کراچی: (ویب ڈیسک) بین الاقوامی بلین مارکیٹ میں فی اونس سونے کی قیمت 6 ڈالر کے اضافے سے 1715 ڈالر کی سطح پر پہنچنے کے باعث مقامی صرافہ مارکیٹوں میں پیر کو فی تولہ اور دس گرام سونے کی قیمتوں میں بالترتیب 1550 روپے اور 1329 روپے کا اضافہ ہوگیا۔
نتیجے میں ملک بھر میں فی تولہ سونے کی قیمت بڑھ کر ایک لاکھ 42 ہزار 400 روپے اور فی دس گرام سونے کی قیمت ایک لاکھ 22 ہزار 85 روپے ہوگئی۔
اسکے برعکس فی تولہ چاندی کی قیمت بغیر کسی تبدیلی کے 1570 روپے کی سطح پر مستحکم رہی۔
اسلام آباد: (ویب ڈیسک) وفاقی دارالحکومت اسلام آباد سمیت ملک کے مختلف علاقوں میں زلزلے کے جھٹکے محسوس کئے گئے ہیں۔
زلزلہ پیما مرکز کے مطابق پشاور اور گرد و نواح ، بٹ خیلا، مالاکنڈ اور شمالی وزیرستان کے مختلف علاقوں میں بھی زلزلے کے جھٹکے محسوس کئے گئے۔
زلزلے کی شدت 5 اعشاریہ 4 ریکارڈ کی گئی جب کہ اس کا مرکز وانا سے 64 کلومیٹر دور، گہرائی 188 کلومیٹر تھی۔
لاہور: (ویب ڈیسک) ضمنی انتخاب میں لیگی کارکنان نے مخالف پارٹی سے منحرف ہو کر آنے والوں کو دل سے قبول نہیں کیا، پارٹی عہدیداران اور پرانے ٹکٹ ہولڈرز نے انتخابی مہم میں جان نہیں لڑائی۔
یہ بات وفاقی وزیر داخلہ رانا ثنا اللہ نے ضمنی انتخاب کے حوالے سے تیار کردہ اپنی تجزیاتی رپورٹ میں کہی ہے۔
پاکستان مسلم لیگ (ن) سے تعلق رکھنے والے وفاقی وزیر داخلہ رانا ثنا اللہ کی تیار کردہ تجزیاتی رپورٹ وزیراعظم میاں شہباز شریف کی زیر صدارت منعقدہ اعلیٰ سطحی اجلاس میں پیش کی گئی ہے جس میں تمام اہم پارٹی رہنماؤں نے شرکت کی ہے۔
ذمہ دار ذرائع کے مطابق پاکستان مسلم لیگ (ن) کے مرکزی صدر میاں شہباز شریف کی زیر صدارت منعقدہ اعلیٰ سطحی اجلاس میں قائد میاں نواز شریف نے لندن سے ویڈیو لنک کے ذریعے شرکت کی۔
ذرائع کے مطابق رپورٹ میں ہر انتخابی حلقے کے حوالے سے الگ الگ تجزیہ پیش کیا گیا ہے جس میں تمام محرکات کا احاطہ ہوا ہے۔
ذرائع نے بتایا ہے کہ پارٹی قیادت کے سامنے پیش کردہ تجزیاتی رپورٹ میں کہا گیا ہے کہ لیگی کارکنان نے مخالف پارٹی سے منحرف ہو کر آنے والوں کو دل سے قبول نہیں کیا، پارٹی عہدیداروں اور پرانے ٹکٹ ہولڈرز نے انتخابی مہم میں جان نہیں لڑائی۔
ذرائع کے مطابق پیش کردہ تجزیاتی رپورٹ میں اعتراف کیا گیا ہے کہ پیٹرولیم مصنوعات اور بجلی کے بلوں میں ہونے والے اضافے نے مہنگائی کی شرح میں اضافہ کیا جس نے جلتی پر تیل کا کام کیا اور ہار میں بنیادی کردار ادا کیا۔
رانا ثنا اللہ کی تیار کردہ تجزیاتی رپورٹ میں کہا گیا ہے کہ عوام نے پیٹرولیم مصنوعات کی قیمتوں میں کمی کو بھی رد کر کے مخالفین کو ووٹ دئیے ہیں۔
