راولپنڈی: بانی پی ٹی آئی و سابق وزیراعظم عمران خان نے کہا ہے کہ دنیا کے کسی چیف جسٹس نے ایسا نہیں کیا جو پاکستان کا چیف جسٹس  کررہا ہے قاضی فائز عیسیٰ جیسی حرکتیں کررہا ہے مجھے وہ ذہنی طور پر تندرست نہیں لگتا۔

اڈیالہ جیل میں میڈیا سے بات چیت میں انہوں ںے کہا کہ یہ جو کچھ ہو رہا ہے یہ تین ایمپائرز اور تین کھلاڑی ہیں چوتھا ان کے ساتھ پی ڈی ایم ملی ہوئی ہے ان سب کو ایک دوسرے کی ضرورت ہے، قاضی فائز عیسیٰ نے پہلے سے ہی توسیع کا منصوبہ بنا رکھا تھا ہمارا انتخابی نشان لینے کا چیف جسٹس کا فیصلہ جانب دارانہ تھا۔

انہوں ںے کہا کہ سپریم کورٹ کے ججز نے مخصوص نشستوں کے کیس کے فیصلے میں یہ واضح کر دیا ہے چیف جسٹس نے پہلے فراڈ الیکشن کو تحفظ دیا اب یہ پی ٹی آئی کی نشستیں چھیننا شروع ہوگیا ہے، قاضی فائز عیسیٰ توسیع کے مفاد میں پی ٹی آئی کو کرش کر رہا ہے، ن لیگ اور پیپلز پارٹی فیملی جماعتیں ہیں ان کے پارٹی الیکشن کو کوئی نہیں پوچھتا ہمارے تین پارٹی انتخابات کالعدم کر دیئے گئے۔

سابق وزیراعظم نے کہا کہ چیف الیکشن کمشنر کو پتا ہے کہ جس دن الیکشن فراڈ کھلا اس پر آرٹیکل چھ لگے گا چیف الیکشن کمشنر اور چیف جسٹس ایک دوسرے کے ساتھ جڑے ہوئے ہیں دونوں کا مفاد توسیع میں ہے، اگر چیف جسٹس بے قصور تھا تو پنڈی کے کمشنر کے بیان کے بعد اسے کیوں نہیں بلایا؟ چیف جسٹس راولپنڈی کے کمشنر کے اغوا پر بات نہیں کرتا کیونکہ اس کا نام بھی بیچ میں ہے بتایا جائے کس ملک میں کمشنر کو اغوا کیا جاتا ہے؟

چیف جسٹس نے ٹریبونلز کی بجائے الیکشن کمیشن کے امپائرز کا فیصلہ کروا دیا تاکہ دو تہائی اکثریت حکومت کو دی جا سکے، چیف جسٹس اب 63 اے کے پیچھے پڑ گیا ہے تاکہ فلور کراسنگ کو جائز قرار دیا جاسکے اور انہیں توسیع مل سکے، دنیا کے کسی چیف جسٹس نے ایسا نہیں کیا جو پاکستان کا چیف جسٹس کررہا ہے چیف جسٹس جیسی حرکتیں کررہا ہے مجھے وہ ذہنی طور پر تندرست نہیں لگتا۔

بانی پی ٹی آئی نے کہا کہ ملک میں اخلاقیات کا قتل ہو رہا ہے ادارے تباہ ہو چکے ہیں، انہوں نے ہمیں این او سی نہیں دینا مگر ہم احتجاج کریں گے اوراگر این او سی دیا بھی تو انہوں نے ہمیں شہر سے باہر بھیج دینا ہے اور 6 بجے کا وقت دے کر سڑکیں بلاک کر دینی ہیں، ہم اسلام آباد اور مینار پاکستان پر بھی احتجاج کریں گے، قوم کو اب پاکستان کے لیے باہر نکلنا پڑے گا، قوم اور نوجوانوں کو کہتا ہوں کہ اپنے ملک اور مستقبل کے لیے نکلیں۔

