اسلام آباد: (ویب ڈیسک) وزیر اعظم عمران خان کے معاون خصوصی شہباز گل نے کہا ہے کہ خواتین کے بارے میں غیر اخلاقی باتیں کرنا ن لیگ کا وطیرہ ہے
وزیر اعظم کے معاون خصوصی شہباز گل نے پریس کانفرنس کرتے ہوئے کہا کہ سیاست میں گھریلو خواتین کو نہیں لانا چاہیے اور جو خواتین سیاست کرتی ہیں ان کو سیاسی جواب دیا جاتا ہے۔ خواتین کو عزت دینا ہماری اقدار کا حصہ ہے اور گھروں میں بیٹھی خواتین پر جملے بازی نہیں کی جاتی۔
انہوں نے کہا کہ ماضی میں بے نظیر بھٹو کے بارے میں غیر اخلاقی گفتگو کی گئی اور مسلم لیگ ن نے جہاں دیگر برائیاں شروع کیں وہاں یہ بھی شروع کی۔ خاتون اول کے بارے میں نامناسب زبان استعمال کی جاتی ہے جبکہ خاتون اول نہ سیاست کرتی ہیں نہ کوئی بیان بازی۔
شہباز گل نے کہا کہ قائد حزب اختلاف شہباز شریف نے اپنی غیر سیاسی بیگمات کے نام پر گھر خریدے۔ خاتون اول کی دوست فرح بی بی پر حملہ آور ہو رہے ہیں جس کا مقصد عمران خان کو نشانہ بنانا ہے۔ فرح بی بی نے کوئی ٹھیکہ لیا یا ذاتی فائدہ لیا تو بتائیں۔ کسی کی ذاتی زندگی کو نشانہ نہیں بنانا چاہیے جبکہ شہباز شریف نے بیویوں کو فائدہ پہنچایا تو اس پر بات کی لیکن نام نہیں لیا۔
انہوں نے کہا کہ مسلم لیگ ن نے ہیلی کاپٹر سے شہید محترمہ اور ان کی والدہ کی تصاویر پھینکیں اور اب یہ لوگ بار بار خاتون اول پر تنقید کر رہے ہیں جبکہ خاتون اول نے کبھی کسی کو برا نہیں کہا لیکن شہباز شریف اور مریم صفدر تنقید کر رہے ہیں۔ ہم نے ان کو نہیں روکا اس لیے یہ بار بار حرکتیں کرتے رہے۔
معاون خصوصی نے کہا کہ خواتین کے بارے میں غیراخلاقی باتیں کرنا ن لیگ کا خاندانی وتیرہ ہے جبکہ عمران خان کے کوئی کیمپ آفس نہیں ہیں اور آج تک عمران خان نے کوئی بھی نجی دورہ سرکاری دورے پر نہیں کیا۔
انہوں نے کہا کہ جتنی دیر عمران خان وزیر اعظم رہے اتنے وقت میں نواز شریف نے 18 فیکٹریاں بنا لیں لیکن کیا عمران خان نے 18 فیکٹریاں لگائیں، یا نجی دورے کیے، یا مقصود چپڑاسی کو پیسے دیئے تو بتائیں ؟ عمران خان تو ہیلی کاپٹر پر پائے نہیں منگواتے جبکہ وزیر اعظم آفس سے پتہ چلا مریم نواز کی ملازمہ کو بھی ہیلی کاپٹر لاہور چھوڑ کر آتا تھا۔
شہباز گل نے کہا کہ اگر آپ کے پاس کوئی سیاسی بات ہے تو وہ کریں لیکن یہ تو سیاست میں ہر جگہ پر ناکام ہوئے ہیں۔ سرخی، پوڈر لگا کر اب یہ لوگ انقلابی ہو گئے ہیں۔

کوئٹہ: (ویب ڈیسک) وزیراعلیٰ بلوچستان میر عبدالقدوس بزنجو نے ایک اور وزیر کا قلمدان تبدیل کر دیا ہے۔
حکومت بلوچستان کے جاری ہونے والے نوٹیفکیشن کے مطابق وزیراعلیٰ بلوچستان نے سردارمسعود لونی سے ٹرانسپورٹ و بہبود آبادی کا قلمدان لیکر انہیں محکمہ جنگلات کا قلمدان دے دیا ہے۔
اس سے قبل نورمحمد دمڑ کا بھی قلمدان بدل دیا تھا، ان سے وزارت خزانہ کا قلم لیکر انہیں منصوبہ بندی و ترقیات کا قلم دان دیا گیا ہے۔