صادق آباد: (ویب ڈیسک) دریائے سندھ میں 100 باراتیوں سے بھری ایک کشتی الٹنے سے 19 افراد جاں بحق ہوگئے جن میں خواتین اور بچے شامل ہیں۔
دریائے سندھ میں ایک کشتی کے ذریعے تقریباً 100 مسافر بارات لے کر کھروڑ سے ماچھکہ آرہے تھے کہ ماچھکہ کے قریب کشتی الٹ گئی، مقامی افراد نے اپنی مدد آپ کے تحت دریا میں گرنے والوں کی بڑی تعداد کو بچالیا تاہم متعدد افراد ڈوب گئے جن میں سے تاحال 19 لاشیں نکال لی گئیں۔
ڈپٹی کمشنر نے تصدیق کرتے ہوئے کہا ہے کہ حادثے میں اب تک 19 افراد کی لاشیں نکال لی گئی ہیں، نکالی گئی لاشیں خواتین کی ہیں، باراتیوں سے بھری کشتی میں خواتین اور بچوں سمیت 100 افراد سوار تھے۔
ڈپٹی کمشنر نے مزید کہا کہ افسوس ناک حادثہ اوور لوڈنگ کے سبب پیش آیا، دریائے سندھ میں ڈوب جانے والے افراد کی تلاش میں ریسکیو آپریشن جاری ہے، حادثے کے بعد زیادہ تر افراد کو مقامی افراد نے بچالیا تھا۔
کیف: (ویب ڈیسک) روسی فورسز کی ڈونیٹسک ریجن میں گولہ باری کے نتیجے میں چھ افراد ہلاک ہوگئے۔
غیرملکی خبرایجنسی کے مطابق شیلنگ ڈونیٹسک ریجن کے ٹوٹسک قصبے میں کی گئی۔ یوکرینی حکام کا کہنا ہے کہ ریسکیو اہلکاروں کو شیلنگ کی جگہ سے پانچ افراد کی لاشیں ملیں ہیں جو ممکنہ طور پر مارے گئے۔
تین افرادکو عمارت کے ملبے سے نکالا گیا جس میں سے ایک شخص ہسپتال میں جان کی بازی ہارگیا۔
ممبئی: (ویب ڈیسک) معروف بھارتی اداکارہ کاجول ڈزنی ہاٹ اسٹار کے ساتھ ویب سیریز میں ڈیبیو کرنے کے لیے تیار ہیں۔
بالی ووڈ کی ثمرن، اداکارہ کاجول نے اپنے آفیشل انسٹاگرام اکاؤنٹ سے ایک ویڈیو شیئر کی ہے جس میں انہوں نے مداحوں کو اپنے ویب شو کے ڈیبیو کی خبر دی ہے۔
میکرز نے کاجول کے ڈیبیو کا اعلان ایک ٹیزر کے ساتھ کیا جس میں کاجول بتارہی ہیں کہ وہ جلد ڈزنی اور ہاٹ اسٹار کے ساتھ اپنا ویب شو پیش کرنے والی ہیں۔
شو کے ٹیزر میں شاہ رخ خان کے ساتھ کاجول کی فلم، دل والے دلہنیا لے جائیں گے کے مشہور ’پلٹ ‘سین کا حوالہ دیا گیا ہے۔
کاجول کے شو کے ٹیزر کو شیئر کرتے ہوئے میکرز کیپشن میں لکھا کہ’’کچھ کچھ ہو رہا ہے، تم نہیں سمجھو گے، کیا آپ اندازہ لگا سکتے ہیں کہ ہم کیا کر رہے ہیں‘‘۔
یاد رہے کہ ویب شو بنانے والوں کا دعویٰ ہے کہ شائقین آئندہ ہاٹ اسٹار اسپیشلز میں کاجول کو بلکل نئے انداز میں دیکھیں گے تاہم یہ شو کس قسم کا ہوگا اس حوالے سے کوئی معلومات فراہم نہیں کی گئیں۔
دبئی: (ویب ڈیسک) ریس نامی برطانوی تارک وطن نے رواں ہفتے کے اوائل میں شادی کی اور اس کے بعد وہ محزوز کی قرعہ اندازی میں 10 ملین درہم کا گرینڈ پرائس جیت گیا۔
