All posts by Khabrain News

دلچسپ و عجیب

خاتون رینجر نے 100برس کی عمر میں ریٹائرمنٹ لے لی

واشنگٹن: (ویب ڈیسک) امریکہ کے نیشنل پارک میں ملازمت کرنے والی معمر ترین خاتون رینجر کو 100 برس کی عمر میں ریٹائر کر دیا گیا۔
میڈیا رپورٹ کے مطابق امریکی ریاست کیلی فورنیا کے نیشنل پارک کی عمر رسیدہ خاتون رینجر ریڈ سو سکن نے 100 برس کی عمر میں ریٹائرمنٹ لی ہے۔ خاتون رینجر نے رچمنڈ شہر میں واقع روزی دی ریوٹر، ڈبلیو ڈبلیو آئی آئی فرنٹ نیشنل تاریخ پارک میں 15 سال خدمات سر انجام دیں۔
ریٹائرمنٹ کے موقع پر خاتون رینجر کا کہنا تھا کہ بطور رینجر اپنے فرائض انجام دینا بہت اہم اور زندگی کے یادگار لمحات میں سے ایک ہے۔ اس عمر میں ملازمت کرنا اعزاز سے کم نہیں، 15 سالہ نوکری پر ہمیشہ فخر رہے گا۔

دلچسپ و عجیب

کولمبیا میں دریائی گھوڑوں کو ’’حملہ آور جانور‘‘ قرار دے دیا گیا

بگوٹا: (ویب ڈیسک) کولمبین حکومت نے دریائی گھوڑوں (ہپوپاٹومس) کو حملہ آور جانور قرار دے دیا کیونکہ ان سے مقامی مچھیروں، انسانی آبادیوں اور جانوروں کو خطرات لاحق ہیں۔
واضح رہے کہ دریائی گھوڑوں کا اصل وطن افریقہ ہے، تاہم گزشتہ چند صدیوں کے دوران انہیں دنیا کے بیشتر ممالک میں واقع چڑیا گھروں میں پہنچایا جاچکا ہے۔
البتہ کولمبیا کا بدنامِ زمانہ منشیات فروش پابلو ایسکوبار آج سے تقریباً چالیس سال پہلے، صرف چار دریائی گھوڑوں کو اپنے چڑیا گھر میں رکھنے کےلیے یہاں لایا تھا جو اس نے دریائے میگڈالینا کے کنارے پر کھلی فضا میں بنایا تھا۔
یہاں آزادی سے گھومتے پھرتے دریائی گھوڑوں نے اپنی نسل بہت تیزی سے بڑھائی اور صرف چند سال میں ان کی تعداد سیکڑوں میں پہنچ گئی۔
اپنے بھاری بھرکم جسم اور خوش خوراکی کے باعث، دریائی گھوڑوں نے مقامی جانوروں کےلیے پریشانیاں کھڑی کرنا شروع کردیں جبکہ دریا کے کناروں پر رہنے والوں کو بھی ان سے خطرات لاحق رہنے لگے کیونکہ ایک طرف مچھیروں کےلیے مچھلیاں پکڑنا مشکل ہوگیا تو دوسری جانب دریا سے متصل مقامات پر کھیتی باڑی کرنے والے کسانوں کو بھی نقصان ہونے لگا۔
انہی عوامی شکایتوں کو مدنظر رکھتے ہوئے کولمبین حکومت نے پہلے پہل تو نر دریائی گھوڑوں کو مار کر ان کی نسل آگے بڑھنے سے روکنا چاہا لیکن پھر بھی ان کی تعداد میں نمایاں کمی نہیں ہوسکی۔
اب نئے اقدامات کے تحت کولمبین حکومت نے دریائی گھوڑوں کو باضابطہ طور پر ’’حملہ آور نوع‘‘ (invasive species) میں شامل کرتے ہوئے ان کی تعداد کم کرنے اور انہیں کچھ مخصوص علاقوں تک محدود کرنے کا فیصلہ کرلیا ہے۔
البتہ، یہ کام عالمی اداروں کے تعاون سے کیا جائے گا تاکہ دریائی گھوڑوں کا بے دریغ قتلِ عام بھی نہ ہو اور ان کی آبادی بھی قابو میں رہے۔

