 10 فروری کو لاہور ہائی کورٹ کے دئیے گئے فیصلہ کی روشنی میں الیکشن کمیشن کا خصوصی اجلاس پیر کو صبح 11 بجے الیکشن کمیشن سیکرٹریٹ میں طلب کر لیا ہے۔
الیکشن کمیشن کے اجلاس میں معزز عدالت کے فیصلے کو مد نظر رکھتے ہوئے صوبائی اسمبلی پنجاب کے انتخابات کے انعقاد کے حوالے سے آئندہ کے لائحہ عمل اور عملدرآمد پر غور کیا جائے گا۔
اسلام آباد: (ویب ڈیسک) اسلام آباد ہائی کورٹ نے سربراہ عوامی مسلم لیگ شیخ رشید احمد کی ضمانت کی درخواست منظور کر لی۔
اسلام آباد ہائیکورٹ نے سابق صدر آصف علی زرداری پر عمران خان کو قتل کرنے کی مبینہ سازش کے الزام پر تھانہ آبپارہ میں درج مقدمے میں سابق وزیر داخلہ شیخ رشید کی اپیل منظور کی۔
شیخ رشید احمد کی ضمانت کی درخواست پیر کو سماعت کیلئے مقرر کی گئی ہے، سماعت اسلام آباد ہائیکورٹ کے جسٹس محسن اختر کیانی کریں گے، رجسٹرار آفس نے کاز لسٹ جاری کر دی۔
کوئٹہ: (ویب ڈیسک) وزیر اعلیٰ بلوچستان عبدالقدوس بزنجو نے کہا ہے کہ عوام کی خدمت کیلئے دن رات کوشاں ہیں، بلوچستان میں تمام شعبوں میں اصلاحات کیلئے اقدامات کر رہے ہیں۔
کوئٹہ میں پریس کانفرنس کرتے ہوئے وزیر اعلیٰ بلوچستان نے کہا کہ لوکل باڈی الیکشن میں کسی جماعت نے انگلی نہیں اٹھائی، سپورٹ کرنے والی تمام پارٹیوں کا شکر گزار ہوں، اتنا کمزور نہیں ہوں، استعفیٰ نہیں دوں گا، ہمت نہیں ہاروں گا، مشکلات کا سامنا کروں گا، مشکلات اللہ کی طرف سے آتی ہیں، میں نے کہا تھا جوڈیشری اپنا کام نہیں کر رہی، عدلیہ اور باقی اداروں کی طرف سے مشکلات آ رہی ہیں۔
عبدالقدوس بزنجو نے کہا شائد الیکشن میں بھی حصہ نہ لوں، کافی دنوں سے سوچ رہا تھا اس کرسی پر رہوں گا یا نہیں، الیکشن کمیشن کے گوشواروں میں الیکشن اخراجات پر جھوٹ بولا جاتا ہے، الیکشن میں کوئی بھی 10 سے 15 کروڑ سے کم خرچ نہیں کرتا، تمام مسائل کا ملبہ سیاست دانوں پر ڈالا جاتا ہے، ووٹرز دن رات محنت کر کے ہمیں اقتدار تک پہنچاتے ہیں، سیاست دانوں کی کوئی تعریف نہیں کرتا۔
وزیر اعلیٰ بلوچستان عبدالقدوس بزنجو نے کہا سسٹم میں بہت خامیاں اور مشکلات بہت زیادہ ہیں، سیلاب ہمارے لیے بہت بڑا امتحان تھا، سیلاب کے دوران میں نے فوٹو شاپ پر زیادہ توجہ نہیں دی، سیلاب ایک ضلع نہیں پورے بلوچستان میں آیا تھا، فیصلہ کیا تھا سیلاب کے دوران کسی کے آگے ہاتھ نہیں پھیلائیں گے، صرف اللہ کے آگے پھیلائیں گے، محدود وسائل کے باوجود سیلاب متاثرین کی ہر ممکن مدد کی۔
واشنگٹن: (ویب ڈیسک) امریکی فضاؤں میں جاسوسی غبارے بھیجنے پر صدر جوبائیڈن نے چین کی فوج سے منسلک 6 اہم اداروں پر پابندی عائد کردی۔
عالمی خبر رساں ادارے کے مطابق امریکا کے کامرس ڈیپارٹمنٹ کی جانب سے جاری بیان میں کہا گیا ہے کہ صدر جوبائیڈن نے چین کی 5 کمپنیوں اور ایک ریسرچ انسٹیٹیوٹ پر پابندی عائد کردی ہے۔
امریکا نے جن کمپنیوں پر پابندی عائد کی ہے وہ چین کے نگرانی کے بیلون پروگرام سے منسلک تھے۔ ان سب کو امریکا میں بلیک لسٹ کردیا گیا ہے۔ بلیک لسٹ میں نانگ یانگ ایوی ایشن ٹیکالوجی اور ڈونگ گوانگ لنگ کونگ ٹیکنالوجی بھی شامل ہے۔
یہ کمپنیاں چین کی فوج کے لیے طیاروں اور جاسوسی غباروں پر مشتمل ہوا بازی کے جدید پروگرامز تیار کر رہی ہیں۔ امریکا نے جاسوسی غباروں کی فضائی حدود میں داخل ہونے کو قومی سلامتی کے لیے خطرہ قرار دیا تھا۔
خیال رہے کی رواں ہفتے امریکا نے ایک جاسوسی غبارہ اور ایک مشکوک چیز کو فضا میں ناکارہ بنانے کا دعویٰ کیا ہے جو چین کی جانب سے امریکی فضائی حدود میں بھیجے گئے تھے۔
دوسری جانب چین نے مؤقف اختیار کیا ہے کہ جاسوسی غبارے موسمیاتی تبدیلیوں پر کام کرنے والی ایک پرائیوٹ کمپنی کی ملکیت تھے جس کا چین کی فوج سے کچھ لینا دینا نہیں تاہم چین نے جاسوسی غبارے کو تباہ کرنے پر شدید تنقید بھی کی تھی۔
