خیبر پختونخوا میں خناق خطرناک صورت اختیار کرگیا، جس سے متاثرہ 26 بچے جاں بحق ہو گئے۔

صوبائی محکمہ صحت کے مطابق خیبرپختونخوا میں خناق خطرناک حد تک پھیلاؤ اختیار کر چکا ہے، جس سے اب تک 26 بچے جاں بحق ہو گئے ہیں۔ جب کہ صوبے میں رواں سال 380 بچے خناق سےمتاثر ہوئے ۔

حکام کا کہنا ہے کہ مرض خناق میں پشاور سرفہرست ہے، جہاں سب سے زیادہ 12 بچے موت کے منہ میں چلے گئے۔ نوشہرہ اور چارسدہ میں 3،۔ 3 جب کہ ضلع مہمند میں 2 بچے جاں بحق ہوئے۔

جان کی بازی ہارنے والے بچوں میں زیادہ تر کی عمریں 5 سال سے زیادہ ہیں۔ خناق سے خیبرپختونخوا کے 27 اضلاع کی 228 یونین کونسلیں متاثر ہیں۔ حکام کا کہنا ہے کہ متاثرہ بچوں نے پیدائشی حفاظتی ٹیکہ جات کے کورس مکمل نہیں کیے۔

اسلام آباد ہائیکورٹ کے جسٹس میاں گل حسن اورنگزیب نے کہا ہے کہ پچھلی حکومت میں توشہ خانہ کی تفصیلات چھپائی جاتی تھیں۔

ہائیکورٹ  میں توشہ خانہ ٹو کیس میں بانی پی ٹی آئی کی درخواست ضمانت بعد از گرفتاری پر سماعت ہوئی۔

ایف آئی اے پراسیکیوٹر نے کہا کہ عدالت جو بھی فیصلہ کرے لیکن میڈیا میں پہلے سے ہے کہ ضمانت منظور ہو جائے گی۔ اس پر جسٹس میاں گل حسن اورنگزیب نے کہا کہ میڈیا اگر سنسنی نہیں پھیلائے گا تو ان کا کاروبار کیسے چلے گا۔

بانی پی ٹی آئی کے وکیل بیرسٹر سلمان صفدر نے دلائل دیے کہ الزام ہے بانی پی ٹی آئی نے ذاتی مفاد کے لیے اپنا اثرو رسوخ استعمال کیا ، چالان میں رسید پر بشری بی بی کا نام ہے، لیکن اس چالان میں یہ واضح نہیں مرکزی ملزم کون ہے؟  دو ملزمان ہیں اس میں دفعہ 109 میں کس کا کردار ہے کوئی واضح نہیں ، مقدمے کا اندراج ساڑھے تین برس سے زائد تاخیر سے کیا گیا، کوئی جرم نہیں ہوا، جس کیس میں جرم واضح نہ ہو تو کیس مزید انکوائری اور ضمانت کا ہے۔

بیرسٹر سلمان صفدر نے کہا کہ توشہ خانہ پالیسی کے مطابق تحائف لئے گئے ہیں، اس وقت ان تحائف کی جو مالیت تھی پالیسی کے مطابق ادا کرکے لیے، توشہ خانہ پالیسی 2018 کی سیکشن ٹو کے تحت تحائف لئے، جو قیمت کسٹم اور اپریزر نے لگائی ہم نے وہ قیمت دیکر تحفہ رکھ لیا ، آج انہوں نے ساڑھے تین سال بعد بیان بدلا ہے۔

جسٹس میاں گل حسن اورنگزیب نے پی ٹی آئی حکومت کی توشہ تفصیلات خفیہ رکھنے کی پالیسی پر اہم ریمارکس دیے کہ پچھلی حکومت توشہ خانہ کی تفصیلات نہیں بتاتی تھی، ہم پوچھتے تھے تو توشہ خانہ کی تفصیلات چھپائی جاتی تھیں، ہائیکورٹ میں گزشتہ حکومت کہہ رہی تھی کہ توشہ خانہ کا کسی کو پتہ نہیں ہونا چاہیے۔

بانی پی ٹی آئی کے وکیل سلمان صفدر نے دلائل مکمل کرتے ہوئے کہا کہ اپریزر صہیب عباسی کہتا ہے مجھے بانی پی ٹی آئی نے تھریٹ کیا ، جبکہ بانی پی ٹی آئی اور بشری بی بی کی تو ملاقات ہی صہیب عباسی سے کبھی نہیں ہوئی ، کسٹم کے تینوں افسران نے اپنے بیان میں کہا کہ ہم پر پریشر نہیں تھا ، اگر پریشر نہیں تھا تو انہوں نے پھر صحیح قیمت کیوں نہیں لگائی۔

