تامل ناڈو : (ویب ڈیسک) بھارتی ریاست تامل ناڈو میں 18سالہ ٹیبل ٹینس کھلاڑی وشوا دینادیلان روڈ حادثے میں ہلاک ہو گیا۔
ٹیبل ٹینس فیڈریشن کا کہنا ہے کہ وشوا دینادیلان ٹیکسی کے ذریعے گوہاتی سے شیلانگ جارہا تھا جس کے راستے میں حادثہ پیش آیا۔
وشوا 83ویں سینئر نیشنل اور انٹر اسٹیٹ ٹیبل ٹینس چیمپئن شپ میں حصہ لے رہا تھا، جو آج سے شروع ہو رہا ہے۔
ٹیکسی میں وشوا کے ساتھ ان کے تین اور ساتھی بھی موجود تھے، جو حادثے میں شدید زخمی ہوئے ہیں، لیکن ان کی حالت خطرے سے باہر ہے۔
بھارتی میڈیا کے مطابق حادثے میں ٹیکسی ڈرائیور کی اسی وقت موت واقع ہو گئی، تاہم وشوا کو قریبی اسپتال منتقل کیا، لیکن ان کی زندگی نہیں بچائی جا سکی۔

کراچی: (ویب ڈیسک) پاکستانی نژاد برطانوی باکسر عامر خان بھی اسرائیلی جارحیت کے لیے بول پڑے، کہا فلسطین کے حالات پریشان کن ہیں، فلسطینیوں کے ساتھ مسلسل بدسلوکی اور انہیں اذیتیں دی جا رہی ہیں۔
عامر خان نے فلسطینی عوام کے لیے 50 ہزار پاونڈ دینے کا اعلان کرتے ہوئے کہا کہ میری دعائیں فلسطین کے لوگوں کے ساتھ ہیں، اس مہم میں شامل ہونے والوں کی حوصلہ افزائی کرتا ہوں۔
عامر خان نے اپنی ٹوئٹ میں فلسطین میں کیے جانے والے مظالم کی تصاویر بھی شئیر کیں۔
دوسری جانب قابض اسرائیلی فورسز نے مسجد اقصیٰ پر ایک بار پھر حملہ کر دیا، مسجد اقصیٰ میں داخل ہوکر نمازیوں کو تشدد کا نشانہ بناںے سے 17 فلسطینی شدید زخمی ہوگئے۔
نہتے فلسطینیوں کی جانب سے احتجاج کیا گیا تو اسرائیلی فورسز نے آنسو گیس کی شیلنگ اور ہوائی فائرنگ بھی کی، جبکہ اسرائیلی فورسز نے متعدد افراد کو گرفتار کرلیا۔
یاد رہے جمعے کے روز اسرائیلی فوج نے نماز فجر میں آئے نمازیوں کو تشدد کا نشانہ بنایا تھا، جس میں 152 نمازی زخمی اور 3 سو سے زائد افراد گرفتار ہوئے تھے۔

لاہور: (ویب ڈیسک) پاکستان کیلئے بڑا اعزاز حاصل کرنے والے کم عمر ترین ورلڈ چیمپئن کو ایک ماہ سے زائد کا عرصہ بیت گیا، کسی حکومتی عہدیدار نے حوصلہ افزائی نہ کی۔ احسن رمضان کو سکالرشپ ملی نہ ہی رہائش کیلئے کوئی جگہ فراہم کی گئی۔
دوحہ میں ہونے والی آئی بی ایس ایف مینز ورلڈ چیمپئن شپ کا ٹائٹل جیتنے والے 16 سالہ احسن رمضان نے پوری دنیا میں سبز ہلالی پرچم لہرایا، احسن رمضان کو ورلڈ چیمپئن بنے ایک ماہ ہوگیا مگر بدقسمتی سے کسی بھی حکومتی عہدیدار نے نوجوان چیمپئن کی حوصلہ افزائی نہ کی۔
احسن رمضان کے والدین وفات پاچکے جبکہ نوجوان چیمپئن ایک سنوکر کلب کے کمرے میں اپنی زندگی گزارنے پر مجبور ہے۔ احسن رمضان نے جولائی میں امریکہ میں شیڈول ورلڈ گیمز کیلئے بھی کوالیفائی کیا ہے۔
نجی نیوز سے گفتگو کرتے ہوئے احسن رمضان نے کہا کہ جب سنوکر چیمپئن بنا تو امید تھی کہ حکومت میری حوصلہ افزائی کرے گی، اب حکومت تبدیل ہوئی ہے تو امید جاگی ہے کہ اپنی چھت ملے گی اور روز گار میسر ہوگا۔
سنوکر اکیڈمیز اینڈ کلب ایسوسی ایشن کے صدور فیصل اکرم اور عمران نوشاہی کہتے ہیں کہ جب محمد آصف چیمپئن بنے تھے تو اس وقت کے وزیرِ اعلیٰ شہباز شریف نے فوری طور پر مالی امداد کی تھی، امید ہے اس نوجوان کی صلاحیتوں کو بھی سراہا جائے گا۔ احسن رمضان نے ورلڈ چیمپئن شپ کے فائنل میں ایران کے عامر سرخوش کو شکست دی تھی۔

دبئی: (ویب ڈیسک) آئی سی سی نے ورلڈ ٹیسٹ چیمپئن شپ کے ٹاپ 10 بلے بازوں کی فہرست جاری کردی، قومی کپتان بابر اعظم 682 رنز بنا کر تیسرے نمبر پر موجود ہیں۔
حال ہی میں ٹیسٹ کپتانی سے استعفی دینے والے انگلش بلے باز جو روٹ گیارہ سو پچھتر رنز بنا کر پہلے نمبر پر موجود ہیں جبکہ آسٹریلوی بلے باز عثمان خواجہ کی دوسری پوزیشن ہے۔
پاکستانی اوپنر عبداللہ شفیق بھی فہرست میں شامل ہیں جو پانچ سو سنتالیس رنز کے ساتھ چھٹے نمبر پر موجود ہیں۔ بھارت اور جنوبی افریقہ کے دو، دو کھلاڑی بھی ٹاپ ٹین بلے بازوں میں شامل ہیں۔