لاہور: (ویب ڈیسک) پاکستان مسلم لیگ کی نائب صدر مریم نواز نے عمران خان کو سابق وزیراعظم قرار دیتے ہوئے کہا کہ اس سے زیادہ مُلکی سلامتی کے لیے خطرناک بات اور کیا ہوسکتی ہے عمران خان اقتدار بچانے کے لیے جھوٹی سازشوں کا ڈرامہ کر کہ مُلک کا تماشہ بنا دے؟
سماجی رابطے کی ویب سائٹ ٹویٹر اپنے سلسلہ وار ٹویٹس میں پاکستان مسلم لیگ ن کی نائب صدر نے عمران خان کو سابق جعلی وزیراعظم مخاطب کرتے ہوئے کہا کہ آپ تو سب سے بڑے عالمی لیڈر تھے؟ کبھی سعودی عرب، ایران کے درمیان ثالثی۔ کبھی روس یوکرائن کے درمیان ثالثی۔ یہ اچانک کیا ہوگیا کہ آپ کے خلاف سازش ہوگیئ ؟
انہوں نے وزیراعظم کو مخاطب کرتے ہوئے مزید کہا کہ آپ تومغرب کے چہیتے تھے نہ؟ اقتدار جاتا دیکھ کر پاکستان کی سلامتی سے کھلواڑ مت کرو۔ سبز ہلالی پرچم پر 35 ٹانکے مت لگاو۔
ایک اور ٹویٹ میں مریم نواز نے کہا کہ تمہارے ہاتھ میں اقتدار بندر کے ہاتھ میں استرا ہے۔ خود کو بھی زخمی کر رہے ہو اور پاکستان کو بھی زخمی کر رہے ہو۔
لیگی نائب صدر کا کہنا تھا کہ کل تک تم عدم اعتماد کی دعائیں مانگتے تھے۔ آج اسے غیر ملکی سازش کہہ رہے ہو؟ حواس پر قابو رکھو۔ پاکستان کو دنیا بھر میں رسوا نہ کرو۔ اور اس کی سلامتی سے مت کھیلو۔
انہوں نے مزید کہا کہ نوازشریف کو 3 بار وزارتِ عظمٰی کے عہدے سے ہٹایا گیا لیکن انہوں نے مُلکی سلامتی پر آنچ نہیں آنے دی۔ نہ کسی پر جھوٹے الزام لگائے۔ اس سے زیادہ مُلکی سلامتی کے لیے خطرناک بات اور کیا ہوسکتی ہے کہ ملک کا وزیراعظم اپنا اقتدار بچانے کے لیے جھوٹی سازشوں کا ڈرامہ کر کہ مُلک کا تماشا بنا دے؟

اسلام آباد: (ویب ڈیسک) بلوچستان عوامی پارٹی (بی اے پی) کے ایک اور رکن کا حکومت میں واپسی کا امکان ہے۔
حکومتی ذرائع کے مطابق وزیراعظم کے خلاف تحریک عدم اعتماد کے معاملے پر بے اے پی کی اپوزیشن میں شمولیت کے بعد حکومتی دعویٰ سامنے آیا ہے جس کے مطابق بی اے پی کے ایک رکن نے حکومت سے رابطہ کیا ہے۔
اس حوالے سے حکومتی ذرائع کی جانب سے مزید کہا گیا کہ زبیدہ جلال پہلے ہی اپوزیشن اتحاد میں جانے سے انکار کر چکی ہیں۔
خیال رہے کہ بی اے پی ارکان نے گزشتہ رات اپوزیشن اتحاد میں شمولیت کا اعلان کیا تھا۔
واضح رہے کہ وزیراعظم عمران خان کے خلاف متحدہ اپوزیشن کی جانب سے تحریک عدم اعتماد پیش کئے جانے کے بعد نمبر گیم کی صورتحال دلچسپ صورتحال اختیار کرگئی ہے، 4 آزاد امیدوار، جمہوری وطن پارٹی کے شاہ زین بگٹی اور بی اے پی کے خالد مگسی حکومت سے علیحدہ ہوکر اپوزیشن سے جاملے ہیں جبکہ اس وقت سب کی توجہ ایم کیو ایم کے فیصلے پر ہے۔

اسلام آباد: (ویب ڈیسک) پاکستان مسلم لیگ ق کے رہنما اور وفاقی وزیر کا عہدہ چھوڑنے والے طارق بشیر چیمہ نے کہا ہے کہ تحریک عدم اعتماد کے حق میں ووٹ دوں گا۔
چیئر مین سینیٹ صادق سنجرانی کے ساتھ ملاقات کے بعد میڈیا سے گفتگو کرتے ہوئے انہوں نے کہا کہ میڈیا کے دل میں جو آتا ہے چلا دیتے ہو، کس نے اطلاع دی پارٹی سے ناراض ہوں۔
صحافی نے سوال کیا کہ فرخ حبیب نے ٹویٹ میں کہا کہ طارق چیمہ دوریاں پیدا کر رہے تھے، اس پر جواب دیتے ہوئے ق لیگی رہنما نے کہا کہ میں نے فرخ حبیب سے مشورہ کیا ہو گا، اس کو ناراضگی کا پتہ ہو گا، کل کا استعفی دیدیا ہے، واپس نہیں لوں گا۔
انہوں نے مزید کہا کہ میں عدم اعتماد کے حق میں ووٹ دوں گا، شہباز شریف سمیت اپوزیشن کے کسی رہنما سے کوئی ملاقات نہیں ہے، ق لیگ میں ہوں، چودھری صاحب کیساتھ ہوں، انکا ورکر ہوں۔