شوبز

ابھیشیک بچن اپنی آنے والی فلم ’دسوی‘ کو ناکام کہنے پر صحافی پر برہم

ممبئی: (ویب ڈیسک) بالی ووڈ اداکار ابھیشیک بچن اس وقت ناراض ہوگئے جب ایک صحافی نے ان کی آنے والی فلم ’’دسوی‘‘ کو ناکام کہہ دیا۔
ابھیشیک بچن اداکارہ یامی گوتم اور نمرت کور کے ہمراہ اپنی آنے والی فلم ’’دسوی‘‘ کی خوب زورو شور سے تشہیر کرنے میں مصروف ہیں۔ اور اسی سلسلے میں یہ تینوں اداکار مختلف ایوینٹس میں شرکت کررہے ہیں۔
پیر کے روز ممبئی میں فلم کی اسپیشل اسکریننگ منعقد کی گئی جس میں تینوں اداکاروں نے شرکت کی۔ فلم کی اسکریننگ کے بعد جب تمام اداکار واپس جانے لگے تو صحافیوں نے ابھیشیک بچن کو گھیر لیا اور ان سے تصویر کے لیے پوز دینے کی فرمائش کرنے لگے۔
تاہم ابھیشیک بچن صحافیوں کی فرمائش کو اَن سنا کرتے ہوئے اپنی کار کی طرف بڑھتے رہے۔ اسی وقت ایک صحافی نے کہا ’’ایسا نہ کریں ورنہ آپ کی فلم ’دسوی‘ ناکام ہوجائے گی‘‘۔
صحافی کی اس بات پر ابھیشیک بچن رکے اور صحافی پر برہمی کا اظہار کرتے ہوئے اس صحافی کا نام لیتے ہوئے کہا ’’منوج ایسا بولتے ہیں؟‘‘۔ ابھیشیک بچن کی اس بات پر صحافی کو اپنی غلطی کا احساس ہوا اور اس نے ابھیشیک سے معافی مانگی جس کے بعد ابھیشیک بچن اپنی کار میں بیٹھ کر وہاں سے چلے گئے۔
واضح رہے کہ ابھیشیک بچن کی فلم ’’دسوی‘‘ 7 اپریل کو جیو سینمااور نیٹ فلیکس اسٹریمنگ سائٹ پر ریلیز جائے گی۔ فلم میں ابھیشیک کے ہمراہ اداکارہ یامی گوتم اور نمرت کور بھی مرکزی کرداروں میں نظر آئیں گی۔

