اسلام آباد: (ویب ڈیسک) احسن اقبال نے کہا ہے کہ عمران نیازی کا ایجنڈا پاکستان میں اداروں کو بدنام کرنا اور انتشار پھیلانا ہے۔
عمران خان کے پشاور جلسے سے خطاب پر ردعمل دیتے ہوئے مسلم لیگ ن کے مرکزی رہنما احسن اقبال نے کہا کہ فکر نہ کرو پاکستان کا ایٹمی پروگرام محفوظ ترین ہاتھوں میں ہے، جنہوں نے پروگرام شروع کیا اور پایہ تکمیل تک پہنچایا، تم تو اسے بھی بیچ دو گے۔ احسن اقبال نے مزید کہا کہ کیا فارن فنڈنگ کرنے والے کے اشارے پر ملک میں افراتفری پیدا کی جا رہی ہے؟۔

اسلام آباد: (ویب ڈیسک) وزیرعلیٰ عثمان بزدار نے کہا ہے کہ اقلیتوں کو بنیادی حقوق کی فراہمی، ان کے جان و مال کا تحفظ اور انہیں ترقی کے یکساں مواقع فراہم کرنا ہماری ذمہ داری ہے، آئین پاکستان کے تحت ملک میں بسنے والی تمام اقلیتی برادریوں کو یہاں رہنے اور کام کرنے کا پورا حق حاصل ہے۔
وزیراعلی پنجاب عثمان بزدار نے سکھ برادری کو ویساکھی کے تہوار پر مبارکباد دیتے ہوئے کہا کہ ہم سب ویساکھی کے تہوار پر سکھ برادری کی خوشیوں میں برابر کے شریک ہیں، پاکستان ہم سب کا ہے اور اسے ہم نے ملکر مضبوط اور عظیم بنانا ہے، پنجاب سمیت پاکستان میں سکھ برادری کے مقدس مقامات موجود ہیں۔
عثمان بزدار نے کہا کہ پاکستان میں سکھ برادری سمیت دیگر مذاہب کے ماننے والوں کو اپنے عقائد کے مطابق زندگی بسر کرنے کی مکمل آزادی ہے، سکھ برادری کے گوردواروں کی دیکھ بھال، تزئین و آرائش اور سکیورٹی پر خصوصی توجہ دی گئی ہے۔ انہوں نے کہا کہ سکھ برادری کو مذہبی رسومات کی ادائیگی کیلئے ہرطرح کی سہولتیں فراہم کی گئی ہیں، پنجاب حکومت نے سکھ برادری سمیت تمام اقلیتوں کی فلاح وبہبود کیلئے ٹھوس اقدامات کئے ہیں۔

اسلام آباد: (ویب ڈیسک) قومی اسمبلی سیکرٹریٹ نے تحریک انصاف کے اراکین کے استعفے منظور کرنے سے انکار کر دیا۔
پی ٹی آئی ارکان اسمبلی کے استعفوں کا معاملہ، اسمبلی سیکرٹریٹ نے استعفے منظور کرنے سے انکارکر دیا۔ ذرائع کے مطابق سیکرٹریٹ کی جانب سے موقف اپنایا گیا ہے کہ انفرادی تصدیق کے بغیر کسی بھی رکن کا استعفی الیکشن کمیشن کو بھجوانہیں سکتے، ڈپٹی سپیکر قاسم سوری 22 اپریل تک تمام استعفے منظور کرنا چاہتے ہیں۔
دوسری جانب قاسم سوری کی جانب سے یہ موقف سامنے آیا ہے کہ پی ٹی آئی اراکین کے استعفے منظور کر کے ہی جاؤں گا۔
واضح رہے کہ پاکستان تحریک انصاف کے اراکین قومی اسمبلی نے شہباز شریف کے وزیراعظم بننے پر اپنی نشستوں سے استعفے دینے کا اعلان کیا تھا حتی کہ ڈپٹی سپیکر قاسم سوری نے اجلاس کی صدارت سے بھی معذرت کر لی تھی۔ تحریک انصاف کا موقف ہے کہ شہباز شریف کی حکومت بیرونی سازش کے تحت قائم کی گئی ہے۔

اسلام آباد : (ویب ڈیسک) قومی اسمبلی کا اجلاس تاخیر سے بلانے کا اقدام اسلام آباد ہائیکورٹ میں چیلنج کر دیا گیا۔ ڈپٹی اسپیکر کے اقدام کے خلاف درخواست مسلم لیگ ن کے مرتضی جاوید عباسی نے دائر کی۔
درخواست میں ڈپٹی اسپیکر قاسم سوری، سیکریٹری پارلیمانی آفئیرز اور سیکریٹری اسمبلی کو فریق بنایا گیا۔ درخواست میں موقف اپنایا گیا کہ قومی اسمبلی اجلاس 22 اپریل تک ملتوی کرنے کا 13 اپریل کا حکم آئین سے متصادم ہے، عدالت سے استدعا ہے کہ ڈپٹی اسپیکر کو اسپیکر اسمبلی کے الیکشن کے لیے فوری اجلاس بلانے کی ہدایت کی جائے، سیکریٹری پارلیمانی امور اور سیکریٹری اسمبلی کو 16 اپریل کو اجلاس بلانے کی ہدایت کی جائے، ڈپٹی اسپیکر کو اسپیکر قومی اسمبلی کے اختیارات استعمال کرنے سے روکا جائے۔

اسلام آباد : (ویب ڈیسک) وزیرِ اعظم میاں شہباز شریف کی زیرِ صدارت اجلاس ہوا، جس میں ملکی معیشت کی صورتحال پر بریفنگ لی۔
اجلاس میں شاہد خاقان عباسی، احسن اقبال، مفتاح اسماعیل، مریم اورنگزیب، زبیر عمر، عائشہ غوث پاشا، طارق محمود پاشا، بلال کیانی اور متعلقہ اعلی افسران نے شرکت کی۔ اجلاس میں وزیرِ اعظم کو وزارتِ خزانہ کی طرف سے موجودہ ملکی معیشت کی صورتحال سے تفصیلی طور پر آگاہ کیا گیا۔