ایف آئی اے پراسیکیوٹر نے دلائل دیے کہ بلغاری سیٹ توشہ خانہ میں جمع ہی نہیں کرایا گیا، ریاست کے تحفے کی کم قیمت لگوا کر ریاست کو نقصان پہنچایا گیا، بانی پی ٹی آئی اور اُنکی بیوی دونوں نے فائدہ اٹھایا۔

جسٹس میاں گل حسن اورنگزیب نے پوچھا کہ بانی پی ٹی آئی کو کیسے فائدہ ہوا؟ ایف آئی اے پراسیکیوٹر نے جواب دیا کہ جب بیوی کو فائدہ ملا تو شوہر کا بھی فائدہ ہوا۔

جسٹس میاں گل حسن اورنگزیب نے ریمارکس دیے کہ او پلیز، میری بیوی کی چیزیں میری نہیں ہیں، ہم پتہ نہیں کس دنیا میں ہیں۔

عدالت نے بانی پی ٹی آئی کی درخواست ضمانت میں وقفہ کردیا۔

خیبر پختونخوا کے چار اضلاع کے تمام طبی مراکز کو شمسی توانائی پر منتقل کرنے کا فیصلہ کیا گیا ہے۔

صوبائی مشیر صحت احتشام علی کے مطابق خیبر پختونخوا کے 4اضلاع کے تمام مراکز صحت شمسی توانائی پر منتقل  کیے جائیں گے، جن میں پشاور، صوابی، نوشہرہ اور  ہری پور کے تمام نان ٹیچنگ اسپتال شامل ہیں، جنہیں شمسی توانائی پر منتقل کردیا جائے گا۔

انہوں نے کہا کہ  ہیومن کیپٹل انویسٹمنٹ پروگرام کے تحت صوبے کے 4 اضلاع کے 195 مراکز صحت کی سولرائزیشن ہوگی۔  ان مراکز صحت میں 151 بنیادی مراکز صحت 25 دیہی مراکز صحت، 13 کیٹگری ڈی اسپتال اور 6 کیٹگری سی اسپتال شامل ہیں۔

مشیر صحت کا کہنا تھا کہ اس منصوبے کا مقصد ان اضلاع میں پرائمری ہیلتھ کئیر کی خدمات کو بہتر بنانا ہے۔

کراچی کی 11 سڑکوں پر عدالتی حکم کے باوجود تجاوزات کیخلاف آپریشن نہ ہو سکا۔

 سندھ ہائیکورٹ نے لسبیلہ سے گارڈن ویسٹ تک سڑکوں پر تجاوزات کیخلاف توہین عدالت کی درخواست پر ڈپٹی کمشنر ایسٹ، اینٹی انکروچمنٹ و دیگر کو نوٹس جاری کردیے۔

ہائیکورٹ میں لسبیلہ سے گارڈن ویسٹ تک سڑکوں پر تجاوزات کیخلاف توہین عدالت کی درخواست پر سماعت ہوئی، درخواست گزار وکیل نے موقف دیا کہ 2022 میں عدالت نے درخواست پر تجاوزات ہٹانے کا حکم دیا تھا لیکن عدالتی حکم کے باوجود گیارہ سڑکوں پر تجاوزات اب بھی قائم ہیں۔

اسلام گنج اسٹریٹ گارڈن تا لیاری ایکسپریس وے، اسلام گنج اسٹریٹ نشتر روڈ، رام نگر اسٹریٹ، کاشان حیدر اسٹریٹ، الفرید، مرزا اور جیو راج اسٹریٹ پر تجاوزات نہیں ہٹائے گئے، یوسف ملک اور ٹھارو لائن پر بھی تجاوزات قائم ہیں۔

ڈپٹی کمشنر ایسٹ اور اینٹی انکروچمنٹ سیل عدالتی حکم پر عملدرآمد نہیں کر رہے۔ عدالت نے توہین عدالت کی درخواست پر ڈپٹی کمشنر ایسٹ، اینٹی انکروچمنٹ ودیگر  کو نوٹس جاری کرتے ہوئے جواب طلب کرلیا۔

سپریم کورٹ کے آئینی بینچ نے سنی اتحاد کونسل کو پارلیمانی جماعت قرار دینے کے خلاف درخواست پر رجسڑار آفس کے اعتراضات برقرار رکھتے ہوئے خارج کر دی۔

جسٹس امین الدین خان کی سربراہی میں سات رکنی آئینی بینچ نے درخواست پر سماعت کی۔

مولوی اقبال حیدر نے کہا کہ میری جانب سے درخواست بروقت دائر کی گئی تھی، اب نظر ثانی کیس زیر التواء ہے، چاہتا ہوں کہ کسی مقدمے میں اس معاملے کو دیکھا جائے۔