میڈیا رپورٹ کے مطابق ریس چار سال پہلے دبئی آیا اور اس وقت ایک جم میں کام کر رہا ہے، وہ گذشتہ ہفتے ہونے والی 84 ویں قرعہ اندازی جیت گیا۔ اس سے قبل اس نے ہم وطن لڑکی سے شادی کی جس کے ایک ہفتے بعد وہ قرعہ اندازی جیت گیا۔
چیک وصول کرنے کے دوران گفتگو میں اس کا کہنا تھا کہ جب قرعہ اندازی جیتنے کا پتہ چلا تو میں دم بخود رہ گیا۔ پھر اپنی منگیتر کی طرف بھاگا اور اسے کمپنی کی جانب سے بھیجی گئی ای میل دکھائی تو وہ جذبات کے مارے رو پڑی۔ ریس کا کہنا تھا کہ اس رات خوشی کے مارے سو نہیں سکا، ہم نے اپنے والدین کو مدعو کر کے خوشخبری سنائی ، یہ سب ایک خواب جیسا تھا۔
نئی دہلی: (ویب ڈیسک) بھارتی کمپنی نے ایک انگوٹھی پر 24,679 ہیرے جڑکرایک نیا ریکارڈ بنایا ہے جو سب سے زیادہ ہیروں والی انگوٹھی ہے اور اس کا وزن ایک پاؤ سے بھی زیادہ ہے۔
گلابی اوئسٹرمشروم کی شکل کی یہ انگوٹھی تھری ڈی پرنٹر سے ڈیزائن کی گئی تھی جسے 5 مئی 2022 تک مکمل کیا گیا تھا اور اب گنیز بک آف ورلڈ ریکارڈ نے اس کی باقاعدہ تصدیق کرتے ہوئے سند عطا کی ہے۔
یہ انگوٹھی ایس ڈبلیو اے ڈائمنڈ نامی فرم نے بنائی ہے جس کے مینیجر عبدالغفور انادیان نے بتایا کہ اس کا نام ’ایمی‘ رکھا گیا ہے ۔ سنسکرت کے اس لفظ کا مطلب لافانیت ہے جس کی خوبصورتی دیکھ کر دنیا بھر کے ڈیزائنر اور زیورات کے ماہرین نے اسے سراہا ہے۔
ایس ڈبلیو اے کے مطابق اس انگوٹھی پر مہارت سے ہزاروں چھوٹے بڑے ہیرے لگائے گئے ہیں جن کا مقصد کمپنی کے برانڈ کو فروغ دینا تھا۔ تاہم ہیرے اسطرح لگائے گئے ہیں کہ واضح دکھائی دیں اور خوبصورتی میں اضافہ کریں۔ اس کی ڈیزائننگ سے قبل ایک نمونہ (پروٹوٹائپ) پلاسٹک کے سانچے میں ڈھالا گیا تھا۔ لیکن کمپیوٹر کی مدد سے اس کی ڈیزائننگ کی گئی ہے اور کئی ماہرین نے اسے تین مہینے میں خواب سے حقیقت بنایا ہے۔
جب تھری ڈی پرنٹر سے خام سانچہ بنایا گیا تو اس پر مائع سونا انڈیلا گیا اور سرد ہونے پر مشروم کی اطراف 41 پتیاں نمودار ہوگئیں۔ تاہم گنیز بک آف ورلڈ ریکارڈ سے قبل غیرجانبدار ماہرین نے اسے دیکھا، تجرباتی مشاہدہ کیا اور اسے سب سے زیادہ ہیرے والی انگوٹھی کا اعزاز دیا۔
اس انگوٹھی کا وزن 340 گرام ہے اور قیمت 95 ہزار ڈالر سے کچھ زائد ہے۔
سِڈنی: (ویب ڈیسک) ایک نئی تحقیق میں بتایا گیا ہے انسانی دماغ اپنے لاشعورمیں ڈیپ فیکس کی نشان دہی کرنے کی صلاحیت رکھتا ہے۔ اس تحقیق کے بعد گمراہ کن معلومات کے پھیلنے سے روکنے کے لیے آلات بنانے میں مدد دے سکتے ہیں۔
ڈیپ فیکس وہ ویڈیوز، تصاویر، آڈیو یا پیغام ہوتے ہیں جو بظاہر حقیقی دِکھتےہیں لیکن اصل میں یہ کمپیوٹر سے بنائے گئے ہوتے ہیں جو لوگوں کو گمراہ کرتے ہیں اور ان کی آراء بدلتے ہیں۔