عمران خان نے مزید کہا کہ 10 لاکھ لوگ ملک چھوڑ کر جا چکے ہیں، ایس آئی ایف سی کو سرمایہ کاری کے لیے بنایا گیا تھا مگر پیسہ ملک سے باہر جا رہا ہے، یہ اپنی ذات کے لیے ملک کو تباہ کر رہے ہیں انہیں کوئی فرق نہیں پڑتا، کل ہم لیاقت باغ میں بھرپور اختجاج کریں گے۔

  اسلام آباد: جمعیت علمائے اسلام مولانا فضل الرحمان نے فیصلہ کیا ہے کہ حکومتی اتحاد کی مجوزہ آئینی ترامیم کے حوالے سے اپوزیشن کی طرف سے اپنا الگ مسودہ تیار کرنے کا فیصلہ کرلیا ہے۔

جمعیت علمائے اسلام اور پاکستان تحریک انصاف (پی ٹی آئی) کے اجلاس کے دوران ہونے والے تبادلہ خیال اندرونی کہانی ایکسپریس نیوز کو موصول ہوئی ہے، جس کے مطابق مولانا فضل الرحمان نے اپوزیشن کی جانب سے آئینی ترامیم کا مسودہ  تیار کرنے فیصلہ کیا ہے، جس کے تحت قانونی و آئینی معاملات کو پیش نظر رکھتے ہوئے سلمان اکرم راجا اور کامران مرتضیٰ  مسودہ تیار کریں گے۔

مولانا فضل الرحمان نے کہا کہ اپنا مسودہ اور تجاویز ہمارے ہاتھ آجائیں تو پھر آگے بڑھا جائے گا، جب ہمارے ہاتھ میں کوئی مسودہ ہوگا تو پھر ہی کسی سے بات چیت کی جا سکتی ہے۔

انہوں نے کہا کہ کسی ایکسٹنشن کو نہیں مانتا نہ کسی ادارے کے سربراہ کو ایکسٹینشن دینے دیں گے، میری شوریٰ نے کہا کہ حکومت کے ساتھ نہیں جانا اور آئینی ترامیم کو مسترد کرو، مجھے معلوم ہے اس میں بہت ساری چیزیں غلط ہو رہی ہیں۔

مولانا فضل الرحمان نے کہا کہ پارلیمان کے اندر ووٹ اور باہر عوامی طاقت سے کسی بھی غیر آئینی اقدام کو روکیں گے۔

سلمان اکرم راجا نے کہا کہ ہم جمعے کو احتجاج کر رہے ہیں، اس کے بعد بیٹھیں گے، یہ بانی پی ٹی آئی کو ملٹری کورٹ میں لے جانا چاہتے ہیں۔

جمعیت علمائے اسلام اور پی ٹی آئی کے اجلاس میں آئینی ترامیم پر مشترکہ مسودہ لانے کا فیصلہ ہوا اور ذرائع نے بتایا کہ دونوں جماعتوں کے وکیل رہنما جمعے کو دوبارہ اسلام آباد میں ملاقات کریں گے۔

اپوزیشن کی جانب سے حکومتی آئینی ترامیم کا مسودہ سامنے آنے کے بعد اپنی تجاویز بھی سامنے رکھی جائیں گی۔

  اسلام آباد: آئی ایم ایف نے پاکستان کیلیے7 ارب ڈالرکے ایکسٹنڈڈ فنڈ پروگرام کی منظوری کے بعد بیل آؤٹ پیکیج کے تحت ایک ارب ڈالر کی قسط جاری کردی ۔

آئی ایم ایف کا کہنا ہے مشکل کاروباری ماحول، کمزور حکمرانی اور ریاست کا زیادہ عمل دخل سرمایہ کاری میں رکاوٹ بنتے ہیں جبکہ نئے قرض پروگرام کا مقصد میکرو اکنامک استحکام کی بحالی، سرکاری اداروں کی اصلاحات، عوامی خدمات کی فراہمی میں بہتری ہے۔