کھیل

رمیز راجہ کی پاکستان اور آسٹریلیا کی کرکٹ ٹیموں کو مبارکباد

لاہور: (ویب ڈیسک) پاکستان کرکٹ بورڈ کے چیئرمین رمیز راجہ نے پاکستان اور آسٹریلیا کی کرکٹ ٹیموں کو 38 روزہ تاریخی دورے میں شاندار اور سنسنی خیز کرکٹ کھیلنے پر مبارکباد پیش کی ہے۔
چیئرمین پی سی بی کا کہنا ہے کہ 15 روز پر مشتمل تین ٹیسٹ میچز کی سیریز کے فاتح کا تعین سیریز کے آخری گھنٹے میں ہوا جبکہ محدود طرز کی کرکٹ میں دونوں ٹیموں کی جانب سے اعلیٰ معیار کی صلاحیتوں کا مظاہرہ کیا گیا۔ اس دوران دونوں سائیڈز کی طرف سے ایک دوسرے کے لیے جس احترام کا مظاہرہ کیا گیا وہ مثالی اور کرکٹ کے کھیل کی بھرپور ترجمانی تھی۔
انہوں نے مزید کہا کہ دونوں ٹیموں کے کھلاڑیوں نے میدان کے اندر اور باہر اپنے رویے کے ذریعے اسپرٹ آف کرکٹ اور کھیل کی اقدار کو پروان چڑھایا۔
رمیز راجہ کا کہنا ہے کہ آسٹریلیا کے کھلاڑی اور آفیشلز اپنے ذاتی تجربے اور مشاہدے کے بعد اب پاکستان سے حسین یادیں لیے واپس اپنے گھر روانہ ہو رہے ہیں، جہاں وہ پاکستان کے بڑے وکیل اور خیر سگالی کے سفیر بنیں گے۔
انہوں نے کہا کہ جس طرح دونوں ٹیموں نے اس سیریز کے ذریعے پاکستان کے اندر اور باہر شائقینِ کرکٹ کے دل جیتے ہیں، اس پر عالمی کرکٹ بھی ان کی شکرگزار ہے۔ بلاشبہ اس تاریخی سیریز کے انعقاد سے پاکستان اور عالمی کرکٹ کے رتبہ میں بھی اضافہ ہوا ہے۔
رمیز راجہ نے کہا کہ اس سیریز کے لیے اپنے بہترین دستیاب کھلاڑیوں کو پاکستان بھیجنے پر وہ تہہ دل سے کرکٹ آسٹریلیا کا شکریہ ادا کرنا چاہتے ہیں۔ اس کے ساتھ ساتھ وہ پی سی بی کے عملہ کے بھی مشکور ہیں کہ جنہوں نے ایچ بی ایل پی ایس ایل 7 کے فوری بعد منعقدہ اس سیریز کو کامیاب بنانے میں اہم کردار ادا کیا۔
چیئرمین پی سی بی نے کہا کہ وہ پاکستان کرکٹ کے پرجوش فینز کے بھی شکر گزار ہیں کہ جنہوں نے تینوں وینیوز پر دونوں ٹیموں کی دل و جان سے حوصلہ افزائی کرکے سیریز کو بڑی کامیابی سے ہمکنار کیا۔
انہوں نے کہا کہ وہ تمام سیکیورٹی ایجنسیز، مقامی اور وفاقی حکومتوں، اپنے قابل قدر کمرشل پارٹنرز اور براڈ کاسٹرز کا بھی شکریہ ادا کریں گے کہ جنہوں نے دنیا بھر کے ناظرین کو بہترین ٹرانسمیشن مہیا کرنے میں کلیدی کردار ادا کیا۔

