شیخوپورہ : (ویب ڈیسک) شیخوپورہ میں پی ٹی آئی کے منخرف سابق صوبائی وزیر میاں خالد محمود کے گھر کے باہر فائرنگ واقعے پر پولیس نے 150 پی ٹی آئی کارکنوں کے خلاف سنگین نوعیت کی دفعات کے تحت مقدمہ درج کر لیا، 8 ملزمان کو گرفتار کر لیا گیا ہے۔
عمران خان کی کال پر پی ٹی آئی کے کارکنوں کی احتجاجی ریلی منحرف سابق صوبائی وزیر میاں خالد محمود کے گھر کے باہر سے گزر رہی تھی کہ ریلی میں سے پی ٹی آئی کارکنوں نے ہوائی فائرنگ کردی جس پر میاں خالد محمود کے گھر کے اندر سے ملازمین نے بھی فائرنگ کی۔
واقعہ کی اطلاع ملتے ہی ڈی پی او شیخوپورہ، ایس پی انویسٹی گیشن اور پولیس کی بھاری نفری موقع پر پہنچ گئی، میاں خالد محمود کے بیٹے میاں تیمور خالد نے ڈی پی او کی اپنے ڈرائیور غلام عباس کی مدعیت میں تحریری درخواست دی جس پر تھانہ بی ڈویژن میں مقدمہ درج کرلیا گیا۔
ایف آئی آر میں الزام لگایا گیا کہ پی ٹی آئی کے 20 کے قریب نامزد اور 150 نامعلوم کارکنان میاں خالد محمود کی رہائش گاہ پر حملہ آور ہوئے اور فائرنگ کرتے ہوئے گھر توڑ پھوڑ کی، ملازمین کو تشدد کرکے نقدی و موبائل فون چھین لیے، بی ڈویژن پولیس نے 8 ملزمان کو گرفتار کر لیا ہے۔

لاہور: (ویب ڈیسک) پیراگون ہاؤسنگ سوسائٹی ریفرنس میں نیب کے تین گواہوں کے بیانات قلمبند کرنے کے بعد عدالت نے سماعت 27 اپریل تک ملتوی کر دی۔
احتساب عدالت کے جج نسیم احمد ورک نے پیراگون ہاؤسنگ سوسائٹی ریفرنس پر سماعت کی۔ لیگی رہنما خواجہ سلمان رفیق نے عدالت میں پیش ہو کر حاضری مکمل کروائی۔ خواجہ سعد رفیق کی جانب سے حاضری معافی کی درخواست دائر کی گئی۔
درخواست میں مؤقف اختیار کیا گیا کہ خواجہ سعد رفیق قومی اسمبلی کے اجلاس کے باعث عدالت میں پیش نہیں ہو سکتے۔ عدالت نے وکلا کے دلائل کے بعد حاضری معافی کی درخواست منظور کر لی۔
نیب کی جانب سے 3 گواہوں کے بیانات قلمبند کئے گئے۔ گواہ نسیم اختر، محمد یونس اور محمد اعجاز نے بیان قلمبند کروائے۔ گواہوں نے عدالت کو بتایا کہ اخبار میں اشتہار دیکھ کر پیراگون ہاؤسنگ سوسائٹی کے پلاٹوں کی فائلیں خریدیں، آج تک کوئی قبضہ دیا گیا نہ رقم واپس کی گئی۔
عدالت میں پیشی کے بعد میڈیا سے گفتگو میں خواجہ سلمان رفیق نے کہا کہ اللہ کا شکر ہے پاکستان میں آئین اور قانون کی جیت ہوئی، پنجاب میں بھی تحریک عدم اعتماد کامیاب ہوگی۔ احتساب عدالت نے پیراگون ہاؤسنگ سوسائٹی ریفرنس پر سماعت 27 اپریل تک ملتوی کر دی۔

اسلام آباد : پاکستان تحریک انصاف کے تمام ارکان قومی اسمبلی نے مستعفی ہونے کا فیصلہ  کرلیا، عمران خان نے کہا کہ میں ان چوروں کےساتھ اسمبلی میں نہیں بیٹھوں گا۔

تفصیلات کے مطابق عمران خان کی زیر صدارت پی ٹی آئی کی پارلیمانی پارٹی کا اجلاس ہو ، فرنٹ لائن میں عمران خان کیساتھ شاہ محمود، اسد قیصر،اسد عمر اور پرویز خٹک موجود تھے۔