پاکستان میں معاشی شرح نمو 2.4 فیصد تک پہنچ گئی جبکہ افراط زر میں کمی ہوئی مگر بڑے مسائل کا بدستورسامنا ہے جن میں مشکل کاروباری ماحول، کمزور حکمرانی، اور محدود ٹیکس بیس شامل ہے۔

عالمی ادارے کے ایگزیکٹو بورڈ کے اجلاس کے متعلق اعلامیہ میں بتایا گیا کہ 37 ماہ پر محیط پروگرام پر شرح سود 5 فیصد سے کم ہوگی ۔ نئے قرض پروگرام کا مقصد میکرو اکنامک استحکام کی بحالی، سرکاری اداروں کی اصلاحات، عوامی خدمات کی فراہمی میں بہتری ،بنیادی ڈھانچے کی ترقی اور ماحولیاتی تبدیلیوں کے اثرات کا مقابلہ کرنے پر توجہ مرکوز کرنا مقصد ہے۔

پروگرام کی کامیابی کیلئے ترقیاتی شراکت داروں کی مسلسل مالی معاونت اہم ہوگی ۔ پاکستان نے 2023-24 ء میں سٹینڈ بائی ارینجمنٹ کے تحت پالیسی پر مسلسل عمل درآمد کیااور اقتصادی استحکام کیلئے اہم اقدامات کئے۔مالی سال 2024 ء میں شرح نمو 2.4 فیصد تک پہنچ گئی، اس کی وجہ زرعی سرگرمیاں ہیں جبکہ مہنگائی سنگل ڈیجیٹ تک آ گئی ۔

آئی ایم ایف کے مطابق مناسب مالیاتی اور مانیٹری پالیسیوں کے سبب رواں تجارتی خسارہ قابو میں رکھنے میں مدد ملی، اس سے زرمبادلہ بہتر بنانے کا موقع ملا ۔افراط زر میں کمی اندرونی اور بیرونی حالات میں بہتری کی عکاس ہے۔ سٹیٹ بینک نے جون سے اب تک پالیسی ریٹ میں 450 بیسز پوائنٹس کی کمی کی،جون 2024 ء میں مضبوط بجٹ پیش کیا۔

اس کے باوجود ملکی کمزوریاں اور مسائل سنگین ہیں ،مشکل کاروباری ماحول، کمزور حکمرانی اور ریاست کا زیادہ عمل دخل سرمایہ کاری میں رکاوٹ بنتے ہیں۔ایم ڈی کرسٹینا جارجیوا نے قرض پروگرام کی منظوری پر حکومت اور عوام کو مبارکباد دیتے ہوئے کہا ہے حکومت امیروں سے ٹیکس لے کر غریبوں کی مدد کررہی ہے۔

پاکستان کی معیشت درست سمت جارہی ہے۔ قرض منظوری کے بعد ان کا واشنگٹن سے جاری بیان میں کہنا تھا حکومت پاکستان امیروں سے ٹیکس لے کر غریبوں کی مدد کی رہی ہے جبکہ معاشی ترقی میں اضافہ ہو رہا ہے اور مہنگائی میں کمی ہورہی ہے،پاکستان نے اصلاحات کی ہیں جس کے باعث معیشت بہتر ہوگئی ہے۔ وزارت خزانہ ذرائع کے مطابق  پاکستان کو قرض پروگرام کے تحت  شرائط پرعمل درآمد کرنا ہوگا۔

  اسلام آباد: عالمی منڈی میں خام تیل کی قیمت میں کمی کے پیش نظر پاکستان میں یکم اکتوبر سے پٹرولیم مصنوعات کی قیمتوں میں کمی  متوقع  ہے۔

ذرائع  کے مطابق  پیٹرول کی قیمت میں ایک روپیہ فی لٹر ، ڈیزل کی قیمت 3 روپے فی لیٹر کمی کا امکان ظاہر کیا جا رہا ہے، پٹرول کی قیمت برقرار بھی رکھی جا سکتی ہے۔

اس حوالے سے حتمی اعلان 30 ستمبر کو وزیراعظم سے مشاورت کے بعد  وزیر خزانہ کریں گے۔