پاکستان

متحدہ اپوزیشن کا علامتی اجلاس، حمزہ شہباز کی حمایت میں 199 ووٹ ڈالے گئے

لاہور: (ویب ڈیسک) متحدہ اپوزیشن کے علامتی اجلاس میں حمزہ شہباز کو 199 اراکین پنجاب اسمبلی نے ووٹ ڈالے جبکہ پرویز الہیٰ کی حمایت میں کوئی ووٹ نہیں ڈالا گیا۔
پاکستان مسلم لیگ ن کی نائب صدر مریم نواز، حمزہ شہباز اور سینئر لیگی رہنما متحدہ اپوزیشن کے اراکین صوبائی اسمبلی کے ہمراہ نجی ہوٹل سے پنجاب اسمبلی سے متصل ہوٹل میں علامتی اجلاس کے لیے روانہ ہوئے۔ اس سے قبل نجی ہوٹل میں متحدہ اپوزیشن کے اراکین کا اجلاس منعقد کیا گیا۔
مریم نواز، حمزہ شہباز اور متحدہ اپوزیشن کے اراکین سے اظہار یکجہتی کے لئے پہنچیں جبکہ پاکستان تحریک انصاف کے منحرف رہنماؤں علیم خان، جہانگیر ترین اور چھینہ گروپ کے اراکین بھی ریلی میں موجود تھے۔
اراکین اسمبلی بسوں اور ذاتی گاڑیوں میں سوار ہو کر روانہ ہوئے، اس موقع پر اراکین اسمبلی کے ذاتی گارڈز بھی اُن کے ہمراہ تھے جبکہ پولیس کی بھاری نفری بھی متحدہ اپوزیشن کے ہمراہ تھے۔ اراکین اسمبلی نے وزیراعلیٰ حمزہ شہباز کے نعرے لگائے اور ووٹنگ میں اپنی مکمل حمایت کا یقین بھی دلایا۔
مریم نواز، حمزہ شہباز کے نجی ہوٹل پہنچنے پر لیگی کارکنان کی بڑی تعداد موجود تھی، قائدین کو دیکھ کر کارکنان نے نعرے بازی کی جس پر منتظمین نے انہیں روکا تو شدید ہلڑ بازی ہوئی۔
بعد ازاں پینل آف شیئر شازیہ عابد کی زیر صدارت متحدہ اپوزیشن کا اجلاس ہوا، جس کے آغاز پر انہوں نے کہا کہ انتالیسویں اجلاس میں مجھے پینل اف چئیر کا حصہ چنا گیا تھا۔
تلاوت کلام پاک کے بعد مسلم لیگ ن کے رکن اسمبلی چوہدری اقبال گجر کی جانب سے اجلاس میں قرارداد پیش کی۔ جس پر شازیہ عابد نے کہا کہ آج کے اجلاس کے ایجنڈے پر قائد ایوان کا انتخاب ہے، قائد ایوان کے انتخاب کے لئے حمزہ شہباز اور چوہدری پرویز الہی میں مقابلہ ہے۔
ایوان کی کارروائی کی طرح شازیہ عابد نے قرارداد پیش ہونے کے بعد حمزہ شہباز کے حامی اراکین کو نشستوں پر کھڑے ہونے کی ہدایت کی اور پھر گنتی کا حکم دیا۔
بعد ازاں انہوں نے اعلان کیا کہ حمزہ شہباز کے حق میں ایک سو ننانوے اراکین اسمبلی نے ووٹ دیا جبکہ چوہدری پرویز الٰہی کے حق میں کسی نے ووٹ نہ دیا۔ شازیہ عابد نے اعلان کیا کہ میرے پاس آئی گنتی میں میاں حمزہ شہباز ایک سو ننانوے ووٹ لیکر قائد ایوان (خود ساختہ) منتخب ہو گئے ہیں۔
حمزہ شہباز نے ووٹ دینے والے اراکین کا شکریہ ادا کرتے ہوئے کہا کہ یہاں مسلم ن اور اس کے اتحادی موجود ہیں، میں پیپلز پارٹی کے حسن مرتضی، علیم خان، اسد کھوکھر، معاویہ اعظم، جگنو محسن کا شکریہ ادا کرتا ہوں ، میں اپنی بہن مریم نواز، پرویز رشید اور عطا تارڑ اور جہانگیر ترین گروپ کا خصوصی طور پر شکریہ ادا کرتا ہوں۔
انہوں نے کہا کہ میرے سامنے بیٹھے والے تمام اراکین میری فیملی ہیں اور رہیں گے، آج میں اپنے معزز اراکین سے پوچھتا ہوں آج کونسی آفت آ گئی جو ہمیں اجلاس نجی ہوٹل منعقد کروانا پڑا ، پنجاب اسمبلی صرف عمارت کا نام ہے وہاں پر اس صوبے کے عوام کی تقدیر کے فیصلے نہیں ہوتے۔
حمزہ شہباز نے کہا کہ جس نے اسمبلی کے کسٹوڈین ہونے کا حلف اٹھایا آج انہیں اراکین پر اس نے دروازے بند کر دیئے گئے۔
واضح رہے کہ پنجاب اسمبلی کو آج صبح سے پولیس اہلکاروں نے گھیرے میں لے کر سیل کیا ہوا ہے۔

