لاہور: (ویب ڈیسک) ٹیکس چور شاپنگ مال اور برانڈ کے خلاف کریک ڈاؤن کے فیصلے کے تحت ٹیکس چوری پر نوٹس کا جواب نہ دینے 25 سے 30 لاکھ روپے جرمانے کی تجویز زیر غور ہے۔
آئندہ بجٹ میں ٹیکس چوروں کی شامت، ٹیکس چوروں کو جرمانے اور سزا کے ساتھ اکاؤنٹس بھی ضبط ہوں گے، ٹیکس چوری پر نوٹس کا جواب نہ دینے 25 سے30 لاکھ جرمانے کی تجویز سامنے آئی ہے، سیلز ٹیکس کی مشینیں نہ لگانے والوں کے خلاف بھرپور کارروائی ہو گی۔
ذرائع کے مطابق عوام سے سیلز ٹیکس وصول کرکے خزانے میں جمع نہ کرانے کی گرفت ہوگی، پوائنٹ آف سیلز مشینیں نہ لگانے والے شاپنگ مال شکنجے میں آئیں گے ۔

اسلام آباد : (ویب ڈیسک) چیئرمین ایف بی آر نے کہا ہےکہ اس دفعہ بڑا اچھا بجٹ آرہا ہے جس میں عوام کے لیے ریلیف ہے۔
اسلام آباد میں میڈیا سے گفتگو کرتے ہوئے فیڈرل بورڈ آف ریونیو کے چیئرمین عاصم احمد نے آئندہ مالی سال کے بجٹ کو اچھا بجٹ قرار دیا اور کہا کہ بجٹ میں عوام کے لیے ریلیف ہے۔
دوسری جانب ایف بی آر ذرائع کےمطابق آئندہ بجٹ میں ودہولڈنگ ٹیکسزکو کم کیا جائے گا اور جن ود ہولڈنگ ٹیکسز سے آمدن نہیں ہورہی انہیں ختم کیا جائےگا۔
ذرائع کا کہنا ہےکہ نان فائلرز پر ودہولڈنگ ٹیکس برقرار رہیں گے اور ودہولڈنگ ٹیکس کے ذریعے ڈاکیومینٹیشن جاری رہے گی۔

اسلام آباد: (ویب ڈیسک) اسلام آباد میں مارگلہ ہلز کے مختلف مقامات پر ایک مرتبہ پھر آگ لگ گئی۔ تفصیلات کے مطابق اسلام آباد ٹریفک پولیس نے دامن کوہ میں ہرقسم کی ٹریفک کا داخلہ بند کر دیا ہے۔
اس کے علاوہ دامن کوہ کےملحقہ دیہات کے لیے بھی ٹریفک کا داخلہ بند کردیا گیا ہے۔
واضح رہے کہ گزشتہ دنوں بھی مارگلہ ہلز کے جنگل میں آتشزدگی کا واقعہ پیش آیا تھا، اس کےعلاوہ گزشتہ ہفتے خیبرپختونخوا کے کئی جنگلات میں آگ لگنے کے واقعات رونما ہوئے ہیں۔

کامونکی : (ویب ڈیسک) کامونکی میں اوباش شخص کی جانب سے قتل کی دھمکیاں دے کر گھریلو ملازمہ کو مسلسل زیادتی کا نشانہ بنائے جانے کا انکشاف ہوا ہے۔تفصیلات کے مطابق کامونکی میں ڈیرہ امیر افضل کی 19 سالہ امن جاوید محلہ بلال پارک کے بلال انصاری کے گھر کام کرتی تھی، ڈیڑھ ماہ قبل بلال نے تشدد کرتے ہوئے اسے زبردستی جنسی ہوس کا نشانہ بنایا اور کسی کو بتانے کی صورت میں قتل کردینے کی دھمکیاں دیں۔
خوف کی وجہ سے لڑکی نے زبان نہ کھولی تو ملزم بلال بار بار اسے زیادتی کا نشانہ بناتا رہا، لڑکی حاملہ ہوگئی تو اس نے اپنی والدہ کو بتایا جس نے تھانہ سٹی میں مقدمہ درج کروایا۔
پولیس کا کہنا ہے کہ لڑکی کا طبی معائنہ کروایا جارہا ہے اور واقعہ کی تفتیش بھی کی جارہی ہے۔

کراچی: (ویب ڈیسک) اورنگی ٹاؤن میں پولیس مقابلے کے دوران تین ملزمان ہلاک ہوگئے جب کہ پولیس اہلکار اور ایک بچے سمیت تین افراد زخمی ہوئے۔
پولیس کے مطابق اورنگی ٹاؤن اقبال تھانے کی حدود میں اسنیپ چیکنگ پر مامور پولیس نے تین مشکوک موٹر سائیکل سواروں کو روکنے کی کوشش کی تاہم ملزمان نے فائرنگ کردی جس کے بعد فائرنگ کے تبادلے میں تین ملزمان موقع پر ہلاک ہوگئے۔
پولیس کا بتانا ہےکہ ملزمان کی فائرنگ سے پولیس اہلکار اور بچے سمیت دو راہگیر زخمی ہوئے جنہیں طبی امداد کے لیے عباسی شہید اسپتال منتقل کردیا گیا۔