کراچی: (ویب ڈیسک) کے الیکٹرک نے شہر کیلئے نیا لوڈشیڈنگ پلان جاری کردیا۔
ترجمان کے الیکٹرک کے مطابق نئی پالیسی کے تحت مستثنیٰ علاقوں میں 3گھنٹے لوڈشیڈنگ کی جائے گی۔
ترجمان کےالیکٹرک کا کہنا ہے کہ لوڈشیڈنگ والے علاقوں میں دورانیہ ایک سے دو گھنٹے کم کیا جائے گا۔
ترجمان کے الیکٹرک کے مطابق صارفین اپنا لوڈشیڈنگ کا شیڈول بذریعہ کے الیکٹرک ویب سائٹ، کے ای لائیو ایپ، واٹس ایپ یا ایس ایم ایس سے حاصل کر سکتے ہیں۔واضح رہے کہ کراچی میں لوڈ شیڈنگ کا دورانیہ 6 سے 18 گھنٹوں تک پہنچ گیا۔
ملک میں بجلی کا شارٹ فال ساڑھے 6 ہزار میگاواٹ ہوگیا ہے، کراچی میں بجلی کی لوڈ شیڈنگ سے عام شہریوں کے ساتھ کاروباری افراد بھی شدید متاثر ہیں، اس کے ساتھ خریداروں کو بھی پریشانی کا سامنا کرنا پڑ رہا ہے, عوام نے فوری طور پر لوڈ شیڈنگ کے خاتمےکا مطالبہ کیا۔

لاہور: (ویب ڈیسک) پیپلزپارٹی کی مرکزی نائب صدر اور وفاقی وزیر سینیٹر شیری رحمان نے کہا ہے کہ سابق وزیر داخلہ شیخ رشید اعتراف کر رہے ہیں کہ حکومت اور عمران خان کو عدم اعتماد کا چار ماہ پہلے علم تھا۔
سینیٹر شیری رحمن نے اپنے بیان میں کہا کہ یہ کون سی عالمی سازش تھی جس کا عمران خان اور حکومت کو چار ماہ پہلے ہی علم تھا، اگر یہ عالمی سازش تھی تو عمران خان نے اسے روکنے کے لئے کیا اقدامات اٹھائے؟ عالمی سازش تھی تو پارلیمنٹ کی نیشنل سکیورٹی کمیٹی کو کیوں آگاہ نہیں کیا گیا؟
شیری رحمان نے کہا کہ سابق وزیر داخلہ کا بیان “عالمی سازش” کے بیانیے کے تابوت میں آخری کیل ہے، عمران خان نے عدم اعتماد کے آئینی معاملے کو سازش کے بیانیے میں تبدیل کرنے کی کوشش کی، حکومت سے نکلنے کے بعد عمران خان ملک میں انتشار اور تقسیم کی سیاست کر رہے ہیں۔

لاہور: (ویب ڈیسک) سابق وزیراعظم عمران خان کا کہنا ہے کہ جب سیاست میں آیا تو اپنے مرنے کے خوف پر قابو پالیا، آج 16 جماعتیں میرے خلاف ہیں اور میں اکیلا ہوں۔؎
چیئرمین پی ٹی آئی عمران خان نے برطانوی ٹی وی کو انٹرویو دیتے ہوئے کہا کہ میرے خلاف منصوبہ بندی کرنے والے پریشان ہیں، وہ مجھے واپس نہیں چاہتے، روس صرف ایک دن کے لیے گیا ،نہیں جانتا تھا کہ کیا ہونے والا ہے۔
ایک گھنٹے میں طے کرنا تھا کہ روسی صدر سے ملاقات کرنی ہے یا نہیں، عراق افغانستان اور یوکرین میں تمام فوجی کارروائیوں کے خلاف ہوں،
زیادہ آبادی والے ممالک کو دیگر ممالک کے ساتھ تعلقات قائم رکھنے چاہئیں، بھارت نے اپنے لوگوں کے فائدے کے لیے پالیسیاں بنائی ہیں، ہمیں بھی آزاد خارجہ پالیسیاں بنانی چاہیئں جو عوامی مفاد میں ہوں۔

لاہور : (ویب ڈیسک) چوہدری برادران نے سیاسی اختلافات پر حتمی فیصلوں کے لئے اہم ملاقات کا فیصلہ کرلیا۔
ذرائع کے مطابق چوہدری شجاعت حسین، چوہدری پرویزالہی اور چوہدری وجاہت حسین جلد ملاقات کریں گے، چوہدری خاندان کے تینوں بڑے مسلم لیگ ق کے آئندہ مستقبل کے حوالے سے فیصلہ کن ملاقات کریں گے۔
مسلم لیگ ق کے ارکان قومی و صوبائی اسمبلی اور پارٹی تنظیم کا بھی جلد اجلاس بلانے کا فیصلہ کیا گیا ہے، چوہدری شجاعت حسین اور چوہدری سالک حسین کے شہباز حکومت کی حمایت کی وجہ سے مسلم لیگ ق کی قیادت اختلافات کا شکار ہے۔
چوہدری پرویزالہی ،چوہدری مونس الہی اور حسین الہی سیاسی الائنمنٹ تحریک انصاف کے ساتھ رکھنا چاہتے ہیں، جبکہ مسلم لیگ ق کے ایم این اے حسین الہی بھی شہباز حکومت کی حمایت کے معاملے چوہدری شجاعت اورسالک حسین کے فیصلے کے مخالف ہیں۔
حسین الہی مستقبل کی سیاست میں ایم این اے مونس الہی کے ساتھ ملکر فیصلے کرنا چاہتے ہیں۔