سائنس و ٹیکنالوجی

پلوٹو کے ’برف اگلتے آتش فشاں‘ مزید پراسرار ہوگئے

پیساڈینا، کیلیفورنیا: (ویب ڈیسک) کچھ سال قبل ہمارے نظامِ شمسی کے بونے سیارے ’’پلوٹو‘‘ کے قریب سے گزرنے والے ’’نیو ہورائزن‘‘ خلائی کھوجی نے وہاں کچھ ایسے پہاڑ دریافت کیے تھے جو زمینی آتش فشانوں کی طرح دکھائی دیتے ہیں مگر شاید کسی زمانے میں ان سے شدید سرد پانی اور برف خارج ہوئے تھے۔
ان پہاڑوں کو سائنسدانوں نے ’’برف اگلتے آتش فشانوں‘‘ (آئس وولکینوز) کا نام دیا تھا۔
اب ان ہی برفیلے آتش فشانوں پر نئی تحقیق سے ماہرین نے اندازہ لگایا ہے کہ برف اگلتے ہوئے یہ سرد پہاڑ ’’صرف‘‘ دس کروڑ سال قبل یا اس سے بھی کم پرانے زمانے میں پوری جولانی کے ساتھ زندہ تھے۔
اگر یہ بات درست ہے تو پھر ہمیں پلوٹو کے ماضی اور حال کے بارے میں اپنی معلومات تبدیل کرنا ہوں گی کیونکہ سورج سے 3 ارب 70 کروڑ کلومیٹر دور ہونے کی وجہ سے پلوٹو کو انتہائی سرد سمجھا جاتا تھا۔
ماہرین کی اکثریت اس بات پر متفق تھی کہ پلوٹو میں اندرونی طور پر بھی بہت زیادہ گرمی نہیں اور نہ صرف باہر سے، بلکہ اندر سے بھی یہ بالکل ٹھنڈا ہوچکا ہے۔
برف اگلتے آتش فشانوں جیسے پہاڑوں کے بارے میں خیال تھا کہ ان کی یہ کیفیت کم از کم ایک ارب سال سے ایسی ہے لیکن نئی تحقیق سے یوں لگتا ہے کہ شاید یہ صورتِ حال صرف دس کروڑ یا اس سے بھی کم پرانی ہے۔
ایک اندازہ یہ بھی پیش کیا گیا ہے کہ شاید پلوٹو آج بھی اندرونی طور پر خاصا گرم ہے جس کے باعث وہاں کے پہاڑوں سے برف اور ٹھنڈا پانی خارج ہورہے ہوں گے۔
یہ تب باتیں فی الحال مفروضات کی شکل میں ہیں جنہوں نے پلوٹو کے ’برف اُگلتے آتش فشانوں‘ کو مزید پراسرار بنا دیا ہے۔
نوٹ: اس تحقیق کی تفصیلات ’’نیچر کمیونی کیشنز‘‘ کے تازہ شمارے میں آن لائن شائع ہوئی ہیں۔

بزنس

سونے کی قیمت تاریخ کی بلند ترین سطح پر پہنچ گئی

کراچی: (ویب ڈیسک) ملکی صرافہ مارکیٹوں میں سونے کی فی تولہ قیمت 800 روپے اضافے کے ساتھ تاریخ کی بلندترین سطح پر پہنچ گئی۔
بین الاقوامی بلین مارکیٹ میں فی اونس سونے کی قیمت میں 2 ڈالر کی کمی ہوئی اور عالمی مارکیٹ میں سونے کی فی اونس قیمت 1926 ڈالر کی سطح پر پہنچ گئی، تاہم مقامی صرافہ مارکیٹوں میں بدھ کے روز فی تولہ اور دس گرام سونے کی قیمتوں میں بالترتیب 800 روپے اور 686 روپے کا اضافہ ہوا اور سونے کی قیمتیں تاریخ کی بلند ترین سطح پہنچ گئیں۔
قیمتوں میں اضافے کے نتیجے میں کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد ، پشاور اور کوئٹہ کی صرافہ مارکیٹوں میں فی تولہ سونے کی قیمت بڑھ کر 1 لاکھ 32 ہزار 800 روپے کی سطح پر پہنچ گئی، جب کہ دس گرام سونے کی قیمت اضافے کے بعد 1 لاکھ 13 ہزار 855 روپے نئی بلند تین سطح پر آگئی۔ تاہم اس کے برعکس فی تولہ چاندی کی قیمت بغیر کسی تبدیلی کے 1520روپے پرمستحکم رہی اور دس گرام چاندی کی قیمت بھی بغیر کسی تبدیلی کے 1303.15 روپے کی سطح پر مستحکم رہی۔

