ممبئی: (ویب ڈیسک) بالی وڈ کی معروف اداکارہ پریانکا چوپڑا اور ان کے گلوکار شوہر نک جونس کے گھر سروگیسی کے ذریعے بیٹی پیدا ہوئی تھی تاہم اس کا نام اب تک میڈیا میں سامنے نہیں لایا گیا تھا۔
جوڑے کی جانب سے جہاں باضابطہ بیٹی کا نام سامنے لانا اب بھی باقی ہے وہیں بھارتی میڈیا کو اس کا پیدائشی سرٹفکیٹ مل گیا ہے۔
پیدائشی سرٹفکیٹ کے مطابق پریانکا چوپڑا اور نک جونس نے اپنی بیٹی کا نام مالتی میری چوپڑا جونس رکھا ہے۔
واضح رہے کہ نک جونس اور پریانکا چوپڑا دونوں نے سماجی رابطے کی ویب سائٹ پر 22 جنوری کو اعلان کیا تھا کہ ان کے ہاں بیٹی پیدا ہوئی ہے۔

ممبئی: (ویب ڈیسک) بالی ووڈ کے ایکشن ہیرو اکشے کمار نے شائقین کی تنقید کے بعد گٹکے کے اشتہار میں کام کرنے پر معذرت کرلی۔
اداکار اکشے کمار حال ہی میں اداکار اجے دیوگن اور شاہ رخ خان کے ہمراہ گٹکے کے اشتہار میں نظر آئے تھے جسے دیکھ کر سوشل میڈیا صارفین بھڑک گئے تھے اور اداکار پر غصے کا اظہار کرتے ہوئے کہا تھا کہ دوسروں کو نشہ آور اشیا سے دور رہنے کی تلقین کرنے والے اکشے کمار جو خود بھی شراب اور سگریٹ نوشی جیسی چیزوں سے دور رہتے ہیں، اب خود گٹکے کے اشتہار میں کام کررہے ہیں۔
جب تنقید حد سے بڑھ گئی تو اکشے کمار نے سوشل میڈیا پر ایک نوٹ شیئر کیا جس میں انہوں نے گٹکے کے اشتہار میں کام کرنے پر معافی مانگی ہے۔
اکشے کمار نے لکھا ’’میں اپنے مداحوں، خیرخواہوں اور آپ تمام لوگوں سے معافی مانگتا ہوں۔ پچھلے کچھ دنوں میں آپ لوگوں کی جانب سے ملنے والے ردعمل نے مجھے بے حد متاثر کیا۔ اگرچہ میں تمباکو کی توثیق نہیں کرتا اور نا ہی کروں گا۔ میں ویمل الائچی کے ساتھ اپنی وابستگی کی روشنی میں آپ کے جذبات کے اظہار کا احترام کرتا ہوں۔
اکشے کمار نے گٹکے کے اشتہار میں کام کرنے پرافسوس کا اظہار کرتے ہوئے کہا پوری عاجزی کے ساتھ میں پیچھے ہٹتا ہوں۔ اور اس اشتہار میں کام کے لیے ملنے والی پوری فیس کو میں نے ایک اچھے مقصد کے لیے استعمال کرنے کا فیصلہ کیا ہے۔
انہوں نے کہا کہ برانڈ اس معاہدے کی قانونی مدت تک اشتہارات نشر کرنا جاری رکھ سکتا ہے، لیکن میں وعدہ کرتا ہوں کہ میں مستقبل میں اشتہارات کے انتخاب میں انتہائی محتاط رہوں گا۔ بدلے میں ہمیشہ آپ کی محبت اور نیک تمناؤں کا طلبگار رہوں گا۔ اکشے کمار‘‘۔
واضح رہے کہ اکشے کمار نے 2018 میں کہا تھا کہ مجھے گٹکا کمپنیز سے متعدد مرتبہ بھاری معاوضے کے عوض اشتہارات میں کام کرنے کی پیشکش ہوئی مگر میں غلط کام نہیں کروں گا۔