جسٹس جمال خان مندوخیل نے نے کہا کہ آپ ہم سے غیر آئینی کام کیوں کروانا چاہتے ہیں، امیدواران کی مرضی ہے سیاسی جماعت میں شامل ہوں یا نہ ہوں۔

سربراہ آئینی بینچ جسٹس امین الدین خان نے ریمارکس دیے کہ مولوی اقبال صاحب آپ پھر اسی طرف جا رہے ہیں جس وجہ سے پابندی لگی تھی۔

عدالت نے درخواست پر رجسڑار آفس کے اعتراضات برقرار رکھتے ہوئے درخواست خارج کر دی۔

سائلین کو سپریم کورٹ تک رسائی نہ ملنے سے متعلق درخواست

آئینی بینچ نے سائلین کو سپریم کورٹ تک رسائی نہ ملنے سے متعلق درخواست بھی خارج کر دی۔ دوران سماعت، وکیل درخواست گزار نے کہا کہ 90 فیصد سائلین کو سپریم کورٹ تک رسائی ہی نہیں ملتی۔

جسٹس جمال خان مندوخیل نے ریمارکس دیے کہ ہم آپ کو براہ راست سن رہے ہیں اس سے زیادہ کیا رسائی چاہیے، آپ تو اپنے ہی ادارے کو برباد کر رہے ہیں، کوئی کہتا ہے ہماری عدلیہ کا نمبر 120 ہے اور کوئی کہتا ہے ہماری عدلیہ کا نمبر 150 ہے، پتہ نہیں یہ نمبر کہاں سے آتے ہیں۔

ٹرائل مکمل کرنے کیلیے ٹائم فریم طے کرنے کا کیس

اعلیٰ عدالتی فورمز پر ٹرائل مکمل کرنے کے لیے ٹائم فریم طے کرنے کی درخواست پر سماعت کے دوران جسٹس عائشہ ملک نے ریمارکس دیے کہ فوجداری قانون سمیت کئی قوانین میں ٹائم لائن موجود ہے۔ جسٹس جمال خان مندوخیل نے کہا کہ ٹائم لائن کے لیے پارلیمنٹ سے جاکر قانون سازی کروا لیں۔

درخواست گزار حسن رضا نے کہا کہ ٹرائل مکمل ہوتے ہوتے 20 سے 40 سال لگ جاتے ہیں۔

جسٹس عائشہ ملک نے ریمارکس دیے کہ ایسی عمومی باتیں نہ کریں اور الزام نہ لگائیں، سسٹم پرفیکٹ نہیں ہے لیکن پیش رفت ہو رہی ہے، آپ کی درخواست نیشنل جوڈیشل پالیسی سے متعلق ہے، آرٹیکل 184 کی شق تین کے تحت درخواست پر کسی کو ہدایت نہیں جاری کریں گے، جہاں اصلاحات ہو رہی ہیں وہاں جاکر شمولیت اختیار کریں، یہ ہمارا کام نہیں ہے۔

جسٹس جمال خان مندوخیل نے کہا کہ ہم آئین اور قانون کے تابع ہیں۔ جسٹس مسرت ہلالی نے کہا کہ اگر ہماری طرف سے بھی سخت ردعمل آیا تو مایوسی پھیلے گی۔

جسٹس عائشہ ملک نے ریمارکس دیے کہ عدالتی ریفارمز کے لیے لاء اینڈ جسٹس کمیشن موجود ہے، وہاں رجوع کریں۔ عدالت نے دلائل کے بعد درخواست خارج کر دی۔

پاکستان اسٹاک ایکسچینج میں آج پھر تیزی کا رجحان ہے، جس کے نتیجے میں انڈیکس 96 ہزار پوائنٹس کی بلند ترین سطح بھی عبور کرگیا۔

بازار حصص میں بدھ کے روز مارکیٹ کا آغاز ہی 605 پوائنٹس کی بڑی تیزی کے ساتھ ہوا، جس سے کے ایس ای 100 انڈیکس 96 ہزار پوائنٹس کی  نئی بلند ترین سطح عبور کرکے 96461 پوائنٹس کی سطح کو چھو گیا۔

بعد ازاں پی ایس ایکس میں 796 پوائنٹس کی تیزی کے ساتھ 100 انڈیکس بڑھ کر 96653 پوائنٹس کی نئی بلند ترین سطح پر آ گیا۔

واضح رہے کہ گزشتہ روز بھی پی ایس ایکس میں زبردست تیزی دیکھی گئی تھی اور کاروباری دورانیے میں 100 اندیکس بڑھ کر ایک موقع پر 95901 پوائنٹس کی سطح کو چھو چکا تھا۔

گزشتہ کئی ہفتوں سے پاکستان اسٹاک ایکسچینج میں  مسلسل تیزی کا رجحان ہے، اس دوران بازار حصص میں بلندی کے کئی نئے ریکارڈز بھی قائم ہوئے۔