Uncategorized

پنجاب اسمبلی کا علامتی اجلاس، مریم کا ارکان اسمبلی کے ہمراہ بس میں سفر

پنجاب اسمبلی کے علامتی اجلاس میں شرکت کیلئے مسلم لیگ (ن) کی مرکزی نائب صدر مریم نواز ارکان اسمبلی کے ہمراہ بس میں سوار ہوگئیں۔
مریم نواز نے حمزہ شہباز سے اظہار یکجہتی کیلئے پنجاب اسمبلی جانے کا اعلان کیا تھا جس کے بعد وہ مقامی ہوٹل پہنچیں۔
مقامی ہوٹل سے وہ دوسرے ہوٹل روانہ ہوئیں جہاں پنجاب اسمبلی کا علامتی اجلاس ہونا ہے۔
اس دوران مریم نوازاورحمزہ شہباز بھی بس میں سوارہو گئے۔ مریم اور حمزہ ارکان پنجاب اسمبلی سے اظہار یکجہتی کیلئے بس میں سوار ہوئے۔ اس دوران مریم نواز ہاتھ ہلا کر کارکنوں کے نعروں کا جواب دیتی رہیں۔

اہم خبریں, پاکستان

پنجاب اسمبلی کا علامتی اجلاس، مریم کا ارکان اسمبلی کے ہمراہ بس میں سفر

پنجاب اسمبلی کے علامتی اجلاس میں شرکت کیلئے مسلم لیگ (ن) کی مرکزی نائب صدر مریم نواز ارکان اسمبلی کے ہمراہ بس میں سوار ہوگئیں۔
مریم نواز نے حمزہ شہباز سے اظہار یکجہتی کیلئے پنجاب اسمبلی جانے کا اعلان کیا تھا جس کے بعد وہ مقامی ہوٹل پہنچیں۔
مقامی ہوٹل سے وہ دوسرے ہوٹل روانہ ہوئیں جہاں پنجاب اسمبلی کا علامتی اجلاس ہونا ہے۔
اس دوران مریم نوازاورحمزہ شہباز بھی بس میں سوارہو گئے۔ مریم اور حمزہ ارکان پنجاب اسمبلی سے اظہار یکجہتی کیلئے بس میں سوار ہوئے۔ اس دوران مریم نواز ہاتھ ہلا کر کارکنوں کے نعروں کا جواب دیتی رہیں۔

اہم خبریں, پاکستان

پی ٹی آئی کا 100 سے زائد حلقوں میں امیدوار تبدیل نہ کرنے کا فیصلہ

پاکستان تحریک انصاف (پی ٹی آئی) نے 100 سے زائد حلقوں میں امیدوار تبدیل نہ کرنے کا فیصلہ کرلیا۔
تحریک انصاف کے چیئرمین عمران خان کی زیرصدارت اجلاس ہوا جس میں آئندہ انتخابات سے متعلق فیصلے کئے گئے۔
ذرائع کے مطابق پی ٹی آئی نے 100 سے زائدحلقوں میں امیدوار تبدیل نہ کرنے کا فیصلہ کیا جبکہ تحریک عدم اعتماد میں ساتھ دینے والے ارکان کو پارٹی ٹکٹس دینے پر اتفاق کیا گیا۔
ذرائع کا کہنا ہے کہ منحرف ارکان کے حلقوں میں متبادل امیدواروں کیلئے مشاورت شروع کردی گئی ہے۔
ذرائع کے مطابق اجلاس میں آئندہ انتخابات میں انتخابی اتحاد سے متعلق بھی غور کیا گیا جبکہ پارلیمانی بورڈ کے بعض ممبران نے انتخابی اتحاد کرنے کی تجویز دی اور بعض ممبران نے انتخابات میں کسی سے بھی اتحاد نہ کرنے کا مشورہ دیا تاہم انتخابی اتحاد سے متعلق فیصلے پر مزید مشاورت پر اتفاق کیا گیا۔
ذرائع کا کہنا ہے کہ پی ٹی آئی نے تمام انتخابی حلقوں میں امیدوار نامزد کرنے پر بھی اتفاق کیا۔
ذرائع نے بتایا کہ چیئرمین پی ٹی آئی نے ملک بھر میں عوامی رابطہ مہم پر بھی مشاورت کی۔ اجلاس میں فیصلہ کیا گیا کہ عوامی رابطہ مہم میں منحرف ارکان کے حلقوں میں جلسے کیے جائیں گے اور چیئرمین عمران خان منحرف ارکان کےحلقوں میں عوامی اجتماعات سےخطاب کریں گے۔