لاہور: (ویب ڈیسک) وزیراعظم عمران خان کے خلاف تحریک عدم اعتماد پر ووٹنگ سے قبل پاکستان تحریک انصاف (پی ٹی آئی) نے پاکستان پیپلز پارٹی کی بڑی وکٹ گرا دی۔
پاکستان پیپلز پارٹی کے سینئر رہنما، سابقہ سینئر مشیر، سینیٹر اور قانون دان افتخار احمد نے وزیراعظم عمران خان کے ایک ادنا سپاہی کی حیثیت سے پاکستان تحریک انصاف میں شمولیت کا اعلان کر دیا۔
اپنے ایک ویڈیو بیان میں انہوں نے کہا کہ عمران خان مضبوط حکمران ہے اور میری شمولیت سے اس کی قوت میں کوئی خاطر خواہ فرق نہیں پڑنا لیکن میں اپنے اس عمل سے اپنے ان کثیر تعداد میں دنیا کے طول وارض میں موجود تعلیم یافتہ اور ذی شعور دوستوں میں احساس پیدا کرنا چاہتا ہوں کہ جب ہمارے ملک پر کرپٹ مافیا اور عوام کا خون چوسنے والی جونکیں حملہ آور ہو تو ایک نکڑ پر کھڑے تماشائی بن کر نہیں رکھنا چاہیے۔
دوسری طرف وزیر مملکت فرخ حبیب نے بیرسٹر افتخار احمد کی پاکستان تحریک انصاف میں شمولیت کا خیر مقدم کیا ہے۔
فرخ حبیب نے کہا ہے کہ وزیر اعظم عمران خان کی دیانت اور اصول پسندی دنیا بھر میں مثال بن چکی ہے۔ باشعور طبقہ وزیر اعظم عمران خان کے پیغام پر لبیک کہہ رہا ہے، 27 مارچ کا جلسہ قومی فساد کی سیاست کے خلاف فیصلہ دے گا۔

اسلام آباد: (ویب ڈیسک) متحدہ قومی موومنٹ (ایم کیو ایم) کے ساتھ ملاقات کے بعد وفاقی وزیر خارجہ شاہ محمود قریشی کا مسلم لیگ ق کے رہنما اور سپیکر پنجاب اسمبلی چودھری پرویز الٰہی کے ساتھ ٹیلیفونک رابطہ ہوا ہے۔
وزیراعظم عمران خان کے خلاف تحریک عدم اعتماد میں ووٹنگ سے قبل حکومت کے اپنے اتحادیوں کے ساتھ رابطے تیز ہو گئے ہیں، ایم کیو ایم کے بعد وفاقی وزیر خارجہ شاہ محمود قریشی نے چودھری پرویز الٰہی کو ٹیلیفون کیا ہے ، جبکہ چودھری برادران کے ساتھ ملاقات کا وقت طے پا گیا ہے۔
شاہ محمود قریشی، پرویز خٹک کے ہمراہ ہفتہ کی دوپہر 2 بجے لاہور میں پرویز الٰہی کی رہائش گاہ پر ملاقات کریں گے۔
ملاقات کے دوران وزیر خارجہ، وزیر اعظم عمران خان کا اہم پیغام چودھری برادران تک پہنچائیں گے۔

