ویب ڈیسک: ملک کے مختلف حصوں میں موسم ایک بار پھر بدلنے جا رہا ہے، جہاں محکمہ موسمیات نے 4 اپریل تک بارشوں اور بعض علاقوں میں ژالہ باری کی پیشگوئی کی ہے۔

تفصیلات کے مطا بق خاص طور پر بالائی علاقوں جیسے خیبر پختونخوا، کشمیر اور گلگتدارالحکومت اسلام آباد میں آج مطلع جزوی طور پر ابر آلود رہنے کی توقع ہے، جبکہ شام اور رات کے وقت مختلف مقامات پر بارش ہو سکتی ہے۔ حالیہ بارشوں کے باعث درجہ حرارت میں نمایاں کمی آئی ہے، جہاں صبح کے وقت درجہ حرارت 17 ڈگری سینٹی گریڈ ریکارڈ کیا گیا، اور دن کے دوران یہ 28 ڈگری تک جا سکتا ہے۔ ہوا کی رفتار تقریباً 11 کلومیٹر فی گھنٹہ ہے اور نمی کا تناسب 44 فیصد سے زائد ریکارڈ کیا گیا۔ بلتستان میں گرج چمک کے ساتھ بارش متوقع ہے، جبکہ بلند پہاڑی مقامات پر برفباری کا بھی امکان ظاہر کیا گیا ہے۔

صوبائی دارالحکومت لاہور میں بادل اور دھوپ کے درمیان آنکھ مچولی جاری ہے۔ یہاں بارش کے امکانات کم، تقریباً 10 فیصد بتائے گئے ہیں۔ موجودہ درجہ حرارت 25 ڈگری سینٹی گریڈ ہے جبکہ زیادہ سے زیادہ 34 اور کم سے کم 21 ڈگری تک جانے کی توقع ہے۔ ہوا کی رفتار 6 کلومیٹر فی گھنٹہ اور نمی کا تناسب 40 فیصد ریکارڈ کیا گیا ہے۔

لاہور میں فضائی آلودگی بھی بدستور تشویشناک ہے، جہاں مجموعی ایئر کوالٹی انڈیکس 169 تک پہنچ گیا ہے، جو صحت کے لیے مضر سمجھا جاتا ہے۔ مختلف علاقوں میں صورتحال مزید خراب ہے، جن میں علامہ اقبال ٹاؤن (244)، ڈی ایچ اے فیز 5 (184) اور ماڈل ٹاؤن (180) شامل ہیں۔

اسلام آباد(2 اپریل 2026): عالمی مالیاتی فنڈ (آئی ایم ایف) نے حکومت پاکستان کو عوام کے لیے پیٹرول پر عام سبسڈی دینے سے روک دیا ہے۔

ذرائع کے مطابق آئی ایم ایف نے مطالبہ کیا ہے کہ پیٹرول پر سبسڈی صرف مخصوص غریب طبقے تک محدود رکھی جائے۔آئی ایم ایف کے موقف کے مطابق اگر حکومت نے پیٹرولیم مصنوعات پر طویل عرصے تک سبسڈی کا سلسلہ جاری رکھا تو اس سے ملکی معیشت مزید بگڑنے کا خدشہ ہے۔

عالمی ادارے نے تجویز دی ہے کہ حکومت پیٹرول سستا کرنے کے بجائے بے نظیر انکم سپورٹ پروگرام (بی آئی ایس پی) کے تحت فراہم کیے جانے والے اعزازیہ میں 5000 روپے کا اضافہ کرے۔

ذرائع کا کہنا ہے کہ آئی ایم ایف کے مطالبات کی روشنی میں اب جنوری 2027 سے بے نظیر انکم سپورٹ پروگرام کے مستحقین کو 19 ہزار 500 روپے فراہم کیے جائیں گے۔ وفاقی حکومت نے آئی ایم ایف کو بی آئی ایس پی کے فنڈز اور اعزازیہ میں اضافے کی یقین دہانی کروا دی ہے۔

دوسری جانب وفاقی حکومت نے آئی ایم ایف کے ساتھ مذاکرات کے بعد فی الحال کھاد اور زرعی ادویات پر فیڈرل ایکسائز ڈیوٹی (ایف ای ڈی) عائد کرنے کا معاملہ بھی مؤخر کر دیا ہے۔