ریاض: (ویب ڈیسک) سعودی عرب میں مسجد نبوی ﷺ میں پیش آنے والے نعرے بازی کے واقعے پر پاکستانی شہری کو سزا سنا دی گئی۔
سعودی عدالت نے پاکستانی شہری محمد طاہر کو تین سال قید کی سزا سناتے ہوئے دس ہزار ریال جرمانہ بھی عائد کیا۔ محمد طاہر پر الزام تھا کہ انھوں نے مسجد نبوی ﷺ میں پاکستانی وفد سے بدتمیزی اور افراتفری کی ویڈیو سوشل میڈیا ایپ ٹک ٹاک پر اپ لوڈ کی جو بعد میں وائرل ہوئی۔
محمد طاہرعدالتی فیصلے کے خلاف تیس روز کے اندر اپیل دائر کر سکتے ہیں۔

اسلام آباد: (ویب ڈیسک) اسلام آباد ہائیکورٹ کے سابق جج شوکت عزیز صدیقی کی برطرفی کیخلاف اپیل سماعت کیلئے مقرر ہو گئی۔
چیف جسٹس پاکستان عمر عطا بندیال کی سربراہی میں پانچ رکنی لارجر بنچ 13 جون کو سماعت کرے گا، جسٹس سردار طارق،جسٹس اعجاز الاحسن اور جسٹس مظہر عالم بنچ میں شامل جسٹس سجاد علی شاہ بھی لارجر بنچ کا حصہ ہونگے۔
عدالت نے اٹارنی جنرل سمیت دیگر فریقین کو نوٹس جاری کر دیا، واضح رہے کہ شوکت عزیز صدیقی نے سپریم جوڈیشل کونسل کے فیصلے کو چیلنج کر رکھا ہے۔

پشاور: (ویب ڈیسک) پشاور لیڈی ریڈنگ ہسپتال میں کرپشن کی تحقیقات مکمل کر لی گئیں، ڈائریکٹر اور ایسوسی ایٹ ڈائریکٹر کو بے قاعدگیوں کا ذمہ دار قرار دیا گیا ہے۔
پشاورصوبے کےبڑے ہسپتال لیڈی ریڈنگ میں 5 کروڑ 45 لاکھ روپے کی کرپشن کی تحقیقات کی گئیں جن میں ڈائریکٹر اورایسوسی ایٹ ڈائریکٹر کوعہدوں کے لیے نااہل قراردیا گیا ہے۔رپورٹ کے مطابق امراض قلب کیلئے آلات و مشینری کی خریداری میں خورد برد کی گئی، ای پی مشین،آپریشن تھیٹرمیز،ان لائن یوپی ایس کی خریداری میں بھی بے قاعدگیاں سامنے آئی ہیں۔
تحقیقاتی رپورٹ میں مزید بتایا گیا ہے کہ مارکیٹ سروے کے بغیر خریداری کی گئی، منیجرفسیلٹی نےہسپتال کو 85 لاکھ روپے کا ٹیکہ لگایا۔ دوسری جانب ،ترجمان لیڈی ریڈنگ ہسپتال کا کہنا تھا کہ خریداری میں تمام قواعد وضوابط کا خیا ل رکھا گیا، انکوائری اورمینجمنٹ کمیٹی کی سفارشات وتجاویزمیں غلط فہمیاں تھیں۔

مظفرآباد: (ویب ڈیسک) آزاد کشمیر میں غیر اعلانیہ لوڈ شیڈنگ کے خلاف شہری سڑکوں پر نکل آئے، مختلف شہروں میں احتجاج کیا گیا۔
مظفرآباد کے آزادی چوک میں غیر اعلانیہ لوڈ شیڈنگ سے تنگ شہریوں نے احتجاج کیا اور واپڈا سمیت حکومت آزاد کشمیر کو لوڈ شیدنگ کا ذمہ دار قرار دیتے ہوئے نعرے بازی کی ۔
اس موقع پر شرکاء کا کہنا تھا کہ غیر اعلانیہ لوڈ شیڈنگ کے باعث تعلیمی کاروباری اور گھریلو معمولات بری طرح متاثر ہورہے ہیں۔ لوڈ شیڈنگ کے خلاف مظفرآباد سمیت آزاد کشمیر کے دیگر شہروں میں بھی احتجاج کیا گیا۔