اسلام آباد: (ویب ڈیسک) پاکستان مسلم لیگ ن کے رہنما احسن اقبال نے کہا ہے کہ فارن فنڈنگ کیس میں سات سالہ حساب مانگا جا رہا ہے، بیرون ملک پاکستانیوں کا پیسہ کھا گئے ہو، اس سب فراڈ کا ان کے پاس کوئی جواب نہیں، اگر آپ نے گھپلے نہیں کیے تو جواب دو۔
میڈیا سے گفتگو کرتے ہوئے انہوں نے کہا کہ آج پھر عمران نیازی نے الیکشن کمیشن کے ضابطہ اخلاق کی دھجیاں اڑائیں، یہ پاکستان کو وہ وزیراعظم ہے جو قانون کا درس دیتا ہے، خود قانون شکنی کرتا ہے، وہ ملک کے لوگوں کو کس طرح درس دے سکتا ہے، جو خود اداروں کی تذلیل کر رہا ہے، یہ فاشسٹ حکمران کے طور پر قومی اداروں کو مرضی کے مطابق چلا رہا ہے۔ 7 مہینے تک عمران خان اور بزدار نے سپریم کورٹ کے فیصلے کو رد کیا۔
لیگی رہنما کا کہنا تھا کہ پوری دنیا میں عالمی ریکارڈ بنایا، اسی طرح الیکشن کمیشن کے ضابطہ اخلاق اور نوٹس کی خلاف ورزی کر رہا ہے، یہ خود کو ولی اللہ سمجھ رہے ہیں، فارن فنڈنگ کیس میں سات سالہ حساب مانگا جا رہا ہے، بیرون ملک پاکستانیوں کا پیسہ کھا گئے ہو، اس سب فراڈ کا ان کے پاس کوئی جواب نہیں، اگر آپ نے گھپلے نہیں کیے تو جواب دو۔ آپ نہ صادق وامین ہو، جھوٹے اور فراڈ کے مرتکب ہو، امر بالمعروف کا مطلب یہ نہیں ملک کو کرپشن کی علامت بنا دو، امر بالمعروف یہ نہیں کہتا، کھانے کی اشیاء کو آگ لگا دو، غریب آدمی کی پہنچ سے آج تمام چیزیں دور ہیں۔
احسن اقبال کا مزید کہنا تھا کہ پاکستان کے نوجوان آپ کی طرح نالائق نہیں ہیں، تحریک عدم اعتماد اس لیے ہے، آپ نے بہترین ماہرین لانے کا دعویٰ کیا، عوام کو نوکریوں اور مہنگائی کم کرنے کے دعویٰ کیے، پہلے نوکریوں اور پچاس لاکھ گھروں کا حساب دیں۔

اسلام آباد: (ویب ڈیسک) وزیراعظم کے خلاف تحریک عدم اعتماد آنے کے بعد اُسے ناکام بنانے کے لیے وفاقی وزیر خارجہ شاہ محمود قریشی متحرک ہو گئے۔
وزیراعظم عمران خان کی خصوصی ہدایت پر وزیر خارجہ شاہ محمود قریشی، وفاقی وزیر برائے منصوبہ بندی اسد عمر، وفاقی وزیر دفاع پرویز خٹک کے ہمراہ متحدہ قومی موومنٹ (ایم کیو ایم) کے وفد سے اسلام آباد میں ملاقات کی۔
ایم کیو ایم رہنماؤں میں وفاقی وزیر فروغ نسیم، وفاقی وزیر امین الحق، جاوید حنیف، صادق افتخار شامل تھے۔
ملاقات کے دوران وزیر خارجہ نے وزیراعظم عمران خان کی جانب سے اہم پیغام متحدہ قومی موومنٹ کے رہنماؤں کو پہنچایا۔
وزیر خارجہ شاہ محمود قریشی نے حکومت کی اتحادی جماعت کے وفد سے ملاقات میں کہا ہے کہ متحدہ قومی موومنٹ (ایم کیو ایم) پاکستان نے واضح کیا کہ پیپلز پارٹی کے ساتھ کوئی معاہدہ نہیں ہوا۔
ایم کیو ایم پاکستان کے وفد سے ملاقات کے بعد وفاقی وزیر منصوبہ بندی اسد عمر کے ہمراہ پریس کانفرنس کے دوران انہوں نے کہا کہ ایم کیو ایم نے واضح کہا کہ پیپلز پارٹی غلط بیانی کررہی ہے۔
انہوں نے مزید کہا کہ خیرسگالی کاپیغام لےکر ایم کیوایم پاکستان کے پاس گئے تھے اور وہ پیغام تھا کہ آپ ہمارےدوست ہیں ساتھ چلتےرہیں گے۔ ایم کیوایم وفد کے ساتھ خوشگوارماحول میں بات ہوئی اور ہماری اتحادی جماعت سےملاقات مثبت اورمفید رہی ہے جبکہ وفد میرا پیغام ایم کیوایم پاکستان قیادت تک پہنچائےگا۔

پشاور: (ویب ڈیسک) خیبر پختون خوا حکومت نے صوبے بھر کے پرائمری اور ہائر سیکنڈری اسکولوں میں موسم بہار کی تعطیلات کا اعلان کردیا۔
خیبر پختون خوا حکومت نے صوبے بھر میں پرائمری اور ہائر سیکنڈری اسکولوں میں یکم اپریل سے موسم بہار کی تعطیلات کا نوٹی فکیشن جاری کردیا۔
محکمہ تعلیم خیبر پختون خوا کے جاری کردہ نوٹی فکیشن کے مطابق یکم اپریل سے 7 اپریل تک اسکول بند رہیں گے۔