اسلام آباد: (ویب ڈیسک) سپریم کورٹ کے باہر فواد چودھری اور صحافیوں میں تلخ کلامی ہو گئی۔ صحافی کا سوال پوچھنا جرم بن گیا۔
پی ٹی آئی رہنما اسد عمر اور فواد چودھری سپریم کورٹ کے باہر میڈیا سے بات کر رہے تھے کہ اس دوران صحافی نے سوال کیا جس پر فواد چودھری سیخ پا ہو گئے اور صحافی کو کرائے کا آدمی کہا تو موقع پر موجود صحافیوں نے شدید احتجاج کیا جبکہ صحافی اور فواد چودھری کے درمیان تلخ جملوں کا تبادلہ ہوا، صحافیوں نے فواد چودھری سے معافی کا مطالبہ کیا جو نہ ماننے پر بائیکاٹ کر دیا گیا۔
قبل ازیں اسد عمر نے میڈیا سے گفتگو کرتے ہوئے کہا کہ شہباز شریف نے کہا قومی سلامتی کمیٹی میں اس لئے نہیں گیا کیونکہ کوئی اور اپوزیشن کا رکن مدعو نہیں تھا، سفیر کے تبادلے کا 4 ماہ پہلے اعلان ہوچکا تھا، قومی سلامتی کمیٹی کے اجلاس میں فیصلہ ہوا تمام معاملہ پارلیمان کے سامنے رکھا جائے، کل مریم نواز نے پریس کانفرنس کی اور کہا کہ مراسلہ جعلی ہے۔

اسلام آباد: (ویب ڈیسک) ایوان صدر نے الیکشن کمیشن کو عام انتخابات کے انعقاد کے حوالے سے خط لکھ دیا۔ خط میں الیکشن کمیشن کو 90 دن کے اندر الیکشن کرانے کیلئے تاریخ دینے کا کہا گیا۔
خط میں کہا گیا کہ آئین کے آرٹیکل 48 کی شق 5 اور آرٹیکل اے 224 (2) کے تحت صدر مملکت عام انتخابات کرانے کی تاریخ مقرر کریں گے، قومی اسمبلی کے انتخابات کیلئے اسمبلی کی تحلیل کے 90 دن کے اندر اندر انتخابات کرانا ہوتے ہیں، عام انتخابات کی تاریخ کے اعلان کیلئے الیکشن ایکٹ 2017 ء کے تحت الیکشن کمیشن سے مشاورت ضروری ہے۔

اسلام آباد: (ویب ڈیسک) سپریم کورٹ میں ڈپٹی اسپیکر کی رولنگ سے متعلق ازخود نوٹس کی سماعت جاری ہے۔
چیف جسٹس پاکستان کی سربراہی میں پانچ رکنی لارجر بینچ ڈپٹی اسپیکر کی رولنگ سے متعلق ازخود نوٹس کی سماعت کر رہا ہے۔ مسلم لیگ ن کے وکیل اعظم نذیر تارڑ روسٹرم پر آگئے اور عدالت کو بتایا کہ ڈپٹی اسپیکر نے آج شام کو اجلاس بلایا تھا، لاہور میں حالات کشیدہ ہیں، اسمبلی کا عملہ ڈپٹی اسپیکر کا حکم نہیں مان رہا، لگتا ہے آج بھی وزیراعلی کا الیکشن نہیں ہو سکے گا۔
چیف جسٹس نے ریمارکس دیئے کہ آج بہت اہم کیس سن رہے ہیں، کوشش ہے کہ مقدمہ کو نمٹایا جائے، عدالت پر الزام لگایا جا رہا ہے کہ فیصلہ نہیں کر رہی، سیاسی طور پر مسئلے کو حل کرنے کی کوشش کریں، یکطرفہ فیصلہ کیسے دے سکتے ہیں؟۔
تحریک انصاف کے وکیل بابر اعوان نے دلائل دیتے ہوئے کہا کہ ایم کیو ایم، تحریک لبیک، پی ٹی ایم، جماعت اسلامی کیس میں فریق نہیں، راہ حق پارٹی اور باپ بھی پارلیمان کا حصہ ہیں لیکن کیس میں فریق نہیں، ازخود نوٹس کی ہمیشہ عدالت کے اندر اور باہر حمایت کی ہے، عدالت کا مشکور ہوں کہ قوم پر مہربانی کرتے ہوئے نوٹس لیا، عدالت کو کہا گیا ڈپٹی اسپیکر کی رولنگ بدنیتی پر مبنی اور غیر آئینی ہے۔
وکیل بابر اعوان نے کہا کہ سپریم کورٹ آرٹیکل 63 اے پر کسی نے لفظ بھی نہیں کہا، ان کا دعویٰ ہے کہ پارلیمانی جمہوریت کو بچانے کی کوشش کر رہے ہیں، پٹیشنر کہتے ہیں کہ عدالت ان کے حق میں شارٹ آرڈر بھی جاری کر دے، شہباز شریف نے پریس کانفرنس میں کمیشن بنانے کا مطالبہ کیا ہے، درخواست گزار نیشنل سکیورٹی کمیٹی کا رولنگ میں دیئے حوالہ کو نظر انداز کرنا چاہتی ہیں، اپوزیشن چاہتی ہے عدالت ان کے حق میں فوری مختصر حکم نامہ جاری کرے۔

اسلام آباد: (ویب ڈیسک) احسن اقبال نے کہا ہے کہ فارن فنڈنگ کیس میں عمران نیازی کی چوری پکڑی گئی، تحقیقات سے بچنے کیلئے پاکستان کے امریکا سے تعلقات کو داؤ پر لگا دیا۔
پاکستان مسلم لیگ نون کے رہنما احسن اقبال نے میڈیا سے گفتگو کرتے ہوئے کہا کہ فارن فنڈنگ کیس میں عمران نیازی نے امریکا سے منی لانڈرنگ کی، عمران نیازی نے امریکا میں غیر قانونی سرگرمیاں کیں، عمران خان نے اپنی کرسی بچانے کیلئے آئین توڑا، انہوں نے پاکستان کی خارجہ پالیسی کو داؤ پر لگا دیا پاکستان کو آئینی بحران میں دھکیل دیا گیا۔
احسن اقبال کا کہنا تھا کہ ہر شہری کا فرض ہے کہ آئین کے تحفظ کیلئے کھڑا ہو، امریکا ہماری سب سے بڑی ایکسپورٹ مارکیٹ ہے، ایک شخص نے اپنی چوری چھپانے کیلئے پاک امریکا تعلقات داؤ پر لگائے، آپ نے ہمارے خلیجی ممالک کیساتھ بھی تعلقات سرد ترین کر دیئے، عمران نیازی ! آپ پاکستان کیلئے شرمساری کا باعث بن چکے، کسی بھی ریاست میں سب سے پہلے آئین ہوتا ہے۔

اسلام آباد: (ویب ڈیسک) وزیراعظم نے کہا ہے کہ غیر ملکی طاقت نے میر جعفروں اور میر صادقوں کے ذریعے وار کیا، عوام سب سے بڑے حملے کے دفاع کیلئے باہر نکلیں۔
وزیراعظم عمران خان نے سماجی رابطے کی ویب سائٹ ٹویٹر پر اپنے پیغام میں کہا ہے کہ عوام ملکی خود مختاری اور جمہوریت کے مضبوط ترین محافظ ہوتے ہیں، عوام کو گھروں سے باہر نکلنا ہوگا۔