جرنل ویژن ریسرچ میں شائع ہونے والی تحقیق میں بتایا گیا کہ تحقیق میں شرکاء نے ڈیپ فیکس کی نشان دہی کرنے کی کوشش کی اور ان کے دماغ کے الیکٹرو اینسیفیلوگرافی اسکین کا استعمال کرتے ہوئے ان کا جائزہ لیا گیا۔
سائنس دانوں کی ٹیم، جن میں یونیورسٹی آف سِڈنی کے سائنس دان بھی شامل ہیں، کا کہنا تھا کہ ان افراد کے دماغوں کی جانب سے ان ڈیپ فیکس کی کامیابی کے ساتھ نشان دہی کی شرح 54 فی صد تھی۔ البتہ جب پہلے ایک گروپ سے زبانی طور پر ڈیپ فیکس کی نشان دہی کرائی گئی تو ان کی کامیابی کی شرح 37 فی صد تھی۔
یونیورسٹی آف سِڈنی کے تھامس کارلسن، جو تحقیق کے شریک مصنف بھی ہیں، کا کہنا تھا کہ اگرچہ اس مطالعے میں دماغ کی درستی کی شرح کم ہے لیکن یہ شماریاتی حساب سے معتبر ہے۔ یہ ہمیں بتاتا ہے کہ دماغ ڈیپ فیکس اور حقیقی تصاویر کے درمیان فرق کی نشان دہی کر سکتا ہے۔
دنیا بھر میں سائنس دان ڈیپ فیکس کی نشان دہی کرنے کے لیے نئے طریقے تلاش کرنے کی کوششیں کر رہے ہیں۔ اس نئی تحقیق کے حوالے سے محققین کا کہنا تھا کہ حاصل ہونے والے نتائج سے گمراہ کن آن لائن کانٹینٹ کے خلاف لڑنے میں مدد مل سکتی ہے۔
لندن: (ویب ڈیسک) انسانوں کے مشابہ مصنوعی ذہانت کا نظام بنانا کمپیوٹر سائنس کے لیے ایک بڑا چیلنج رہا ہے۔لیکن اب محققین نے دعویٰ کیا ہے کہ انہوں نے ایک ایسی مصنوعی ذہانت تشکیل دی ہے جس کو طبعی دنیا کے بنیادی اصول سِکھا دیے جائیں تو وہ بچوں کی طرح سوچ سکتی ہے۔
مصنوعی ذہانت کے ڈِیپ لرننگ سسٹم فطری طبعیات کو سیکھ سکتے ہیں۔ یہ وہ عام سمجھ بوجھ کے اصول ہوتے ہیں جس سے معلوم ہوتا ہے کہ طبعی دنیا میں اشیاء کیسے کام کرتی ہیں۔
تجربوں میں محققین نے پلیٹو نامی نئے نظام کی حرکت کرتی گیندوں کی اینیمیٹڈ سلائیڈز سے تربیت کی۔
بصری اینی میشن کے چھوٹے سے سیٹ سے سدھائے جانے کے بعد پلیٹو جو سیکھا اس کے اظہار کے قابل تھا، یہاں تک کہ اگر سلائیڈز میں ہلتی گیندیں کسی ناممکن طریقے سے ہلتیں تو وہ حیران بھی ہوتا۔
یہ نئی تحقیق نیو جرسی کی پرنسٹن یونیورسٹی، یونیورسٹی کالج لندن اور گوگل کی ایک کمپنی ڈِیپ مائنڈ کے محققین نے کی جو نیچر ہیومن بیہیویر میں شائع کی گئی۔
محققین کا کہنا تھا کہ ان کی تحقیق کے نتائج ایسے مصنوعی ذہانت کے ماڈلز بنانے کےلیے اہم ہیں جن میں انسانوں کی سمجھ جیسی سمجھ ہو۔
تحقیق کے مصنف ڈاکٹر لوئس ایس پِلوٹو کا کہنا تھا کہ طبعی دنیا کی سمجھ ایک اہم قابلیت ہے جو لوگ بغیر کسی محنت کےاستعمال میں لا رہے ہوتے ہیں۔
انہوں نے کہا کہ البتہ مصنوعی ذہانت کے لیے یہ ابھی تک ایک مسئلہ ہے۔ اگر ہم حقیقی دنیا میں ایسے مددگار نظام تعین کرنا چاہتے ہیں تو ہم کو ان ماڈلز کے ساتھ اپنی طبعی دنیا کی فطری حس شیئر کرنی ہوگی۔