حکومت کا ماننا ہے کہ براہِ راست نقد امداد کے ذریعے غریب طبقے کو مہنگائی کے اثرات سے بہتر طور پر بچایا جا سکتا ہے۔

مشرق وسطیٰ کی صورتحال کے باعث فلائٹ آپریشن اپریل کے دوسرے روز بھی بری طرح متاثر ہوا۔

اسلام آباد ایئرپورٹ نمبر لے گیا سب سے زیادہ پروازیں متاثر ہوئیں، کراچی دوسرے نمبر پر رہا، ملک کے بین الاقوامی 5 ایئرپورٹس سے مشرق وسطیٰ کے مختلف ایئرپورٹس کی دو طرفہ 64 پروازیں منسوخ ہوئیں۔

پی آئی اے، ایئربلو، ایئرعربیہ، ایران ایئر، قطر سمیت دیگر ایئرلائنز کی فلائٹس شامل ہیں، کراچی ایئرپورٹ سے ابوظہبی، جدہ مشہد، شارجہ، مدینہ، دوحہ، دبئی کی دو طرفہ 18 پروازیں منسوخ ہوئیں۔

اسلام آباد ایئر پورٹ سے دوطرفہ 34 پروازیں منسوخ ہوئیں جن میں الفجیرا، شارجہ، جدہ، ابوظہبی، تہران، دبئی، بحرین، ریاض، دوحہ کی پروازیں شامل ہیں۔
لاہور ایئرپورٹ پر مشرق وسطیٰ کی پروازوں کے آپریشن میں دوطرفہ 2 پروازیں منسوخ ہوئیں جن میں دمام سیکٹر شامل ہے، پشاور ایئرپورٹ پر دمام، دبئی، دوحہ، شارجه، ابوظہبی کی دوطرفہ 8 پروازیں منسوخ ہوئیں، ملتان ایئرپورٹ سے دبئی کی دوطرفہ صرف دو پروازیں منسوخ ہوئیں۔

ایئرپورٹ ذرائع کے مطابق پاکستان سے 33 دن کے دوران مشرق وسطیٰ کی مجموعی منسوخ پروازوں کی تعداد2592 ہوگئی۔

وزارت داخلہ نے گھریلو سروے کے ڈیٹا کی سیکیورٹی نادرا کے سپرد کر دی

اسلام آباد کے گھریلو سروے سے حاصل ہونے والا ڈیٹا محفوظ بنانا بڑا چیلنج بن گیا،  پرسنل ڈیٹا پروٹیکیشن بل تا حال پارلیمان سے منظور نہ ہونے کے باعث حکومت نےڈیٹا کی سیکیورٹی نادرا کے حوالے کردی۔

پارلیمان میں جمع کرائی گئی رپورٹ کےمطابق اسلام آباد ہاؤس ہولڈ سروے ایپلی کیشن میں کثیرسطح کا دفاعی ماڈل اپنایا گیا ہے۔ مخصوص مقصد کے بغیر ڈیٹا تک رسائی ممکن نہیں۔ دستاویز کے مطابق پاکستان میں ڈیٹا کے تحفظ سے متعلق کوئی علیحدہ قانون موجود نہیں۔

تمام  ڈیٹا نادرا آرڈیننس دوہزار کے تحت قانونی طور پر محفوظ ہے، اور نادرا نیشنل سرٹ کےجاری شدہ قومی سائبرسیکیورٹی معیارات کا پابند ہے۔ نادرا نے پاکستان سیکیورٹی اسٹینڈرڈز فریم ورک نافذ کیا ہے۔ تمام  ڈیٹا کی سیکیورٹی، رازداری اور خفیہ پن کو یقینی بنایا گیا ہے۔ اسلام آباد ہاؤس ہولڈ سروے ایپلی کیشن میں کثیر سطح کا دفاعی ماڈل اپنایا گیا ہے۔ چوبیس گھنٹےسیکیورٹی آپریشنز سینٹر کی نگرانی کی سہولت بھی ہے ۔ دستاویز  کے مطابق نادرا آرڈیننس میں ڈیٹا لیک، غیر مجاز رسائی، افشا یا چوری پر چودہ سال تک قید کی سزا ہے۔

شہریوں کے ڈیٹا سے چھیڑ چھاڑ کو ریاست کے خلاف سنگین جرم سمجھا جاتا ہے۔