اسلام آباد: (ویب ڈیسک) سپریم کورٹ میں تحریک انصاف نے آرٹیکل 63 اے سے متعلق صدارتی ریفرنس پر فل کورٹ بنانے کی درخواست دائرکردی۔ ذرائع کے مطابق درخواست پی ٹی آئی کے وکیل بابر اعوان نے دائر کی۔
موقف میں کہا گیا ہے کہ سپریم کورٹ کا پانچ رکنی لارجر بینچ تحریک عدم اعتماد سے متعلق کیس سن چکا ہے، کیس میں 5رکنی لارجر بینچ آرٹیکل 63 سے متعلق ریمارکس بھی دے چکا ہے، کیس میں عدلیہ کی آزادی اور عدلیہ کو دوسرے ریاستی اداروں سے الگ کرنے کا سوال ہے۔
کیس میں پارلیمان کی بالادستی اور پارلیمانی نظام حکومت کے مستقبل کا بھی سوال ہے، ذوالفقار بھٹو،اٹھارہویں ترمیم سمیت عوامی مفاد کے متعدد ریفرنس فل کورٹ میں سنے گئے۔

اسلام آباد: (ویب ڈیسک) سابق وزیر داخلہ شیخ رشید کا کہنا ہے کہ امپورٹڈ حکومت قائم رہ گئی تو میرا نام شہباز شریف رکھ دینا۔
انہوں نے کہا ہے کہ سیاست اب شروع ہوئی ہے اب ان کو پتہ چلے گا کہ کتنے بیس کا سو ہے۔یہ لوگ اتوار کو فائلیں بدلتے رہے ہیں ۔
انہوں نے کہا ہے کہ وہ جن کے چہرے لوگ دیکھنا نہیں چاہتے، انہوں نے اتوار کو بیوروکریسی کا سہارا لے کر فائلیں بدلی ہیں۔فائلیں بندلنے کا مقصد تھا کہ ان پر فرد جرم نہ لگے۔
ان کا کہنا ہے کہ فوج اور اسٹیبلشمنٹ کو اب سوچنا ہوگا۔امپورٹڈ حکومت قائم رہ گئی تو میرا نام شہباز شریف رکھ دینا۔

اسلام آباد: (ویب ڈیسک) سابق وزیراعظم عمران خان پر پی ٹی آئی کے پارلیمانی پارٹی کے ممبران نے بھرپور اعتماد کا اظہار کرتے ہوئے تمام فیصلوں پر ساتھ کھڑے رہنے کی یقین دہانی کروائی ہے۔
پی ٹی آئی کی پارلیمانی پارٹی کا اجلاس سابق وزیراعظم عمران خان کی زیرصدارت منعقد ہوا، اجلاس کے دوران پارلیمنٹ کے اندر اور باہر جارحانہ سیاست پر مشاورت ہوئی۔ ذرائع کے مطابق استعفوں کے معاملے پر ارکین کی الگ الگ تجاویز سامنے آئیں تاہم انہوں نے عمران خان کو استعفوں سے متعلق ہر قسم کے فیصلے پر فری ہینڈ دے دیا۔
قبل ازیں سابق وزیراعظم عمران خان پارلیمنٹ ہاؤس پہنچے تو پارلیمانی اجلاس کے اراکین نے کھڑے ہو کر ان کا استقبال کیا۔ اس دوران صحافی نے سوال کیا کہ عوام کے پرامن احتجاج پر کیا کہیں گے، عمران خان نے جواب دیا کہ عزت اللہ دیتا ہے۔

منڈی بہاءالدین: (ویب ڈیسک) منڈی بہاءالدین کتووال اڈہ کے قریب دیرینہ دشمنی پر مسلح افراد نے کار پر فائرنگ کر دی، جس کے سبب دو حقیقی بھائیوں سمیت تین افراد موقع پر جاں بحق ہوگئے۔
منڈی بہاءالدین تھانہ ملکوال کے علاقہ کتووال کے رہائشی دو حقیقی بھائی غلام عباس، نوید عباس ولد متعلی خاں ساکن پھپھرہ اور شہزاد غوری ساکن سرگودھا کے ہمراہ گھر سے ہریا گاوں کی طرف جا رہے تھے کہ راستہ میں گھات لگائے مسلح افراد نے ان پر اندھا دھند فائرنگ کر دی جس کی زد میں آ کر کار سوار تینوں افراد موقع پر جاں بحق ہوگئے۔
واقعہ کی اطلاع ملتے ہی ڈی پی او انور سعید کنگرا موقع پر پہنچ گئے، پولیس نے لاشیں قبضہ میں لیکر پوسٹ مارٹم کیلئے ہسپتال منتقل کر دی ہیں، ڈی پی او کا کہنا تھا کہ علاقہ کی ناکہ بندی کر دی گئی ہے، جلد ملزمان کو گرفتار کر لیا جائے گا، واقعہ دیرینہ دشمنی کا نتیجہ ہے۔